Махуэшхуэм ирихьэлIэу

Тэрч къалэ дэт Гагарин Юрий и цIэр зезыхьэ стадионым щекIуэкIащ Урысей Федерацэм и прокуратурэр къызэрызэрагъэпэщрэ илъэс 300, Къэбэрдей-Балъкъэрым и прокуратурэр илъэси I00 зэрырикъум теухуа футболымкIэ щIыналъэм и зэхьэзэхуэ зэIуха. АбыкIэ жэрдэм къыхалъхьащ Тэрч муниципальнэ районым и администрацэмрэ куейм и прокуратурэмрэ. 
Зэхьэзэхуэм ипэ къихуэу абы хэтхэм зыкъыхуагъэзащ Тэрч щIыналъэм и Iэтащхьэ Дадэ МуIэедрэ, юстицэм и чэнджэщэгъу нэхъыжь НэгъэцIу Зауррэ. Иужьрейм къызэхуэсахэм яхуиIуэтэжащ прокуратурэр къызэрыунэхуам и хъыбарыр, хабзэр къызэпамыуду ягъэзэщIэн, цIыхухэм, жылагъуэм, къэралым я захуагъэмрэ хуитыныгъэмрэ хъумэным папщIэ абыхэм ягъэзащIэ къалэнхэм. 
Тэрч щIыналъэм футболымкIэ и зэхьэзэхуэ зэIухам хэтащ Налшык, Прохладнэ, Нарткъалэ, Тэрч къалэхэм щыщ 2009-20I0 гъэхэм къалъхуа ныбжьыщIэхэмкIэ зэхагъэува командибл. 
ЗэпэщIэтыныгъэ гуащIэхэм пашэныгъэр щаубыдащ икIи зэхьэзэхуэм и кубок нэхъыщхьэр зыIэрагъэхьащ «Тэрч» футбол командэм и футболист щIалэщIэхэм. Абыхэм къакIэлъокIуэ Налшык къалэ къикIа «Олимпик»-р. Ещанэ увыпIэр зыIэрагъэхьащ «Прохладный» футбол командэм и топджэгухэм. 
Зэхьэзэхуэм и футболист нэхъыфIу къалъытащ Къанокъуэ Асхьэд, гъуащхьауэ нэхъыфI хъуащ Исрамян Артур. Зэпеуэм и гъуащхьэтет нэхъыфIу къалъытащ топ нэхъ мащIэ дыдэ и гъуэм дэзыгъэкIа Сальников Андрей. 
 

 

Къэхъун Бэч.
Поделиться: