УнэтIакIуэ телъыджэ

Мэлыжьыхьым и 22-м ди къэралым и щIыналъэ куэдым щагъэлъапIэ революционер, публицист, совет политикэ, къэрал лэжьакIуэ цIэрыIуэ, дунейпсо тхыдэм щыяпэу социалист къэрал – СССР – къызэзыгъэпэща Ленин (Ульянов) Владимир къыщалъхуа махуэр. 
Ар щыцIэрыIуэр ди деж и закъуэтэкъым. Абы и Iуэху бгъэдыхьэкIэхэмрэ гупсысэкIэмрэ щIыпIэ куэдым щызэлъащIысат. Лениным хуэдэ цIыху куэд дунейм тетакъым. Ар гъащIэм куууэ хэзыщIыкI еджагъэшхуэт, езыр жьакIуэт, къэрал лэжьакIуэ Iущт. Абы и фIэщ хъурт лэжьакIуэбэм къаруушхуэ зэракъуэлъыр. Ленин Владимир фIыуэ илъагъурт щIалэгъуалэр, псом хуэмыдэу и нэIэ тригъэтт сабийхэм. 
Апхуэдэуи вождым гулъытэшхуэ хуищIырт пащтыхьым и зэманым хэкIуэдэж пэта лъэпкъ мащIэхэм. Къапщтэмэ, совет властым и лъэхъэнэм ди республикэм и ухуэныгъэр хуабжьу щIэхуэбжьауэ щытащ, IуэхущIапIэ ин куэд яухуащ, IэщIагъэм куууэ хэзыщIыкI лэжьакIуэхэр диIэ хъуащ. А псори екIуу къэрал псом къыщызэзыгъэпэщыфу щыта Ленин цIыху хьэлэл псоми ящыгъупщэнукъым. 
Куэд тетхыхьащ икIи тражыIыхьащ абы къэралыр екIуу зэрызэрихьэу щытамрэ и хьэл-щэн дахэхэмрэ. «Лениным и акъылыр сфIэтелъыджэщ…Иджыри къэс цIыхубэм и тхыдэм зыми щыхузэфIэкIакъым апхуэдэу цIыхухэр зытхьэкъуфын, хьэлэлу яхуэлэжьэфын. Абы и фэеплъыр лIэщIыгъуэхэм яхэгъуэщэжынукъым», - итхыгъащ франджы тхакIуэ цIэрыIуэ Роллан Ромен. 
«Лениным и акъылым къызэщIиубыдэрт дуней псор. Апхуэдэ цIыхухэр илъэсищэм зэ дунейм къытехьэу аращ», - щIигъужащ инджылыз политик Черчилль Уинстон.