Командэ къыхэхам ирагъэблагъэ

20 апреля, 2022 - 08:52

Налшык дэт Универсальнэ спорт комплексым щекIуэкIащ зи ныбжьыр илъэс 2I-м фIэмыкIахэм тхэквондомкIэ я урысейпсо зэхьэзэхуэ. Абы и саугъэтхэм щIэбэнащ къэралым и щIыналъэ 49-м къикIа спортсмен 405-рэ.
Зэхьэзэхуэм и япэ махуэм утыкум къихьа ди лъэпкъэгъу Бекъул Миланэ зи хьэлъагъыр килограмм 46-м нэблагъэхэм я гупым псоми щефIэкIащ икIи дыщэ медалыр зыIэригъэхьащ. Илъэсыр къызэрихьэрэ мы ехъулIэныгъэр Миланэ и дежкIэ етIуанэ текIуэныгъэщ.
КъыкIэлъыкIуэ махуэм кIэух зэIущIэм щызэхуэзащ Къэбэрдей-Балъкъэрым щыщ спорстменитI. Зи хьэлъагъыр килограмм 54-м нэблагъэхэм я финалым пашэныгъэр щиубыдащ Щокъуий Ислъам, Дыжьын медалыр къылъысащ Багъ Идар. КъищынэмыщIауэ, къыщыхах зэIущIэхэм къыщигъэлъэгъуа зэфIэкI лъагэхэм япкъ иткIэ Щокъуийм игъэзэщIащ Урысей Федерацэм спортым и мастерым и мардэр.
Урысейм щIыхь зиIэ и тренер Ахъмэт Амир и гъэсэн зи цIэ къитIуахэр къэралым и командэ къыхэхам хагъэхьащ. Мыгувэу абыхэм зэхьэзэхуэ инхэр къапоплъэ.

Мэзкуу Къан.
  • 19 просмотров
Поделиться: