Гур зыхуеIэм Iэр лъоIэс

Бухгалтер АфэщIагъуэ Джамилэ дэрбзэр IэщIагъэм езыр-езыру зыхуигъэсэжащ, уеблэмэ «Sai­Jamin»  зыфIища и фэилъхьэгъуэхэр цIэрыIуэ  хъуащ. Абы цIыхубз бостейм хьэзырхэр тету игъэ­хьэзыра лэжьыгъэхэр щигъэлъэгъуэну хунэсащ Mercedes-Benz Fashion Week Russia выставкэм.  Абы утыку кърихьа щыгъынхэр къытра­дзэжащ L’Officiel (урысей), Vogue (итальян) журналхэм.

Дэным зыкIи пымыщIа хъыджэбзым лъэпкъ хабзэмрэ иджырей модэмрэ щызэхэухуэна щыгъынхэр идыну япэу игу къыщыкIар Тбилиси зыгъэпсэхуакIуэ ­кIуауэ зы шоу-рум гуэрым ирихьэлIа нэужьщ. ДизайнымкIэ москва академием къызэригъэпэщ курсхэм я зым ар щеджащ, икIи мазибгъум къриубыдэу эскиз ищIу зигъэсащ, дэным, маркетингым, нэгъуэщIхэми щыгъуазэ захуищIащ. Нэхъ гъэщIэгъуэнрати, и сабийхэр игъэжеижа нэужьт, абы еджэным щыщIидзэр.
- Сыт щыгъуи щыгъын дахэхэр сфIэфIт, уеблэмэ сэ зесхьэхэр къэхъурт дизайнерхэм я деж къыщыс щэху. Ауэ зэи сигу ирихьу щытакъым цIуугъэнэхэр. Арати, сегупсысащ егъэлея зыкIэрымылъ ди лъэпкъ фащэр иджырей дизайным къыщызгъэсэбэпыну, - жеIэ Афэ­щIагъуэм. - Куржым цIыхубз бостейхэр хьэзыркIэ ­ягъэдэхауэ зэрыщыслъэгъуар къэсщIэжри, абыхэм ­къащхьэщыкIыу, сэ а пкъыгъуэхэр Iэщхьэми, бостеикIэхэми, уеблэмэ бэлътоми къыщызгъэсэбэпащ. ЦIыхубз фащэм и Iэщхьэтелъым хуэдэкIэ гъуэншэдж зыпыт кIэстумыр иризгъэдахащ. Апхуэдэу си диплом лэжьыгъэр - Circasso - згъэхьэзырауэ щытащ. Абы ­щыгъуэм  къызжаIат иджырей фэилъхьэгъуэхэм лъэпкъ дамыгъэхэр хэухуэнауэ дыныр зэи модэм зэ­римы­кIынур.
Джамилэ лъэпкъ дамыгъэхэмрэ хэдыкIхэмрэ я ­закъуэкъым тегъэщIапIэ ищIыр. Ар нэхъыбэу зыхэтыр иджырей щыгъынхэм лъэпкъ гупсысэ, хабзэ, щэн къы­зэрыщигъэлъэгъуэнырщ.
- Нэгъабэ жэпуэгъуэм екIуэкIа Mercedes-Benz Fashion Week Russia Iуэхум и саугъэт къэсхьын дэнэ къэна,  си гугъатэкъым си лэжьыгъэхэр кIуэцIрыкIыххэну. АрщхьэкIэ «Iуащхьэмахуэ» зыфIэсща фэилъхьэгъуэ-хэр (20 хъун хуейт) гуп зэщIэзгъэуIуам и гъусэу тхьэ­махуитIым и кIуэцIкIэ дгъэхьэзырри, щIэупщIэшхуэ яIэ хъуат, - жеIэ хъыджэбзым.
Абы къыкIэлъыкIуэу АфэщIагъуэр ирагъэблэгъащ Япэ каналымкIэ екIуэкI «Модный приговор» нэты­ным икIи и фэилъхьэгъуэу 8  щагъэлъэгъуащ, ­Бэрбэч Аскэр и уэрэдыр къеуэу. Фэилъхьэгъуэхэм ­ятеухуауэ Джа­милэ триха видео кIэщIри абдеж утыку къыщрахьащ, езыр  хэтыну кIуэфатэкъыми.
АфэщIагъуэм и Iуэху бгъэдыхьэкIэр адрей дизайнер-хэр зэрылажьэм къащхьэщокI - ар псом япэ щэкIым ­еп­лъмэ нэхъ къещтэ, апхуэдэу фэилъхьэгъуэр и нэгу къыщIоувэ. ИтIанэщ эскизым щетIысылIэр. Бзылъ­хугъэм и фэилъхьэгъуэхэр ягу зэрыдыхьэр нэры­-                   лъагъу ещI езым и щэхуакIуэхэр иIэ зэрыхъуам.
Хьэлэмэтращи, дэрбзэр цIыхубзым и IэдакъэщIэкIхэм гу къылъатащ куржы, урысей уэрэджыIакIуэ Топурие Кетирэ телевиденэм нэтын щезыгъэкIуэкI Лопырёвэ Викториерэ икIи зэгурыIуэныгъэкIэ абыхэм фэилъ­хьэгъуэхэм ящыщ яхуригъэшащ. Джамилэ и хъуэпса­-пIэр и IэдакъэщIэкIхэр Тбилиси щекIуэкI шоу-рум­хэм щигъэлъэгъуэнырщ - абдежщ и IэщIагъэм теухуа гуп­сы­сэхэр къыщыушари.