«Лэгъупыкъум» сабийхэр зыхуей зэрыщыхуэзэм зыщагъэгъуазэ

КъБР-м и Iэтащхьэ КIуэкIуэ Казбек, «ЩIыналъэхэм зегъэужьынымкIэ фонд» компание зэIухам къыхуаутIыпщ мылъкур зыхухэха­­- хэм ятегуэшэныр зи нэIэ щIэт советым и унафэщI Степашин Сергей, «ЩIыналъэхэм ­зегъэужьынымкIэ фонд» компанием и генеральнэ унафэщI Цицин Константин сымэ щыIащ Донецк ЦIыхубэ Республикэм къра­шауэ Къэбэрдей-Балъкъэрым щыIэ сабийхэм я деж. НыбжьыщIэ 35-м я узыншагъэр щы­зэтрагъэувэж «Лъэгъупыкъу» сабий центрым. 

Республикэ унафэщIымрэ хьэщIэхэмрэ зрагъэлъэгъуащ сабийхэр зыхуей зэрыхуагъа­зэр. КIуэкIуэр цIыкIухэм я узыншагъэм щIэуп­щIащ икIи ахэр зыхуей псомкIи ди лъахэм къы­зэрыщызэрагъэпэщынур яжриIащ. 
Степашиным къыхигъэщащ Къэбэрдей-Балъкъэрыр Урысейм и щIыналъэ нэхъыфIхэм зэ­ращыщыр. «Фи хэку вгъэзэжми, дяпэкIэ Къэ­бэрдей-Балъкъэрым фыкъакIуэурэ зывгъэп­сэху хъунущ. Си фIэщ мэхъу икIэщIыпIэкIэ псо­-ри иухыу, фокIадэм и 1-м, Макеевкэ дэт фи школым кIуэн зэрыщIэвдзэжынур. Фи ныб­жьэгъухэм, Iыхьлыхэм яжефIэжынщ, мыбы фы­зэ­рыщагъэфIар», - жиIащ Степашиным. 
Сабийхэми абыхэм я гъусэ балигъхэми я псалъэм къыхэщащ къалэдэсхэр хуабжьу зэры­гуапэр, хьэщIэ фIыуэ зэралъагъур. ДяпэкIэ ахэр щIыпIэ дахэхэм яшэнущ, я нэгу зрагъэужьы­-нущ. А махуэм цIыкIухэм яхуэупсащ IэфIыкIэ­рэ хьэпшып гукъинэжхэмкIэ. 
КIуэкIуэ Казбек жиIащ Къэбэрдей-Балъкъэ­рыр Донецк, Луганск цIыхубэ республикэ­хэм дяпэкIи зэрадэIэпыкъунур. Тхьэмахуищ дэкIмэ, иджыри зы сабий гуп зэрыпэплъэр къыхигъэщащ Iэтащхьэм, абыхэми «Лъэгъупыкъум» зыхуей псори щыхуащIэнущ. 
Гугъуехь хэхуа щIыналъэхэм щыщ сабийхэр иджыри къашэмэ, щIагъэтIысхьэну хьэзырщ Налшык къалэм и зыгъэпсэхупIэхэу Къалмыкъым и цIэр зезыхьэ, «Вершина», «Кавказ», «Долинск» «Курорт «Нальчик» санаторэхэм. Ап­хуэдэуи цIыкIухэм я щIэныгъэм щыпащэнущ Налшык и курыт еджапIэхэм. 

 

Къэбарт Мирэ.
Поделиться: