Университетым и махуэшхуэм и щIыхькIэ

Къэбэрдей-Балъкъэр къэрал университетым и стадионым щекIуэкIащ регбимкIэ КъБКъУ-м и зэхьэзэхуэ. Республикэм и еджапIэ нэхъыщхьэр къызэрызэрагъэпэщрэ илъэс 90 зэрырикъум хухэха зэпеуэм и саугъэтхэм щIэбэнащ ныбжьыщIэ командэхэр.
Зэхьэзэхуэм и судья нэхъыщхьэу щытащ КъБКъУ-м регбимкIэ и спорт секцэм и тренер Нало Алим. Зэпеуэм хэтащ Къэбэрдей-Балъкъэрым и ныбжьыщIэ командэ къыхэхар, «Налшык» спорт школым и «Нарт» командэмрэ, университетым и регбистхэмрэ.
ЗэпэщIэтыныгъэ гуащIэ удэзыхьэххэм яужькIэ увыпIэхэр мыпхуэдэу гуэша хъуащ: дыщэ медалхэр зыIэрагъэхьащ «Нарт» командэм хэтхэм, абыхэм къакIэлъокIуэ Бэрбэч Хь.М. и цIэр зезыхьэ Къэбэрдей-Балъкъэр къэрал университетым и регбистхэр. КъБР-м и ныбжьыщIэ командэ къыхэхар ещанэ хъуащ.
Юбилейм и щIыхькIэ къызэрагъэпэща зэхьэзэхуэм щытекIуахэмрэ къыщыхэжаныкIахэмрэ кубокхэмкIэ, грамотэхэмрэ медалхэмкIэ ягъэпэжащ. Спортсменхэр саугъэтхэр иратащ регбим и ветеран Нало Алим, КъБР-м экономикэмкIэ министрым и къуэдзэ Бэждыгъу Темыркъан, КъБКъУ-м и спорт клубым и унафэщI Унэж Рустам, республикэм регбимкIэ и федерацэм и президент Сурженкэ Руслан сымэ.

Мэзкуу Къан.
Поделиться: