Ди тхылъ тедзапIэм иджыблагъэ дунейм къыщытехьащ Къаныкъуэ СэIэдулэ и «Ленинград къикIа хъыджэбз» тхылъыр.
Къаныкъуэ СэIэдулэ (1927 - 1987) и цIэр тхылъеджэхэм фIы дыдэу яцIыхуу пхужыIэнукъым. Илъэс куэдкIэ щылъыжащ абы и IэдакъэщIэкIхэр. «Ленинград къикIа хъыджэбз» романыр 1970 гъэм «Эльбрус» тхылъ тедзапIэм къыщыдэкIауэ щытащ.
СССР-м щIэджыкIакIуэ куэд щигъуэтат тхыгъэм, «Детская литература» тхылъ тедзапIэм урысыбзэкIэ къыщыдэкIа нэужь. 1941 гъэм Ленинград къикIыу Налшык къэкIуа хъыджэбз цIыкIум теухуа тхыгъэр куэдым ягу дыхьауэ щытащ. Ар къыдэзыгъэкIа тхылъ тедзапIэр зыхуэлажьэр сабийхэмрэ ныбжьыщIэхэмрэ яхуэгъэза тхыгъэхэр къыдэгъэкIынырти, щызэрадзэкIым ягъэкIэщIащ - повесть кIэщI къыхащIыкIащ. «Ленинград къикIа хъыджэбз» тхыгъэм абы щыгъуэ куэд тепсэлъыхьырт. Иджы ущIэупщIэмэ, зытхар къахуэщIэжыркъым, ауэ езы тхыгъэм щхьэкIэ жаIэ: «Деджауэ щытащ».
«Ленинград къикIа хъыджэбзыр» иджы адыгэбзэкIэ къыдэкIащ. Куэд дихьэхыну си гугъэщ, псом хуэмыдэу, щIалэгъуалэм гъэщIэгъуэн ящыхъунущ. Мы романым нэмыщI, нэгъуэщI тхыгъэхэри и Iэдакъэ къыщIэкIауэ щытащ Къаныкъуэ СэIэдулэ. И кIэм нимыгъэсу къэнащ романитIи: «Адэм и лъэужьым», «Аушыджэр». Зэгуэр, ахэри къыдэкIыну согугъэ, сыту жыпIэмэ, СэIэдулэ ипхъущ усакIуэ, драматург Къаныкъуэ Заринэ. Мы романыр тхылъ тедзапIэм къыщIэзылъхьар аращ. Адэм и фэеплъу и бынхэм къыдагъэкIыжащ.
