«Налшык» псым и Iуфэм жыгхэр щыхасэ

Къэбэрдей-Балъкъэр Республикэр къызэрызэрагъэпэщрэ илъэси 100 зэрырикъум и щIыхькIэ Налшык псым и Iуфэм ирикIуэ лъэс лъагъуэм щыхасащ куэдрэ узримыхьэлIэ жыг лIэужьыгъуэщIэ телъыджэ - «Павловния войлочная» фIэщыгъэр зиIэр. А Iуэхур «Экологистика» ООО-м и жэрдэмкIэ къызэрагъэпэщащ.

Жыгхэр гъатхэм егъэлеяуэ удихьэхыу зэщIогъагъэри, ихъуреягъэр махуэ 45-кIэ ягъэдахэ. Гъэгъа шакъафэхэм къапих мэ гуакIуэм зыIэпишэр цIыхухэм я закъуэкъым, абы куэду кърешалIэ бжьэхэри. А жыг лIэужьыгъуэм и гъэгъахэм къыпах фом хущхъуэгъуэ хэлъу къалъытэ. КъищынэмыщIауэ, а къэкIыгъэ телъыджэм нэгъуэщI зы щхьэпагъи иIэщ - абы хьэуам хеутIыпщэ узыншагъэр иригъэфIакIуэу тхьэмбылымкIэ сэбэпышхуэ хъу пкъахуэхэр. Жыгхэм етIанэгъэ гъэгъэн щIадзэнущ.

«Мыпхуэдэ Iуэхухэр иджы япэу едгъэкIуэкIыу аракъым, дэ щIэх-щIэхыурэ къызыдогъэпэщ цIыхухэм экологием гулъытэ щыхуедгъэщI зэхыхьэхэр, еджакIуэхэр, студентхэр хэту щIыуэпсым теухуа семинархэр зэхыдошэ, а лэжьыгъэхэм адэкIи къыпытщэну ди мурадщ, - жиIащ «Экологистика» ООО-м и унафэщI КъуэщIысокъуэ Рустам. -Дыкъэзыухъуреихь дунейр къабзэу щытынымкIэ, экологиер хъума хъунымкIэ къетхьэжьэ Iуэхухэр къыщыдэхъулIэнур псори зэгъусэу ди къару абы етхьэлIэмэщ: къэрал къулыкъущIапIэхэри, жылагъуэ зэгухьэныгъэхэри, журналистхэри, къызэрыгуэкI цIыхухэри дызэдэлажьэмэщ.

Къэбэрдей-Балъкъэрыр илъэси 100 зэрырикъум хуэгъэпсауэ едгъэкIуэкI Iуэхугъуэхэм хыхьэу иджыри Налшык и щIыпIэхэм ящыщ зы сыт и лъэныкъуэкIи зыхуей хуэзэу зэIузэпэщ зэрытщIынум иджыпстукIэ иужь дитщ, ар къалэдэсхэм яхуэдгъэхьэзыр тыгъэ гуапэщ. Сэ къызолъытэ нобэ зы Iуэху щхьэпэ къыдэхъулIауэ икIи шэч къытесхьэркъым жыг телъыджэр щыхэтса лъэс лъагъуэр республикэм щыпсэухэми абы и хьэщIэхэми фIыуэ ялъагъуу зыщагъэпсэху щIыпIэ зэрахуэхъунум».