ЦIыхур зыхуеину псоми я уасэм хэхъуэ зэпытщ. Зыри щыгъуазэкъым ар къыщызэтеувыIэну пIалъэми. Гугъуехь къыкъуэкIам апхуэдизкIэ цIыхури есэжу хуежьащи, щIагъур зыхуэдизым щIэмыупщIэжыххэхэми уарохьэлIэ.
Къалэкум ит ерыскъыщапIэ тыкуэнхэм ящыщ зым щIэт цIыхубзым щэхуакIуэ къэс емызэшу ягурегъаIуэ езым и зэран лъэпкъ Iуэхум зэрыхэмылъыр. Нэрылъагъуу мэукIытэ, ауэ сыт и Iэмалыр? – ерыскъыхэкIыр къыщIэзыгъэкIхэмрэ езымрэ я зэхуакум дэтхэм къыхуащIыр и унафэщи, къыхуагъэлъагъуэ уасэмкIэ къаIимыхыу хъуркъым.
- Дыгъуасэ тхъуцIынэмрэ кхъуеймрэ сом 30 щIигъуауэ къысхуашащ. КъеIызмыхыуи хъунутэкъым, сэри сыпсэун хуейкъэ? СыбампIэри джэдыкIэр Iуезгъэшыжащ. Апхуэдэ къабзэу хэхъуащ фошыгъуми IэфIыкIэхэми. Псом нэхъ щхьэрыжэр мис! – и лъабжьэм еIэбыхри къыщIихащ тхылъымпIэпсым илъ прунжыр. «Посредник» плъагъум мыр дыгъуасэ къысхуешэ хигъэхъуауэ. И щхьэр Iузохри, илъыр зэIыхьащ, пшхынкIэ Iэмал имыIэу. Нобэ къызэрыIухьэу псори естыжыну згъэхьэзырауэ щылъщ. Ауэ шхумрэ щIакхъуэмрэ къысхуэзышэ муслъымэн щIалэр япэрей уасэм тетщи, согуфIэ, - мэтхьэусыхэ тыкуэныр зейр.
Абы пэмыжыжьэу щыт етIуанэ сату щIапIэм щызэхэпхыр нэгъуэщIщ, сату зыщI цIыхубзхэм я Iуэху еплъыкIэм нэхъ хэмылъами. Япэ тыкуэным щIэтыр Iуэхум ириукIытэмэ, мыдрехэм жаIэр нэгъуэщIщ:
- Мыпхуэдизу щхьэ псори вгъэлъэпIа, жиIэу цIыхубз хэкIуэтар щыщIэупщIэкIэ, абыи фесэжынщ, цIыхум ахъшэ якъуэлъщ, - къретыж жэуап.
Пэжу, зыкъуэлъи щыIэу къыщIэкIынщ, ауэ зыкъуэмылъхэр - щэ? Пенсэр мащIэмэ, улахуэр нэхъ мащIэжмэ, сыт абы плъапIэу иIэр?
УтхьэщIэн – улъэсэным, унагъуэм ущыIэбэным хухэха хьэпшыпхэр щащэ тыкуэным Iуэхур зыкIи щынэхъыфIтэкъым. Зы цIыхухъу дыхьри къищтащ зыхуеину зы пхъэхрэ акрилым къыхэщIыкIауэ унэ щIыхьэпIэхэм щагъэтIылъ зы алэрыбгъу зэпэплIимэ цIыкIурэ.
Кассэм ис урыс цIыхубз цIыкIур къоплъри къыжреIэ:
- Мыбыхэм я уасэ хъуар бжесIэмэ, къэпщтэну си фIэщ хъуркъым..
- Дапщэ?
- Мис мы пхъэхыр сом I миным щIигъу и уасэу щытати, сом мини 3 – м нэсащ. Алэрыбгъуми хэхъуащ хуэдищ.
Псори игъэтIылъыжри щIэкIыжащ щэхуакIуэр. Тыкуэнышхуэр нэщIщ, цIыху зэкъуэтIакъуэ фIэкIа къыщIыхьэркъым. Апхуэдэ щытыкIэр дэпхуэдизрэ екIуэкIынуми зыми ищIэркъым. Ауэ псом нэхъ узыгъэпIейтейр зэгуэр дэкIуея уасэрзыхэпщIэу къызэремыхыжырщ. Ар псоми дощIэ. ЗэкIэ къуаншагъэр зым адрейм трелъхьэ. Зэманым къигъэлъэгъуэнщ дызыхуэкIуэнур.
