Къэрал кIуэцI IуэхухэмкIэ министерствэу КъБР-м щыIэм и жэрдэмкIэ илъэс къэс Къэбэрдей-Балъкъэрым щрагъэкIуэкI «Хабзэм и лIыхъусэхэр» зэпеуэр. Ар хуэунэтIащ щIалэгъуалэр хэкупсэу къэгъэтэджыным, наркотикым, фадэм, тутыным пэIэщIэ щIыным, балигъ мыхъуахэм хабзэм ебакъуэ къахэмыкIыным, апхуэдэуи жыджэрагъ яхэлъыным, я зэфIэкIыр жылагъуэ гъащIэм къыщагъэлъэгъуэным.
Зэпеуэр Налшык къыщызэрагъэпэщащ «Сабийхэмрэ ныбжьыщIэхэмрэ я творчествэмкIэ къалэ центр» кIэзонэ IуэхущIапIэмрэ (унафэщIыр Закаевэ Динарэщ) «ЕджакIуэхэм я урысейпсо зэщIэхъееныгъэм» Налшык къалэ щиIэ жылагъуэ зэгухьэныгъэмрэ (унафэщIыр Мыкъуэ ФатIимэщ).
Конкурсым хэтащ Налшык къалэм и еджапIэхэм я класс нэхъыжьхэм щIэсхэр, апхуэдэуи профилактикэ учетым щыт ныбжьыщIэхэр.
Iуэхум кърихьэлIащ УФ-м СледствиемкIэ и комитетым КъБР-м щиIэ кIэлъыплъыныгъэ-следственнэ управленэм и инспектор Ульяновэ Иринэ, Урысей лъэпкъ гвардием и управленэу КъБР-м щыIэм и унафэщIым и дэIэпыкъуэгъу, полицэм и майор Лыкъуэжь Маринэрэ юрист-чэнджэщэгъу, полицэм и капитан КъуэщIысокъуэ Муратрэ, Урысей МВД-м Налшык къалэм щиIэ управленэм балигъ мыхъуахэм я IуэхухэмкIэ и къудамэм и унафэщI, полицэм и подполковник Шорэ Маритэ.
Зэпеуэм хэтахэм фIэхъус псалъэхэмкIэ захуигъэзащ Закаевэ Динарэ икIи зэхьэзэхуэхэм ехъулIэныгъэхэр къыщахьмэ зэригуапэр яжриIащ. Iыхьи 8-уэ гуэша зэпеуэм я творческэ зэфIэкIхэр щагъэлъэгъуащ ныбжьыщIэхэм. КъэпщытакIуэ гупым гулъытэ хуищIащ лэжьыгъэхэм я купщIэм, щIалэгъуалэм яхэлъ жэрдэмым, лъэпкъ хабзэхэм зэрыщыгъуазэм, апхуэдэуи я утыку итыкIэм.
ЕджакIуэхэм театр теплъэгъуэхэр, уэрэдхэмрэ иджырей къафэхэмрэ дахэу ягъэзэщIащ. Шорэ Маритэ Iуэхум хэтахэм фIыщIэ яхуищIащ абы екIуу зэрызыхуагъэхьэзырам папщIэ.
Зэхьэзэхуэм япэ увыпIэр щызэдагуэшащ курыт еджапIэ №5-мрэ гимназие №29-мрэ къикIахэм, 2-нэ хъуащ гимназие № I4-р, курыт еджапIэ № 24-р ещанэщ.
КъызэгъэпэщакIуэхэмрэ къэпщытакIуэ гупым хэтахэмрэ жаIащ мыпхуэдэ Iуэхухэр щIэх-щIэхыурэ егъэкIуэкIын зэрыхуейр, балигъ мыхъуахэм профилактикэ Iуэхухэр ядегъэкIуэкIынымрэ жылагъуэм тэмэму хэгъэзэгъэнымкIэ икъукIэ щхьэпэщи.
