«Кавказ Ищхъэрэ Урысей сетхэр» зэгухьэныгъэм Къэбэрдей-Балъкъэрым кърит токым и уасэр зэрыщапшыныр нэхъ зэкIэлъыгъэкIуа щыхъуащ.
Къэдгъэлъэгъуэнщи, 2022 гъэм и мазаем «Кавказ Ищхъэрэ Урысей сетхэр» зэгухьэныгъэм и электрокъарур ди республикэм, псори зэхэту, къыщызыгъэсэбэпахэм абы хуэза уасэм и процент 88-р, нэгъуэщIу жытIэмэ, сом мелуан 456-м щIигъур мы зэманым ирихьэлIэу япшынащ. Ар сом мелуан 50-кIэ нэхъыбэщ нэгъабэ и апхуэдэ лъэхъэнэм зэрыщытам елъытауэ.
Къагъэсэбэпа токым (электрокъарум и уасэр) и чэзум зыпшынауэ щапхъэ зытехыпхъэу къагъэлъэгъуахэм ящыщщ абы и пщIэр щIыпIэ, республикэ бюджетхэм къыхэкIыу зыт предприятэхэр. Мыбыхэм ток уасэм техуэр япшынащ (зэрызэкIэлъыкIуэу къэдгъэлъагъуэмэ) проценти I44-рэ I09-кIэ (нэхъапэм ятелъам зэрыхагъэщIахэри хэту).
Зэрыщыту къатщтэмэ, щIыналъэм и промышленнэ, промышленнэу щымыт предприятэхэм ток уасэр энергетикхэм хуапшынащ (зэрызэкIэлъыкIуэу къэдгъэлъагъуэмэ) проценти 107-рэ 104-кIэ.
Унагъуэ щхьэхуэхэм а мазэм къагъэсэбэпар, псори зэхэтлъхьэжмэ, проценти I02-кIэ япшынащ.
«Республикэм электрокъарур къыщызыгъэсэбэпхэм ящыщу абы и уасэр нэхъ зымыпшыныфыр псэупIэ-коммунальнэ хозяйствэм и IуэхущIапIэхэрщ. Мы гъэм гъатхэпэм и 1-м ирихьэлIэу абыхэм, псори зэхэту, щIыхуэу ятелъар сом меларди 3-м нагъэблэгъащ. А бжыгъэм и процент 92-р, нэгъуэщIу жытIэмэ сом меларди 2,8-р зытезыгъэхуар псырэ хуабэрэ къэзыт IэнатIэхэрщ. Ауэ щыхъукIи, дэ шэч хэмылъу яужь дитщ республикэм и псэупIэ-коммунальнэ хозяйствэм хыхьэ IуэхущIапэхэм нэхъапэм къагъэсэбэпа электрокъарум и уасэр зыIэрыдгъэхьэжыным икIи ар, хабзэр ди щIэгъэкъуэну, зыхуэдгъэувыжа бжыгъэм зэрынэдгъэсыным», - къыхигъэщащ «Къэббалъкъэнерго» IэнатIэм и «Энергосбыт» къудамэм и унафэщIым и къуэдзэ Шустова Эллинэ.
Ауэ щыхъукIи, энергетикхэм токыр къэзыгъэсэбэп псоми иджыри зэ ягу къагъэкIыж абы и уасэр и чэзум яткIэрэ, ар къезыт IэнатIэхэм дращIылIа зэгурыIуэныгъэхэм тетын зэрыхуейр, ди щIыналъэр, зэрыщыту къатщтэмэ, электрокъарукIэ къызэрызэгъэпэщар лъэпощхьэпоуншэу дяпэкIи екIуэкIын папщIэ.
