Куэдым ящIэж 1990 гъэхэм къагъэлъагъуэу щыта «Псысэр ди хьэщIэщ» теленэтыныр. Псом хуэмыдэу илъэси 4 - 12-м иту а зэманым ирихьэлIахэм я дежкIэ ар гукъинэж зыщымыхъуа щыIэу къыщIэкIынукъым.
КъБР-м и Урыс драмэ театрым и актрисэ Къуэныкъуей Залинэ а теленэтыныр ищIэж къудейуэ щымыту, артист къызэрыхэкIынур абдеж къыщежьащ. Залинэ езанэ классым щыщIэсым сабийхэр хэту гъэлъэгъуэныгъэ цIыкIу телевиденэм щытрахырти, абы зыкъыщигъэлъэгъуа и ужь, ар ирагъэблэгъат «Псысэр ди хьэщIэщ» нэтыныр иригъэкIуэкIыну. Уеблэмэ илъэсийкIэ зэкIэлъыпыту и анэдэлъхубзэмкIэ абы псысэхэр зэригъащIэрэ телевизореплъ цIыкIухэм яжриIэжу къэгъуэгурыкIуащ.
2002 гъэм Залинэ ГъузджэхэмкIэ Кавказ Ищхъэрэ къэрал институтым щIэтIысхьэри, еджапIэр диплом плъыжькIэ къиухащ, занщIэуи КъБР-м и Урыс драмэ театрым щылэжьэну къащтащ.
- ЕджапIэ нэхъыщхьэм сыщыщIэтIысхьэ илъэсым адыгэбзэкIэ ягъасэ гуп къащтэртэкъым. Ауэ абыи емылъытауэ, насыпу къызолъытэ Балъкъэр Тамарэ, Мэрзей СулътIанбэч, Дэбагъуэ Роман, Сейфуллаев Фархат, Сафарова Тамарэ, Мыд Мадинэ сымэ хуэдэ гъэсакIуэхэм дазэрыпэщIэхуар. Дыщеджэм институтым и ректору щыта Эфендиев ФуIэд Ярославль, Москва къалэхэм щекIуэкI фестивалхэм дишэу щытащ. ЗэрыгурыIуэгъуэщи, апхуэдэ гъуэгуанэхэм уи зэфIэкIым щыхохъуэ, - жеIэ актрисэм.
Къуэныкъуейм театрым и цIэр фIыкIэ зыгъэIуну артист къыхэкIыну щогугъ. Къэбгъэлъагъуэмэ, абы роль зэмылIэужьыгъуэ куэд дыдэ игъэзэщIэну хунэсащ. Ар хэтащ Ханума (Сонэ и ролыр), «Пащтыхь Лир» (Карделие), «Франджы лъагъуныгъэ» (испан хъыджэбз), «Невеста из Имеретии» (Тамарэ) спектаклхэм.
- Нэгъабэ бжьыхьэм Бомарше Пьер и «Женитьба Фигаро» пьесэмкIэ ди деж спектакль щигъэувыну Санкт-Петербург режиссёр къызэрикIыр щызэхэсхам, сегупсысауэ щытат: «Сюзаннэ и ролым сыхуэкIуэркъым, илъэс 36-рэ сохъури. Графиня и ролым сыджэгун папщIэ, сыщIалэIуэщ!» - жыхуэсIэу. - игу къегъэкIыж Къуэныкъуейм. - Ролхэр зэрытрагуэшар къыщысщIам Iэнкун сыхъуат, Графиня и ролыр къысхуагъэфэщати. Ауэ си гуапэ мыхъууи къэнатэкъым. Режиссёр Кондрашовэ Дарье и гъусэу улэжьэну тыншт икIи и Iуэху бгъэдыхьэкIэр гъэщIэгъуэн тщыхъуат. Режиссёрым зыми къытпигъэувыртэкъым мардэ гуэрым дитын хуейуэ, уеблэмэ сэ згъэзащIэ персонажыр и бзэкIэ адрейхэм къазэрыхэщын Iэмал гуэр къэзгупсысыну къызжиIати, ар щыпсалъэкIэ къыкъ хъу хуэдэу дгъэлъэгъуэну къыхэслъхьащ. Спектаклыр щыдгъэхьэзырым деплъри, режиссёрым а гупсысэр игу ирихьат, икIи дыщIигъуат Графиняр зэIынэу къыщызгъэлъэгъуэн хуейр «о» хьэрфкIэ къыщIэзыдзэ псалъэхэм дежу зэрыщытыр. Лэжьыгъэр инт, ауэ мазэм и кIуэцIым ар зэдгъэхъулIэн хуейуэ къытпэщылъти, си гуи си пси етауэ абы сыпэрытащ. Иджы быдэу схужыIэнущ апхуэдэ спектаклым узэрытемыукIытыхьынур, - жеIэ Залинэ.
Къуэныкъуейр спектаклхэм къищынэмыщIа, Кэнжэ ЩэнхабзэмкIэ и унэми щолажьэ, сценарийхэр етх, зэхуэсхэр ирегъэкIуэкI. И зэфIэкIхэм хигъэхъуэну ди гуапэщ.
