НэхъыжьыфIыр ягъэлъапIэ

Дзэлыкъуэ районым и полицэм и лэжьакIуэхэр егуэпащ зи ныбжьыр илъэс 80 ирикъуа ветераным. 

Урысей МВД-м Дзэлыкъуэ районым щиIэ къудамэм и унафэщIым и къуэдзэ, къэрал кIуэцI къулыкъум и подполковник Дыджэ Русланрэ Къэрал кIуэцI IуэхухэмкIэ органхэмрэ къэрал кIуэцIыдзэхэмрэ я ветеранхэм я щIыналъэ советым и тхьэмадэ Щоджэн Хьэсэнбийрэ щыIащ Дженал къуажэм щыпсэу, МВД-м и пенсионер Жырыкъ Хьэсэнбий Къумал и ­къуэм и деж икIи и ныбжьыр илъэс 80 зэрырикъумкIэ ехъуэ­хъуащ.
Къэрал кIуэцI IуэхухэмкIэ органхэм илъэс 27-м нэскIэ къалэныр щезыхьэкIа, милицэм и участковэ уполномоченнэу лэжьа Жырыкъым и ныбжьэгъухэми къыдэлэжьахэми нобэми псалъэ гуапэхэр хужаIэ. 
Къулыкъум къызэрыхэкIыжрэ сабийхэм ядэлэжьэным зэманышхуэ хухех нэхъыжьыфIым, Дженал дэт ЩэнхабзэмкIэ унэм ахэр лъэпкъ пшынэр гъэбзэрэбзэным щыхуигъасэу. 
Дзэлыкъуэ район ОМВД-м и унафэщIхэм къабгъэдэкI ­хъуэхъу псалъэхэмкIэ нэхъыжьыфIым зыхуагъэзащ, узыншэу иджыри илъэс куэдкIэ псэуну ехъуэхъуащ, саугъэт лъапIэхэр иратащ.