ЦIыхуIэ зылъэмыIэса щIыуэпсым и дунейпсо фондым (World Wildlife Fund - WWF) къыхилъхьауэ «ЩIым и сыхьэт» зыфIаща къэрал зэхуаку Iуэхугъуэу гъэ къэс ирагъэкIуэкIым ди республикэри хэтщ.
Нобэ гъатхэпэм и 26-м щэбэт махуэу ди планетэм и щIыпIэ куэдым пщыхьэщхьэхуэкIуэу уэздыгъэ лейхэр щагъэункIыфIынущ, мыхьэнэ ин зимыIэ электро-Iэмэпсымэхэр къыщрачынущ. А «къалэныр» ягъэзэщIэнущ унагъуэ щхьэхуэхэмрэ IуэхущIапIэхэмрэ, курыт еджапIэхэмрэ хьэрычэтыщIэ IэнатIэхэмрэ, къыхуеджэныгъэм пэджэжа псоми.
Дыкъэзыухъуреихь дунейм и щытыкIэм зэрызихъуэжым, дызытес щIым и хъугъуэфIыгъуэхэм я зэгъэзэхуэкIэм арэзы дыкъызэримыщIым къэрал зэмылIэужьыгъуэхэм я унафэщIхэр, цIыхубэр езыгъэгупсыс мы Iуэхугъуэм, зэрыхуагъэфащэмкIэ, адрей илъэсхэми хуэдэу цIыху куэд хэтынущ.
Австралием и къалащхьэ Сидней 2007 гъэм япэ дыдэу щызэхашащ ди планетэм и хъугъуэфIыгъуэхэр ямылейрэ щысхьыншэу зэрагъэкIуэщIым гу лъезыгъатэ «The Sydney Morning Herald» зыфIаща Iуэхугъуэу иужьым щIыхьэху теплъэ зиIэ хъужар. 2008 гъэм абы нэхъри зиубгъуащ. А илъэсым абы хэтащ къэрал 35-рэ абыхэм щыIэ къалэхэу 400-м щIигъурэ.
2009 гъэм ирихьэлIэу «ЩIым и сыхьэт» зыфIащыну зыхунэса Iуэхугъуэм адэкIи зиубгъуащ. Ар зы мащIэкIэ нэхъ мыхъуми ялъэIэсащ ди планетэм щыпсэу цIыхухэм ящыщу мелардым щIигъум. Къэралу хыхьам я бжыгъэри, Урысей Федерацэри яхэту, 74-м нэсащ. Адрей гъэхэми хуэдэу, гъатхэпэм и иужьрей щэбэтым трагъэхуа мы махуэм «ЩIым и сыхьэт» зыфIаща и пIалъэм (пшапэ зэхэуэгъуэм) къриубыдэу, ди къэралым и щIыпIэ куэдми уэздыгъэхэр щагъэункIыфIат. Апхуэдэу, Москва дэт Къэрал университетым, а къалэм и администрацэм, Киевскэ вокзалым, Урысейм ЩIэныгъэхэмкIэ и академием и унэ нэхъыщхьэхэр, Санкт-Петербург зи хэщIапIэ хьэрычэтыщIэ зэгухьэныгъэхэу «ИКЕА», «Балтикэ» зи фIэщыгъэхэм я екIуэлIапIэхэр, цIыху зэхуэсыпIэу къалъытэ языныкъуэ клубхэм я ухуэныгъэхэр къэзыгъэнэху электро-уэздыгъэхэр ягъэункIыфIат.
Ауэрэ здекIуэкIым, «ЩIым и сыхьэт» зи фIэщыгъэ щIыхьэхум хыхьа къэралхэм я бжыгъэр нэхъри нэхъыбэж хъуащ. Мы махуэм пэджэжхэр щIыпIэ хэгъэунэхукIахэм щызэIуощIэри, щIыуэпсым и хъугъуэфIыгъуэхэр хъумэн зэрыхуейм щытопсэлъыхь, зэгъэзахуэ щыIэным и мыхьэнэм и гугъу щащI, щызочэнджэщ.