Экономикэ и лъэныкъуэкIэ къэралыр зэрыхуа щытыкIэ гугъум ипкъ иткIэ, иджыпсту хьэрычэтыщIэхэм я пщэ къалэнышхуэ къыдохуэ. ИкIэщIыпIэкIэ Iэмал къэгъуэтын хуейщ цIыхухэр зыхуей-зыхуэфI хьэпшыпхэр Урысейм къыщыщIэзыгъэкI IуэхущIапIэхэм я лэжьыгъэр зэтеублэным.
Мэзкуу областым и губернатор Воробьев Андрей гупыж ищIащ иджыри къэс хамэ къэралхэм кърашу щыта хьэпшыпхэм хуэдэхэр къыщIэзыгъэкIыну IуэхущIапIэхэм бэджэнду къащтэ щIыр I сомкIэ иратыну. ХабзэщIэр гъатхэпэм и I7-м Мэзкуу областым и Думэм къищтащ.
Губернаторым Мэзкуу областым и депутатхэм ягу къигъэкIыжащ Мэзкуу и Iэшэлъашэм щылажьэ хьэрычэтыщIэхэм щIыр пуду къагъэсэбэпыну Iэмал щрату зэман кIыхькIэ къызэрекIуэкIар.
«Иджы аргуэру жэрдэмыщIэ къыхыдолъхьэ, - жиIащ Воробьевым. – Зы сомкIэ щIыр илъэсищкIэ ягъэлэжьэну хуит тщIынущ. НэгъуэщIу жыпIэмэ, пщIэншэу. Апхуэдэу пуду щIыр еттыну дыхьэзырщ «импортзамещение» жыхуаIэ, хамэ къэралхэм къраш хьэпшыпхэм я пIэ иувэн къыщIэзыгъэкIыну дыкъэзыгъэгугъэ IуэхущIапIэхэр зыгъэлажьэ хьэрычэтыщIэхэм, проектыщIэ къезыхьэжьэну зи мурадхэм зыщIагъэгувэн щхьэусыгъуэ ямыIэн хуэдэу».
«УнафэщIхэм, къудамэ щхьэхуэхэм захуэзгъэзэну сыхуейщ Iуэхум тегушхуэну, - къыпищащ и гупсысэм Воробьевым. – Псалъэм папщIэ, хущхъуэ, ухуэныгъэ Iэмэпсымэ, газкIэ лажьэ хьэку къыщIэзыгъэкIхэм я лъэIу тхылъ зыбжанэ къытIэрыхьакIэщ».
Губернаторым цIыхухэр къыхуриджащ къэралыр зыхуэныкъуэ, нэгъуэщIыпIэ кърашу щыта хьэпшыпхэм нэхъ жыджэру елэжьын щIадзэну. IэмалыщIэхэр Урысеймрэ Мэзкуу и Iэгъуэблагъэмрэ къыщысэбэпын хуейщ, хамэ къэрал щэхуэгъухэм сыт ягу къэкIыну пIэрэ жытIэу, дымыгузавэу.
Хамэ къэралхэм къыщащэхуу щытам и пIэ иувэн хьэпшып, Iэмэпсымэ зыщI IуэхущIапIэхэм щIыр зэдауэ хэмыту сом закъуэкIэ иратыным къыщымынэу, Мэзкуу областым щылажьэхэм дэчыхышхуэ хуащIынущ. Псалъэм папщIэ, кредитхэмрэ хэхыпщIэхэмрэ щатыжыну пIалъэр хуагъэIэпхъуэнущ. УнафэщIхэмрэ банкхэмрэ абы теухуауэ зэгурыIуэныгъэ мыгувэу зэращIылIэнущ.
