УФ-м и Президент Путин Владимир иджыблагъэ Москва щригъэкIуэкIащ къэралым хыхьэ щIыналъэхэм социально-экономикэ унэтIыныгъэхэмкIэ защIэгъэкъуэным щытепсэлъыхьа селектор зэIущIэ. Абы и лэжьыгъэм хэтащ КъБР-м и Iэтащхьэ КIуэкIуэ Казбек.
ЗэIущIэр къыщызэIуихым къэралым и УнафэщIыр къытеувыIащ Урысей Федерацэм Украинэм и щIыналъэхэм IэщэкIэ зэщIэузэда дзэхэр хэту щригъэкIуэкI операцэ хэхам ипкъ иткIэ дуней псомрэ ди хэкумрэ щыщыIэ политикэ, социально-экономикэ щытыкIэм. Абы къыхигъэщащ а Iуэхугъуэм и мурад нэхъыщхьэр Донецк, Луганск цIыхубэ республикэхэм я хуитыныгъэр хъумэныр, Урысей Федерацэм и щIыпIэ псоми шынагъуэншагъэ къыщызэгъэпэщыныр арауэ зэрыщытыр.
- Къэбэрдей-Балъкъэр Республикэм деIыгъ къэралым и пашэм ищIа апхуэдэ унафэр. Дэ нэсу зэхыдощIыкI а Iуэхугъуэхэр Iэмалыншэу зэрырагъэкIуэкIыр, апхуэдэуи къыдгуроIуэ мы зэманым дызыхэт экономикэ зэпэщIэувэныгъэм дызригъэувэ жыпхъэхэри. Апхуэдэ щытыкIэм дыхуэзышахэм я мурадщ ди псэукIэр нэхъыкIэ ящIыну, ди къэралыр къызэтрагъэщэхэну, - щыжеIэ Тelegram-каналым щиIэ напэкIуэцIым КIуэкIуэ Казбек. - А псори къилъытэри, Путин Владимир къыхилъхьащ къэралым и цIыхухэм, щIыналъэхэм, экономикэм, хьэрычэтыщIэ IэнатIэм, нэгъуэщI IуэхущIапIэхэми зэрадэIэпыкъуным ехьэлIа Iуэхугъуэ куэд. Дауи, абыхэм я мыхьэнэр къыпхуэмылъытэным хуэдизу инщ иджыпсту. Къэрал унафэщIым игъэбелджыла къалэн псори къызыхуэтыншэу дгъэзэщIэныр япэу зэфIэтхын хуей ди къалэн нэхъыщхьэхэм ящыщщ. Къапщтэмэ, а унафэхэм ящыщщ лэжьапщIэ нэхъ мащIэ дыдэм, цIыхур псэун папщIэ зыхуеину ахъшэм, бюджет лэжьакIуэхэм я улахуэм, социальнэ и лъэныкъуэкIэ ятхэм хэгъэхъуэныр. Апхуэдэу дэIэпыкъуныгъэ ягъуэтынущ бын зиIэ унагъуэхэм, лэжьыгъэ IэнатIэр зыфIэкIуэдахэм. ЗэхъуэкIыныгъэхэр ягъуэтынущ хьэрычэтыщIэ IэнатIэм, сатум, хьэпшыпхэр къыщIэгъэкIынымрэ ухуэныгъэмрэ ехьэлIа къэрал хабзэ зыбжанэми.
Ди щIыналъэм и Iэтащхьэм къызэрыхигъэщамкIэ, Урысей Федерацэм и Президентым Iэ щIидзащ къэралым социально-экономикэ зэпIэзэрытыныгъэ щыщыIэнымрэ абы щыпсэу цIыхухэр хъумэнымрэ ятеухуа указхэм. А дэфтэрым хэпщIыкIыу хегъахъуэ къэралым хыхьэ щIыналъэхэм я хуитыныгъэхэм. Iэмал къет щIыпIэхэм щыщыщIэ экономикэ, географие щытыкIэхэр, цIыхухэр зыхуей-зыхуэныкъуэхэр къэлъытауэ, абыхэм ехьэлIа унафэхэр къащтэну.
Къэралым и Президент Путин Владимир ищIа апхуэдэ унафэм къегъэлъагъуэ щIыналъэхэм Iуэхухэр щызезыгъакIуэ Iэтащхьэхэм абы дзыхь зэрахуищIыр, апхуэдэуи щыхьэт тохъуэ Урысей Федерацэм щыщыIэ къэрал Iуэху зехьэкIэр лъабжьэ быдэ зиIэу, илъэс куэд лъандэрэ зэтеувауэ, хабзэкIи политикэкIи зэпIэзэрыту зэрыщытым. КъищынэмыщIауэ, абы къегъэлъагъуэ къэралым и щIыналъэ псори зэкъуэту, хэкум и пашэм и унафэм щIэту зэрылажьэр. Апхуэдэ щытыкIэ щытепщэ къэралым Президентым и унафэхэр къанэ щымыIэу икIи къызыхуэтыншэу зэрыщагъэзэщIэнум шэч хэлъкъым.
