Къалэн нэхъыщхьэщ ерыскъыхэкIхэмкIэ къызэгъэпэщыныр

КъБР-м и Парламентым и зи чэзу зэIущIэм зыщытепсэлъыхьа Iуэхугъуэ нэхъыщхьэхэм ящыщщ цIыхум нэхъыбэрэ къащэхум и ­уасэр хамыгъэхъуэнымрэ абыхэмкIэ ири­къуу къызэгъэпэщынымрэ ехьэлIауэ республикэ унафэщIхэм зэфIагъэкIыр.

А Iуэхум цIыхухэр зэрыригузавэр къалъытэри, депутатхэм зэIущIэм ирагъэблэ­гъащ КъБР-м и Правительствэм и УнафэщIым и япэ къуэдзэ Говоров Сергей, Узыншагъэр ­хъумэным ехьэлIа кIэлъыплъыныгъэхэмкIэ федеральнэ IэнатIэм и щIыналъэ фондым и унафэщI Ахматов Алим, КъБР-м промышленностымкIэ, энергетикэмрэ сатумкIэ и министр Iэхъуэбэч Щэмил, КъБР-м мэкъумэш IэнатIэмкIэ и министрым и къуэдзэ Уэдыхь Тимур, Урысейм и антимонопольнэ IэнатIэм и IуэхущIапIэу КъБР-м щыIэм и къудамэм и унафэщI Балъкъэр Залым.
ЗэIущIэр къыщызэIуихым, КъБР-м и Парламентым и УнафэщI Егоровэ Татьянэ къыхигъэщащ къаIэта Iуэхум мыхьэнэшхуэ зэриIэр.
- Ди къэралым къытралъхьа санкцэхэм къаша гугъуехьхэр къызэрызэднэкIыну Iэмал­хэм гулъытэ хэха хуэтщIын хуейуэ зэманым къытхуигъэуващ. КъухьэпIэр зэгурыIуауэ тхуащI лъэ­пощхьэпохэр экономикэм къытемыхьэ­лъэу къанэркъым, - къыхигъэщащ Егоровэм. -­ ­УФ-м и Правительствэм иубзыхуащ санкцэхэр нэхъыбэу зыхэзыщIэнкIэ хъуну IэнатIэхэмрэ ахэр къызэрызэднэкIыну щIыкIэмрэ. Абыхэм хохьэ мэкъумэш IэнатIэр, щIэныгъэр, щэнхабзэр, туризмэр, сатур, медицинэр, хъыбар­егъащIэ технологиехэр, шхапIэхэр. Ауэ псом япэу гу зылъытапхъэр ерыскъыхэкIхэм я шынагъуэншагъэр къызэгъэпэщынырщ.
Санкцэхэр къыщытхуагъэува япэ махуэхэм щыхьэт дытехъуащ уасэхэм зэрыхэхъуэми цIы­хум лейуэ ерыскъыхэкIымрэ хущхъуэхэм­рэ зэрызэбграхми. Иджыпсту Iуэхухэр тIэкIу нэхъыфI хъужащ, арщхьэкIэ сытми дыхуэ­хьэзырын хуейщ. Къыхэзгъэщынут, ди республикэм и мэкъумэш IэнатIэмрэ промышленностымрэ къыщIагъэкIым щIыналъэр зыхуэ­ныкъуэхэмкIэ къызэрызэрагъэпэщыфынур.
Къэралым и мурадщ сом мелард 25-м нэблагъэ хуэгъэкIуатэ кредиту мэкъумэш IэнатIэм елэжьхэм яхуиутIыпщыну. Дегупсысын хуейщ Къэбэрдей-Балъкъэрым и мэкъумэ­шыщIэхэм я Iуэхур зэрадэтIыгъыну щIыкIэм. Ди къэралыр апхуэдэ гъэунэхуныгъэхэм зэман-зэманкIэрэ хэтащ икIи ди фIэщ мэхъу иджыпстуи гугъуехьхэм дызэрыпхыкIыфынур.
Говоров Сергей жиIащ зи гугъу ящI гугъу­-ехь­хэм республикэ унафэщIхэм зэпымыууэ я нэIэ зэрытетыр. Псалъэм папщIэ, КъБР-м и Правительствэм игъэхьэзыращ мэкъумэш IэнатIэм, промышленностым, сатум, щIыуэпс хъугъуэфIыгъуэхэмрэ бжыгъэр зи лъабжьэ зыужьыныгъэмрэ лъэпощхьэпо ямыIэу лэ­жьэныр къызэгъэпэщынымкIэ оперативнэ штаб къызэIу­хыным теухуа проектыр. Ап­хуэ­дэуи къызэрагъэпэщащ республикэм и сату щIапIэхэм уасэм махуэ къэс щыкIэлъыплъ лэжьакIуэ гуп.
2022 гъэм и гъатхэпэр къызэрихьэрэ уасэхэр нэхъыбэу зыхагъэхъуам ящыщщ шейр, фошыгъур, тхъуийр: проценти 10-м къыщы­щIэдзауэ 40-м нэскIэ - щIыналъэ тыкуэ­нышхуэхэм, процент 15 - 20-м нэскIэ - феде­ральнэ сетхэм.
- ЩIакхъуэм, былымылым, кIэртIофым, къэбыстэм, бжьыным, пхъым я уасэхэр я пIэм итщ. Уасэхэм кIэлъыплъын зэрыщIэддзэрэ абыхэм зы процент е тIу фIэкIа хэхъуакъым, - къыхигъэщащ Говоровым. Абы зэрыжиIам­-кIэ, хьэжыгъэм къыхащIыкIхэм я уасэр зэ­пIэзэрыту къэнэн папщIэ, федеральнэ ­бюджетым къыхэкIыу республикэм сом мел­уани 2,4-рэ къыхуигъэкIуащ, промышленностым зыщIигъэкъуэн мурадкIэ.
УФ-м Промышленностымрэ сатумкIэ и министерствэм федеральнэ сату щIапIэхэм зэгурыIуэныгъэ ярищIылIащ, цIыхур нэхъыбэу зыхуэныкъуэхэм тралъхьэр проценти 5-м фIамыгъэкIыну. Абыхэм ящыщщ «Магнит» (тыкуэну 50), «Пятёрочка» (тыкуэн 17) сату щIапIэ­хэри.
- Къыхэзгъэщыну сыхуейт, коронавирус узыфэм и зэранкIэ дызэрыт щытыкIэри къэлъытауэ, языныкъуэ хьэпшыпхэм щIэуп­щIэшхуэ яIэ зэрыхъуар, ауэ иужьрей тхьэма­хуитIым щытыкIэм зихъуэжащ. Iуэхухэр нэхъ зэпIэзэрыт хъужауэ къыдолъытэ. Хьэп­шыпхэмрэ ерыскъыхэкIхэмрэ ирикъуу диIэщ, зыри дыхуэныкъуэнукъым, - дыщIигъуащ къэпсэлъам.
Гулъытэшхуэ хуащI Къэбэрдей-Балъкъэрым и мэкъумэш IэнатIэм. 2022 гъэми а Iуэхум къэрал дэIэпыкъуныгъэ игъуэтынущ.
Егоровэ Татьянэ къызэхуэсахэр къыхуриджащ хущхъуэхэм я уасэм зэрыхэхъуэм цIыхухэр зэригъэгузавэм гу лъатэну. Ар щIэупщIащ хамэ къэралхэм я хущхъуэхэм ехьэлIауэ щытыкIэр зыхуэдэми.
Узыншагъэр хъумэным ехьэлIа кIэлъы­плъыныгъэмкIэ федеральнэ IэнатIэм Къэбэрдей-Балъкъэрым щиIэ щIыналъэ фондым и унафэщI Ахматов Алим жиIащ ягъэува уасэхэм Росздравнадзорым и нэIэ зэрытригъэтыр. Абы къызэрыхигъэщамкIэ, аптекэхэм хущхъуэхэр зэраIэм теухуауэ щыIэ «линэ пщтырыр» гъатхэпэм и 24 пщIондэ лэжьэнущ. Апхуэдэуи IэнатIэм зэман гъунэгъум аргуэру зэ аптекэхэр къипщытэнущ.
ЗэIущIэм къыщыпсэлъащ «Захуагъэ здэ­щыIэ Урысей - Пэжым и телъхьэ» фракцэм и унафэщI Кебеков Владимир, КъБР-м и Парламентым ЛэжьыгъэмкIэ, социальнэ политикэмрэ узыншагъэр хъумэнымкIэ и комитетым и унафэщIым и къуэдзэ, ЛДПР-м и унафэщI Безгодькэ Владимир, Экономикэ политикэмкIэ, зыужьыныгъэмрэ хьэрычэт IуэхухэмкIэ комитетым и унафэщI Iэпщэ Заур, Мэкъумэш IуэхухэмкIэ, щIыуэпсыр къэгъэ­сэбэпынымкIэ, экологиемрэ дыкъэзыухъу­реихь дунейр ­хъумэнымкIэ комитетым и уна­фэщIым и ­къуэдзэ, «ЩхъуантIэхэр» фракцэм и унафэщI Щхьэгъэпсо Сэфарбий, КПРФ фракцэм и ­Iэтащхьэ Пащты Борис, Жылагъуэ шына­гъуэншагъэмрэ Iулъхьэм пэщIэтынымкIэ ­комитетым и унафэщI Кривко Михаил. Абыхэм къаIэтащ щытыкIэр нэхъыфI зыщIыну программэ зэ­хэгъэувэным епха Iуэхухэр, хамэ къэралхэм къраш джэдылымрэ мэкъумэш ­IэнатIэм къыщагъэсэбэп щIыгъэпшэрхэмрэ дыдейхэмкIэ зэхъуэкIыным ехьэлIауэ щыIэ ­Iэмалхэр, хабзэм къемызэгъыу хущхъуэхэм я уасэхэм ­хэзыгъахъуэхэм зэрыпэщIэтыну щIы­кIэр, нэ­гъуэщIхэри.
Егоровэ Татьянэ зэIущIэм щыжаIар къы­щызэщIикъуэжым къыхигъэщащ къаIэта Iуэ­хухэм я хэкIыпIэхэр къэгъуэтыным ехьэлIауэ депутатхэр дэIэпыкъуэгъу хъуну зэры­хьэ­зырыр.