Шэрэдж районым и медицинэ IуэхущIапIэхэр къепщытэ

КъБР-м узыншагъэр хъумэнымкIэ и министр Къалэбатэ ­Рустам Шэрэдж район администрацэм и унафэщI Кульбаев Алан и гъусэу къипщытащ «Узыншагъэр хъумэнымкIэ IэнатIэм цIыхухэм япэ дэIэпыкъуныгъэ щагъуэт и IуэхущIапIэхэр къэгъэщIэрэщIэжын» проектым ипкъ иткIэ щIыналъэм щрагъэкIуэкI лэжьыгъэхэр здынэсар.

Метр зэбгъузэнатIэ 586,5-рэ хъу, иджырей мардэхэм тету Аушыджэр къуажэм щаухуэ амбулаторэр мыгувэу хьэзыр  ­хъунущ. Абы текIуэда мылъкур, сом мелуан 33-р, федеральнэ бюджетым къыхэкIащ.
Медицинэ IуэхущIапIэр поликлиникэ лэжьэкIэм хуэщIауэ щы­тынущ: махуэм къриубыдэу абы цIыху 35-м Iуэхутхьэбзэхэр щы­хуащIэфынущ, къищынэмыщIауэ, гъуэлъыпIэ 20 щIэту махуэкIэ щызрагъэIэзэ къудамэ иIэнущ. Мыбы цIыхухэм щагъуэтынущ терапие, педиатрие, акушерствэ, гинекологие, хирургие, стоматологие унэтIыныгъэхэмкIэ зыхуеину дэIэпыкъуныгъэхэр.
Министрым къыхигъэщащ гъатхэпэм и кIэм ирихьэлIэу хьэзыр хъун хуей ухуэныгъэм и лэжьыгъэр къэзылъахъэ щымыIэу зэре­кIуэкIым арэзы къызэрищIар.
- Медицинэ IуэхущIапIэщIэр цIыхухэр зыхуэныкъуэ япэ дэIэ­пыкъуныгъэр зэрыщагъуэтыным сыт и лъэныкъуэкIи хуэщIауэ щытынущ. Дэ ди къалэн нэхъыщхьэр а Iуэхум теухуауэ щыIэ проектым къызэригъэувым дытету медицинэ Iуэхутхьэбзэхэм я фIагъым хэгъэхъуэнымрэ ар псоми зэхуэдэу къагъэсэбэпыну Iэмал етынымрэщ, - жиIащ министрым.
Ухуэныгъэ лэжьыгъэхэр зэрызэфIэкIыу, амбулаторэр медицинэ IэмэпсымэхэмкIэ къызэрагъэпэщынущ, абы къегъэщIылIа щIыналъэр зэIузэпэщ ящIынущ. Абы унэтIыныгъэ зэмылIэужьыгъуэхэмкIэ IэщIагъэлI 30-м щIигъу щылэжьэнущ. Къапщтэмэ, ахэр псори щIыпIэм щопсэу икIи нэхъыбэр IэщIагъэлI ныбжьыщIэхэщ.
«Узыншагъэр хъумэнымкIэ IэнатIэм цIыхухэм япэ дэIэпыкъуныгъэ щагъуэт и IуэхущIапIэхэр къэгъэщIэрэщIэжын» проектым хэту Шэрэдж район сымаджэщым и поликлиникэ къудамэу Къэщкъэтау къуажэм дэтым зэгъэпэщыжыныгъэ лэжьыгъэхэр щокIуэкI. А Iуэхуми федеральнэ бюджетым къыхэкIыу сом мел­уан 43-рэ хухахащ.
Мы зэманым къриубыдэу поликлиникэм и щхьэгъубжэхэр, унащхьэр, унэлъэгур, инженер коммуникацэхэр яхъуэжащ. Чэзум щыпэплъэ плIанэпэ щхьэхуэ зыхуей хуэгъэзауэ къызэрагъэпэ­щынущ. Поликлиникэм къекIуалIэхэм я Iуэхур нэхъ тынш зэрыщащIынум тещIыхьауэ ухуэныгъэм зэхъуэкIыныгъэ зыбжанэ ­халъхьэнущ. Апхуэдэу лъы щыхаш, гъуджэ щытрах пэшхэр япэ къатым щыIэнущ, етIуанэмрэ ещанэмрэ участковэ дохутырхэмрэ медицинэм и унэтIыныгъэ щхьэхуэхэмкIэ IэщIагъэлIхэмрэ щылэ­жьэнущ. Жьы хъуахэмрэ зи узыншагъэм къимыхьхэмрэ ­папщIэ лифт ягъэувынущ, щIыхьэпIэм пандус хуащIынущ.
Зэгъэпэщыжыныгъэ лэжьыгъэхэр мы илъэсым къриубыдэу зэфIагъэкIыну я мурадщ.

 

ЩХЬЭЩЭМЫЩI Изэ.
Поделиться: