Бзылъхугъэм гъащIэм щигъэзащIэ мыхьэнэм и инагъыр къыпхуэмылъытэным хуэдизщ. ТхакIуэ дапщэ тетхыхьами, усакIуэ дапщэм усэбзэ дахэкIэ къаIуэтами, иджыри нэсу жаIэфауэ къыщIэкIынкъым цIыхубзым и уасэмрэ и пщIэмрэ. ИтIани, куэд къызэщIиубыдэу IутIыж Борис жиIэфауэ къысщохъу мыр: «ЦIыхубзыр ар цIыху тхьэпэлъытэщ, КъэзыгъэщIыфу къигъэщIащ». Ар шэч къызытумыхьэжынщ.
Иджыпсту дызыхэпсэукI зэманым цIыхубзым политикэм щигъэзащIэ къалэным зэрызиубгъуар умыгъэщIэгъуэн плъэкIыркъым. Я нэхъ акъылыфIэ цIыхухъум бгъурыту цIыхубзми къэрал унафэ ищIыфынущ. Куэдым я щапхъэр и щыхьэтщ политикэ гъащIэм и сыт хуэдэ лъэныкъуэми Iэзагърэ акъыл жанагърэ цIыхубзым къызэрыщигъэлъэгъуар. Ди къэралым куэду щолажьэ бзылъхугъэ-сенаторхэр, бзылъхугъэ-депутатхэр, бзылъхугъэ-министрхэр.
Сэ и гугъу фхуэсщIыну сыхуейщ щIэныгъэрэ IэщIагъэрэ зэригъэгъуэту балигъ гъащIэм зэрыхэбакъуэрэ и сэбэпынагъ къэралым, хэкум иригъэкIыу жыджэру лажьэ Астэжь Франческэ Япон и пхъум. Франческэ Къэрэшей-Шэрджэс Республикэм и Iэтащхьэмрэ Правительствэмрэ я Администрацэм и унафэщIым и къуэдзэщ, КъШР-м и Iэтащхьэмрэ Правительствэмрэ ДокументхэмкIэ къызэгъэпэщынымкIэ управленэм и унафэщIщ.
Зыпэрыт къулыкъур зэрыгугъум, зэрыиным емылъытауэ, Франческэ зиужь ихьэ псор тыншу зригъэхъулIэфу, Iуэхуу зыпэрыхьэр зыхуей хуэзэу къызэригъэпэщыфу апхуэдэщ. Абы папщIэ ббгъэдэлъын хуей псомкIи Тхьэр къыхуэупсащ бзылъхугъэ къызэрымыкIуэм. Ар гупсысэ куу зиIэ цIыху зэпIэзэрытщ, зи псалъэр ялъытэ IэщIагъэлI гумызагъэщ, политикэм, нэгъуэщI куэдым фIыуэ хэзыщIыкI цIыху жыжьаплъэщ.
Франческэ къыщалъхуар Къэрэшей-Шэрджэсми ди къэралми щыцIэрыIуэ Беслъэней къуажэращ. Къыщыхъуа унагъуэри жылэм пщIэ зыхуащIт. Абы и адэ Уэхъутэ Япон Бэвыкъуэ и къуэр (1933 - 2005) илъэс 30-кIэ къуажэ Советым и унафэщIу лэжьащ. И анэшхуэ Хухуэ къуажэ псом щыцIэрыIуэт, абы хуэдэу адыгэ хабзэм фIыуэ хэзыщIыкI нэхъыжь жылэм дэмысауэ яIуэтэж. Нанэ Iущым и куэщI ирипIыкIа Франчески нобэ бгъэдэлъ лъапIэныгъэ псори абы къритауэ жыпIэ хъунущ. И анэ ФатIимэ медицинэм и лэжьакIуэти, зыщIипIыкIар цIыхугъэмрэ гумащIагъэмрэт. Арагъэнщ ар зыгуэр хуэныкъуэ цIыхум дэIэпыкъуну сыт щыгъуи щIэхьэзырыр.
Парт школ нэхъыщхьэм щеджа и адэм тхылъыр и Iэпэгъути, Франческэ зэрыцIыкIурэ тхылъым гу хуищIат. Школым щыщIэсым, ирагъэдж псом къыдэкIуэу, тхылъ куэд щIиджыкIащ пщащэм. Ар къиуха нэужь, хамэ къэрал щэнхабзэхэмрэ бзэхэмрэ хуэнэхъуеиншэти, Псыхуабэ дэт ХамэкъэралыбзэхэмкIэ педагогикэ институтым щIэтIысхьащ. Къиуха нэужь, зэрылажьэм хуэдэурэ адэкIи еджащ. 2003 гъэм абы къиухащ УправленэмкIэ, бизнесымрэ правэмкIэ Псыхуабэ дэт институтыр. Абы иужькIэ УФ-м и Президентым деж щыIэ Къэрал къулыкъущIапIэхэмкIэ урысей академием и щIэныгъэм щыхигъэхъуащ. ПравэмкIэ Саратов къэрал академием Iэзагъэр щыхагъахъуэ курсхэр къыщиухащ. А зэманым къриубыдэу лэжьыгъэ IэнатIэ зыбжанэ зэрихъуэкIащ. 2010 гъэ лъандэрэ Къэрэшей-Шэрджэс Республикэм и Iэтащхьэмрэ Правительствэмрэ я Администрацэм и унафэщIым и къуэдзэщ, КъШР-м и Iэтащхьэмрэ Правительствэмрэ ДокументхэмкIэ къызэгъэпэщынымкIэ управленэм и унафэщI къулыкъум пэрытщ.
Зыпэрыт IэнатIэм зэрехъулIэм и щыхьэтщ абы къыхуагъэфэща щIыхь дамыгъэхэмрэ цIэ лъапIэхэмрэ. Астэжьым къэрал кIуэцI IуэхухэмкIэ майор цIэр зэрехьэ, КъШР-м Къэрал къулыкъущIапIэхэм щIыхь зиIэ и лэжьакIуэщ. Илъэс куэд щIауэ хьэлэлу и IэнатIэм зэрыпэрытым, Къэрэшей-Шэрджэс Республикэм и Iэтащхьэмрэ Правительствэмрэ я лэжьыгъэр къызэгъэпэщыным хэлъхьэныгъэ ин зэрыхуищIам папщIэ Урысей Федерацэм и Федеральнэ Зэхуэсым ФедерацэмкIэ и Советым и щIыхь тхылъыр къыхуагъэфэщащ. Мыхэр бзылъхугъэ гуащIафIэм къыхуащIа щIыхьым и Iыхьэ мащIэщ. Абыхэм ирегъэлъэпIэкI къэзыухъуреихь цIыхухэр къыхуэарэзыуэ дунейм тетыныр. Ар дэIэпыкъуэгъу хуэныкъуэхэр гулъытэншэ зымыщI, гущIэгъу зыхэлъ бзылъхугъэ щыпкъэщ. И лэжьэгъухэр сыт щыгъуи щотхъу Франческэ. «Дунейм, къэралым къыщекIуэкI псоми фIыуэ хэзыщIыкI, зи Iуэхур нэгъэсауэ зыщIэ Франческэ Iуэхур нэхъ тыншу, зыхуей хуэзэу зэфIэзыгъэкI лэжьакIуэ емызэшщ. ЩIэуэ къежьэр зи лэжьыгъэм хэзыпщэфым ехъулIэныгъэ куэд иIэщ. Франческэ апхуэдэщ. Сыт хуэдэ IуэхугъуэщIэ кърихьэжьэми, нэхъыфI ищIу фIэкIа, зэи щыуэркъым. А Iэмалым ди лэжьыгъэр ирегъэфIакIуэри, ипэкIэ дыкIуэтэнымкIэ сэбэп къытхуохъу», - жаIэ абы къыдэлажьэхэм.
И цIэм хуэдэщ и щхьэри. Дахэщ. КъызэрымыкIуэщ. Езым хуэдэ куэдым къахощ. И Iущагъри и лэжьыгъэри нэхъри егъэдахэ адыгэ хабзэр зэриIэпэгъум, къызыхэкIа лъэпкъым зэрыхуэпэжым. Сыт хуэдэ щытыкIэ ихуами зытригъащIэр хабзэрщ, цIыхугъэрщ, адыгагъэрщ. Ахэращ гъуэгу къезытри, и дуней тетыкIэм лъабжьэ хуэхъури.
Зыпэрыт къулыкъумрэ республикэм щызэфIигъэкI Iуэхухэмрэ нэсу къехъулIэн папщIэ зэман куэд хухихми, и унагъуэр гулъытэ щигъащIэркъым. Ар пхъу гумащIэщ, анэ Iущабэщ, унэгуащэ ахъырзэманщ. НыбжьэгъугъэкIи, цIыхугъэкIи, адыгагъэкIи зыхуэдэ щымыIэ бзылъхугъэ гуакIуэщ. Иджырей цIыхубзым и теплъэр, и зэфIэкIыр кърибгъэлъэгъуэну псалъэ лей умылъыхъуэми хъунущ, Астэжь Франческэ и дуней тетыкIэмрэ и IуэхущIафэхэмрэ абыкIэ щапхъэщ.