КъБР-м и Iэтащхьэ КIуэкIуэ Казбек иригъэкIуэкIащ республикэм щыIэ социально-экономикэ щытыкIэм теухуа зи чэзу зэIущIэ. Абы хэтащ КъБР-м и Правительствэм и УнафэщI Мусуков Алий, республикэм и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м щыIэ федеральнэ инспектор нэхъыщхьэ Мэкъуауэ Тимур, министрхэр.
Республикэм и Iэтащхьэм зэIущIэр къыщызэIуихым яхуэгузэващ Къэбэрдей-Балъкъэрым щыщ, Донбассым къыщхьэщыжыным хуэгъэзауэ ирагъэкIуэкI Iуэху щхьэхуэм хэту я къалэн ягъэзащIэу хэкIуэда, дзэм къулыкъу щызыщIэ щIалиплIым я унагъуэхэм икIи къэхъуар егъэлеяуэ и жагъуэ зэрыхъуар жиIащ. ЗэIущIэм хэтхэр хэкIуэдахэм дакъикъэкIэ щыму яхуэщыгъуащ. КIуэкIуэ Казбек пщэрылъ ящищIащ дзэм къулыкъу щызыщIэ щIалэхэм я унагъуэхэм сыт и лъэныкъуэкIи дэIэпыкъуэгъу яхуэхъуну.
ЩIыналъэм и унафэщIым жиIащ Къэбэрдей-Балъкъэрым гуманитар дэIэпыкъуныгъэкIэ Донецк, Луганск цIыхубэ республикэхэм щекIуэкI гузэвэгъуэхэм зи щхьэр къыхэзыха цIыхухэм зэрызащIигъэкъуэнур. Дон Iус Ростов ягъэкIуэнущ етIуанэ автомашинэр, ерыскъыхэмрэ нэхъ зыхуэныкъуэну хьэпшыпхэмрэ илъу.
- Санкцэхэр нэхъ ткIий мэхъу. Къэралыр апхуэдэ щытыкIэ зэрихуэнур, щIыналъэхэми абы къытхуихьынур гурыIуэгъуэт. Урысейм и Президентым Iэ щIидзащ США-м, нэгъуэщI къэралхэм жагъуэгъу щытыкIэ къызэрытхуаIэм къыхэкIыу экономикэ Iэмал щхьэхуэхэр къэгъэсэбэпэным теухуа унафэм. Къэралым и Правительствэм санкцэхэм пэщIэтынымкIэ оперативнэ штаб къызэригъэпэщащ икIи Урысей Федерацэм и цIыхухэр, хьэрычэтыщIэ Iуэхухэр дэIыгъынымкIэ лэжьыгъэ пыухыкIахэр яубзыху. Къыпэубыдыныгъэхэр иджы зыхуэгъэзар цIыху щхьэхуэхэракъым, атIэ къэралым щыпсэу псоми зэран яхуэхъунущ. Абы къыхэкIыу икIэщIыпIэкIэ щытыкIэр зыхуэдэр зэпкърытхыу, щIыналъэм и экономикэр къэмытIэсхъэным хуэунэтIа хэкIыпIэхэр къэдгъуэтын хуейщ. Шэч хэмылъу, дыщIэгузэвэн Iуэхум хэлъщ, - жиIащ КIуэкIуэ Казбек.
АдэкIэ зэIущIэм щытепсэлъыхьащ коронавирус узыфэ зэрыцIалэм зыщиубгъу лъэхъэнэм узыншагъэр хъумэнымкIэ IэнатIэм и лэжьыгъэр къызэрызэгъэпэщам. КъБР-м узыншагъэр хъумэнымкIэ и министр Къалэбатэ Рустам къыхигъэщащ узыфэ зэрыцIалэр зыпкърыт сымаджэхэр нэхъ мащIэ зэрыхъур. Абы зэрыжиIэмкIэ, иужьрей тхьэмахуэм ар процент 36-кIэ ехуэхащ, госпиталхэм ягъэгъуэлъхэм, «ДэIэпыкъуэгъу псынщIэр» къызэрыраджэм я бжыгъэри фIыуэ нэхъ мащIэ хъуащ. Мы зэманым узыфэ зэрыцIалэм щеIэзэ госпиталхэм гъуэлъыпIэ 780-рэ щIэтщ, абыхэм ящыщу яубыдар 651-рщ. Реанимацэхэм сымаджэ 76-рэ щIэлъщ. Амбулаторэ кIэлъыплъыныгъэм щIэтщ цIыху мини 7-м нэблагъэ. Мы илъэсым и мазитIым къриубыдэу хущхъуэкIэ къызэрагъэпэщащ коронавирус узыфэ зэрыцIалэр япкърыту унэм зыщызыгъэхъуэжа сымаджэ мин 22-м щIигъу. Республикэм эпидемие щытыкIэр нэхъыфI зэрыщыхъуам къыхэкIыу, КъБР-м Узыншагъэр хъумэнымкIэ и министерствэм зэман гъунэгъум къриубыдэу зэхуищIыжынущ Налшык къалэ клиникэ сымаджэщ №1-м узыфэ зэрыцIалэ шынагъуэм щеIэзэ и госпиталыр, апхуэдэуи нэгъуэщI узыфэхэр зиIэ сымаджэхэм нэхъ хуиту кIэлъыплъын щIадзэжынущ.
КIуэкIуэ Казбек къыхуриджащ хущ- хъуэр къэщэхуным ткIийуэ кIэлъыплъыну, псом хуэмыдэу лышх узыфэр зиIэ сымаджэхэр зыхуэныкъуэм гулъытэ нэхъ хуащIыну. БлэкIа илъэсым и кIэм щIыналъэм и Iэтащхьэм и унафэкIэ республикэ бюджетым къыхэкIыу а Iуэхум сом мелуан 600 хухахащ. Къалэбатэ Рустам зэрыжиIамкIэ, зыхуэныкъуэ хущхъуэхэр къащэху, абыхэм ящыщ зы Iыхьэ медицинэ IуэхущIапIэхэм яIэрыхьащ. Апхуэдэу абы къыхигъэщащ, препаратхэм ящыщ зыкъом фармацевт IуэхущIапIэхэм зэрыщамыгъуэтыр, хэкIыпIэхэр къалъыхъуэу УФ-м Узыншагъэр хъумэнымкIэ и министерствэм, къищынэмыщIауэ, хущхъуэхэр къыщIэзыгъэкIхэмрэ ахэр зезыгъакIуэхэмрэ зэрызэпащIар. Аптекэхэр хущхъуэкIэ къызэрызэгъэпэщам и гугъу щищIым, министрым жиIащ а Iуэхур тэмэму зэрызэтеублар.
КIуэкIуэ Казбек къыхигъэщащ иужьрей махуэхэм республикэм и цIыхухэр урысей банкхэм санкцэхэр зэран къахуэхъункIэ щыIэ шынагъуэхэм зэригъэгузавэр. Мусуков Алий жиIащ цIыхухэм жыджэру банкхэм щаIэ ахъшэ хэлъхьэныгъэхэр къызэрыхахыжым теухуауэ щыIэ зэрыхьзэрийр социальнэ напэкIуэцIхэм къыщрахьэкI хъыбар нэпцIхэм къызэрашар, иджыпсту ар нэхъ мащIэ зэрыхъуар. «Дэтхэнэми банкым къыхахыжыну къагъэлъэгъуа ахъшэр яIэрыхьэжащ», - къыхигъэщащ абы.
- Экономикэ щытыкIэр щызэIыхьэ, санкцэ унафэхэр къыщежьэ лъэхъэнэхэм валютэхэм епха Iуэхухэр ебгъэкIуэкI, уи мылъкумкIэ шэсыпIэ уихьэ хъунукъым. ЛъапIэу къэпщэхуа валютэр, къэралым щытыкIэр зэпIэзэрыт щыхъужмэ, пудыбзэ хъужынущ. Гужьеигъуэм зебгъэубыд хъунукъым. Урысей Федерацэм нобэ иIэ дыщэ гъэтIылъыгъэм къэралым Iэмал къритынущ илъэс зыбжанэкIэ и финанс системэр зэпIэзэрыту екIуэкIыну, - жиIащ КIуэкIуэ Казбек.
Республикэм и бэзэрхэм къыщекIуэкI Iуэхухэми щытепсэлъыхьащ зэIущIэм. Къэбэрдей-Балъкъэр Республикэм промышленостымкIэ, энергетикэмрэ сату IуэхухэмкIэ и министр Iэхъуэбэч Щамил и гугъу ищIащ абы щекIуэкI уасэхэр зыхуэдэм махуэ къэс зэрыкIэлъыплъым. ИджыпстукIэ хьэпшыпхэри ерыскъыхэкIхэри зэпэубыдакъым, уасэхэри егъэлеяуэ дэуеякъым. Ауэ министрым къызэригъэлъэгъуамкIэ, Краснодар, Ставрополь крайхэм щыщу зыдэлажьэ хьэрычэтыщIэхэм хъыбар кърагъэщIащ я хьэпшыпхэм я уасэхэм хэхъуэнкIэ зэрыхъунум теухуауэ. Iэхъуэбэч Щамил жиIащ ФАС-мрэ МВД-мрэ я лIыкIуэхэр хэту уасэхэм кIэлъыплъ штаб къызэрызэрагъэпэщар. Хабзэм къемызэгъыу уасэр дэзыгъэуейхэм яхуэгъэзауэ штабым иIэ хуитыныгъэм тещIыхьауэ унафэ пыухыкIахэр ищIынущ.
КъБР-м и Iэтащхьэм пщэрылъ ящищIащ ткIийуэ а Iуэхум кIэлъыплъыну, псом япэрауэ, ерыскъыхэкIхэмрэ япэу зыхуэныкъуэ хьэпшыпхэмрэ я уасэр къемызэгъыу дэмыгъэуеиным.
- Хамэ къэрал ахъшэхэр зэрыхэхъуэм папщIэ цIыхухэм зэуэ техникэхэр къащэхун щIадзащ - я мылъкур абы халъхьэу. Ар захуагъэкъым. Азиатхэм къыщIагъэкIахэр щыIэщ, абыхэм я техникэхэр куэду къытIэрохьэ. Апхуэдэ хьэпшыпхэр зэщIэпщэхуэныр Iэмалыншагъэкъым, - жиIащ КIуэкIуэ Казбек.
ЩIыналъэм и унафэщIым Iуэхугъуэ нэхъыщхьэу я нэIэ зытетын хуейуэ къыхигъэщащ ерыскъыпхъэ шынагъуэншагъэр, псом хуэмыдэу мэкъумэш хозяйствэм и лъэныкъуэкIэ.
- Мэкъумэш хозяйствэм щылажьэхэм дэIэпыкъуэгъу дазэрыхуэхъуфыну Iэмал псори къэгъэсэбэпын хуейщ, - къыхигъэщащ КIуэкIуэ Казбек. - Абы и лъэныкъуэкIэ дыщогугъ къэрал къулыкъущIэхэм унафэ пыухыкIахэр къащтэну. Гъатхасэ Iуэхухэр къызэпымыудыным ди къару псори етхьэлIапхъэщ.
КъБР-м мэкъумэш хозяйствэмкIэ и министр Сыжажэ Хьэсэн зэрыжиIамкIэ, Iуэхур ткIийуэ я нэIэм щIэтщ, министерствэм, агропромышленнэ комплексхэм, щIыналъэ администрацэхэм, а унэтIыныгъэмкIэ щыIэ щIэныгъэ IуэхущIапIэхэм я лIыкIуэхэр зыхэт оперативнэ штаб къызэрагъэпэщащ. Мы зэманым бжьыхьэсэ къэкIыгъэхэм щIыгъэпшэр щIалъхьэ, гъатхасэми щIадзащ. ЖылэкIэ ирикъуу къызэгъэпэщащ, ахэр щыIэ мардэхэм тету нэхъапэкIэ зэрагъэпэщат. КъэкIыгъэхэр зэрытхъумэн, дазэрыкIэлъыплъын IэмалхэмкIи дыкъэзылъахъэ щыIэкъым.
- Дэтхэнэ метр зэбгъузэнатIэми зыгуэр хэсауэ щытыпхъэщ. Зыгуэрым жылэ иримыкъуауэ, нэгъуэщIым щIыгъэпшэр зэримыгъэпэщыфауэ псалъэмакъхэм хуэдэ щыIэн хуейкъым. Санкцэхэм емылъытауэ, мэкъумэшхэкIыу нэхъыбэ къыщIэдгъэкIыныр ди къалэнщ, - жиIащ щIыналъэм и Iэтащхьэм.
Лъэпкъ проектхэр гъэзэщIа зэрыхъум и гугъу щищIым, КIуэкIуэ Казбек хэкъузауэ къыхигъэщащ къэрал пщэрылъхэр псори гъэзэщIауэ зэрыщытыпхъэр. КъБР-м транспортымрэ гъуэгу хозяйствэмкIэ и министр ДыщэкI Аслъэн жиIащ мы илъэсым гъуэгу ухуэныгъэхэм сом меларди 3,9-рэ зэрыхухахар. Псори зэхэту республикэм объект 60-м лэжьыгъэхэр щекIуэкIынущ - ар гъуэгу километри 170-рэ мэхъу. ЩIыналъэ мыхьэнэ зиIэ гъуэгухэр зэгъэпэщыжыным сом мелуан 850-м нэблагъэ хухахащ, а Iуэхум хуэунэтIауэ апхуэдиз мылъку иджы япэу къаIэрыхьэу аращ.
КъБР-м и Iэтащхьэм и унафэкIэ республикэм и къалэ цIыкIухэми дэIэпыкъуныгъэ ягъуэтынущ. Тэрч, Май къалэхэм я уэрам нэхъыщхьэхэр, лъэс зекIуапIэхэр, гъуэгу зэпрыкIыпIэхэр зэрагъэпэщыжынущ. КъыкIэлъыкIуэ илъэсхэм апхуэдэ лэжьыгъэхэм къыщыпащэнущ республикэм и адрей къалэ цIыкIухэми.
КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим тепсэлъыхьащ лъэпкъ проектхэм хэту ирагъэкIуэкI ухуэныгъэ, зэгъэпэщыжыныгъэ лэжьыгъэхэм. Абы къызэрыхигъэщамкIэ, курыт еджапIэу 7, социальнэ объект зэхуэмыдэхэр яухуэну къапэщылъщ. «НэхъапэкIэ едгъэжьа лэжьыгъэхэр зэрыдубзыхуам тету йокIуэкI, - къыхигъэщащ министрым, - ауэ шынагъуэ щыIэщ ухуэныгъэм етхьэлIэну языныкъуэхэр тэмэму дымыгъуэтынкIэ».
- Экономикэм къыщыхъу дэтхэнэ зы зэхъуэкIыныгъэми псынщIэу гу лъыттэн, псоми хэкIыпIэ къыхуэдгъуэтын хуейщ. Экономикэм, егъэджэныгъэм, узыншагъэр хъумэн IэнатIэм, щIыналъэ мыхьэнэ зиIэ адрей унэтIыныгъэхэми зэпыуныгъэ гуэри къыщыдгъэхъу хъунукъым. Ди экономикэр нэхъ зэпIэзэрыту къэнэнущ, сыт щхьэкIэ жыпIэмэ, дэ диIэщ мэкъумэш хозяйствэр, туризмэр, къищынэмыщIауэ, проект куэдыр зэрыдгъэзэщIэн мылъку бюджетым щыхэхащ. Дызэрылэжьам хуэдэу адэкIи едгъэкIуэкIынущ, ди Iуэхур нэхъыфI щыхъу IэнатIэхэри диIэу, - жиIащ КIуэкIуэ Казбек.