ЦIыху щIыкIафIэ, уэрэджыIакIуэ цIэрыIуэ

Урысейм ис лъэпкъхэм я Артиадэм и лауреат, Музыкэ театрым и солисткэ Мамбэт Мадинэ хуэдэщ «и IэщIагъэм къыхуигъэщIащ» зыхужаIэр. Оперэ уэрэд жыIэнымкIэ дунейпсо, урысейпсо, щIыналъэ зэпеуэхэм мызэ-мытIэу бжьыпэр щиубыдащ бзылъхугъэ макъыфIэм.
- Роль хэплъыхь сщIыркъым, дэтхэнэми щIэщыгъуагъ хэлъу къызолъытэри, къысхуагъэлъагъуэр къызощтэ. Псалъэм папщIэ, зэхуэдэу сфIэгъэщIэгъуэну согъэзащIэ хьэкIэкхъуэкIэхэми уд фызыжьми я ролхэр, жеIэ абы.
Иджы иIэ ехъулIэныгъэхэм хуэкIуэн папщIэ музыкэ школым фортепианэмкIэ классыр, музыкэ училищэм хоровой дирижированиемкIэ классыр, ГъуазджэхэмкIэ Кавказ Ищхъэрэ къэрал институтым уэрэд жыIэнымкIэ и къудамэр къиухащ Мадинэ.
Зи макъ дахэмкIэ, артист IэзагъэмкIэ дызыгъэгуфIэ Мамбэт Мадинэ и IэнатIэр къыхихыным тезыгъэгушхуар и анэращ.
- Сыт хуэдэ Iуэхуми нэхъапэ си анэращ тегушхуэр. Зэпэшэчауэ псоми егупсыс си анэр арэзымэщ си мурадым сыщытегушхуэр, - жеIэ Мадинэ.
Училищэр къыщиуха гъэм Къэрал телерадиокомпанием и хорым ирагъэблагъэри, I997 гъэ пщIондэ абы щылэжьащ. Радиом и хорыр зэбграутIыпщыкIыжа иужь, Музыкэ театрым и хорым кIуащ, 2005 гъэ хъуху абы хэтауэ, и зэфIэкIхэр къалъытэри, солист ящIащ.
Музыкэ театрым лэжьэн щыщIидза къудейм Штраус Иоганн и «Дзы-гъуэнэф» опереттэм и роль нэхъыщхьэр, Розалиндэ ейр, къыхуагъэфэщат. КъахыхьагъащIэ ¬хъы¬джэбзым а ролыр режиссёр Сафаровэ Тамарэ
къыщыхуигъэлъагъуэм щыуатэкъым. Ар зыгъэзащIэу щыта Бесчокъуэ Майе чэнджэщ щхьэпэхэмкIэ къыдэIэпыкъуурэ зэрытригъэгушхуар иджыри и гуапэу жеIэж артистым. Роль хьэлэмэтым жэуаплыныгъэ пылъу бгъэдыхьа хъыджэбзым ар екIуу къехъулIэри, а лъэбакъуэ дахэмкIэ театр бжэщхьэIум ебэкъуауэ щытащ.
- Нобэр къыздэсым апхуэдэу фIыуэ слъэгъуа роль сиIэкъым, театрыр зэрызрагъэпэщыж лъандэрэ ар дгъэлъэгъуакъыми, си нэ къыхуокI, - жеIэ Мадинэ.
Абы къыкIэлъыкIуащ Леонка¬валлэ Руджерэ и «Паяцы» оперэр, «Севастопольский вальс» опереттэр, нэгъуэщIхэри. Дэтхэнэ зы ролми и къару псори езыхьэлIэ Мамбэтым дапщэщи Iэгуаушхуэхэр хуаIэт.
Сыт хуэдэ бзылъхугъэ нэсми хуэдэу, Мадинэ и хъуэпсапIэхэр псом япэ и унагъуэращ зэхьэлIар. Абы къыкIэлъыкIуэущ лэжьыгъэм, нэгъуэщI Iуэхухэм я гугъу щищIыр. Дыхуейщ уэрэджыIакIуэр зыщIэхъуэпс псори къехъулIэу, ефIакIуэу иджы¬ри илъэс куэдкIэ и макъ дахэмкIэ дигъэгуфIэну.

Щомахуэ Залинэ.
Поделиться: