Iэлъын

ЛIы Iущ гуэрым деж щIалэщIэ къэкIуащ.

-Сыночэнджэщыну сыхуейщ. Си гъащIэр зыми щымыщу къысщохъу, куэдрэ сэр щхьэкIэ жаIэу зэхызох зыми сримыщIысу… Сыт сщIэнур?

ЛIы Iущыр щIалэщIэм къыхуеплъэкIри,

- Къысхуэгъэгъу, ауэ иджыпсту сэ зэман сиIэкъым. Сэбэпи сыпхуэхъуфыну къыщIэкIынукъым, - жиIащ.

ИтIанэ тIэкIу зиIэжьэри дыщIигъужащ:

- Ауэ сэри зы Iуэху блэкI сиIэщи, абыкIэ укъыздэIэпыкъумэ, сэри сэбэп сыпхуэхъужынщ.

КъэкIуар арэзы щыхъум, лIы Iущым и Iэлъыныр зыIэрихыри къыхуишиящ:

- Мы Iэлъыныр сщэуэ си щIыхуэ сыпшыныжын хуейщи, зэман сиIэкъым. ЗыщIыпIэ хьыи схуэгъэлъагъуэ. Нэхъ щэхуакIуэ жумарт дыдэр къысхуэгъуэт, ауэ йомыщэ Iэлъыныр. Къэгъэзэжи, сэ къызжеIэ уазэрыгурыIуэр. Iэлъыныр зы дыщэ ахъшэ нэхъ мащIэкIэ сщэнукъым. Ари уигу игъэлъ.

ЩIалэщIэр бэзэрым кIуэри Iэлъыныр игъэлъэгъуащ. ЩэхуакIуэхэр къыбгъэдыхьэурэ Iэлъыныр зэпаплъыхьырт, къыщIэупщIэрт, ауэ и уасэр зэрызэхахыу, хэт къыщыдыхьэшхырт, хэт IупщIэ ищIырти IукIыжырт. ЩэхуакIуэхэм ящыщщ зым къыжриIащ:

- Уа щIалэ, мы Iэлъыным дыжьын ахъшэ нэхъыбэ къыпхущIэхынукъым, лейуэ къызэхомыкIухь бэзэрыр.

ЩIалэщIэм лIы Iущым деж къигъэзэжащ:

-Уи лъэIур згъэзэщIэн схузэфIэкIакъым. Iэлъыныр дыщэ ахъшэ имыуасэу къызжаIащ, бэзэрым сыщыIати.

-Бэзэрым пхьыуэ пщэн и пэ къихуэу, Iэлъыным и уасэр гъущI лъапIэхэмрэ мывэ лъапIэхэмрэ елэжь IэпщIэлъапщIэм деж пхьырэ жебгъэIамэ мынэхъыфIу пIэрэт…

ЩIалэм апхуэдэу ищIащ. IэпщIэлъапщIэм Iэлъыныр зэпиплъыхьащ, зэпилъэщIыхьащ, тэрэзэ цIыкIукIэ ишэчащ. ИтIанэ щIалэм зыкъыхуигъэзащ:

- Мыр къозыгъэхьам схужепIэнур мыращ: уи Iэлъыным сэ къэсщэхуну сехъуэпсащ. Ауэ абы иджыпсту щIэстыфыну сиIэр дыщэ ахъшэу 58-рэщ. Езы Iэлъыныр дыщэ ахъшэу 70 и уасэщ. АпщIондэхукIэ зыми иримыщэу къызэжьэфынумэ, хуэфащэр зэхуэсхьэсынщи, сэ къэсщэхунщ.

ГуфIэу лIы Iущым деж къигъэзэжри, хуиIуэтэжащ къыжриIар.

-Иджы мыдэ къэдаIуэ,- жиIащ лIы Iущым. - Мы Iэлъыным и уасэр бэзэрым тетхэм къагурыIуакъым. Мыхьэнэ иратакъым. АтIэ, щхьэ бэзэрым ар бгъэлъагъуэу утетын хуейт? Абы и лъапIагъыр нэсу къызгурыIуэнурщ зэбгъэлъэгъупхъэр. Уэри аращ, япэ къэсым къыпхужиIэм уи Iуэху томыщIыхь.

 

ЗэзыдзэкIар Гугъуэт Заремэщ.
Поделиться:

Читать также:

25.03.2024 - 15:30 Си жэнэт
21.03.2024 - 11:30 Ахъмэт и фо изщ