КъБР-м и Iэтащхьэ КIуэкIуэ Казбек иригъэкIуэкIащ республикэм и Правительствэм хэтхэмрэ щIыналъэ администрацэхэм я Iэтащхьэхэмрэ зыхэта зэIущIэ. Абы нэхъыбэу щытепсэлъыхьащ Донецк, Луганск цIыхубэ республикэхэм я цIыхухэу зи псэупIэр IэмалыншагъэкIэ IэщIыб зыщIахэм ядэIэпыкъун зэрыхуейм ехьэлIа Iуэхугъуэхэм.
- Ди къэралым и Президент Путин Владимир мыхьэнэшхуэ зиIэ унафэхэр къищтащ Донецк, Луганск цIыхубэ республикэхэм шынагъуэншагъэр щыхъумэным теухуауэ, атIэми, ахэр хуэунэтIащ Урысей Федерацэми шынагъуэншагъэ къыщызэгъэпэщыным, - зэхуэсыр къыщызэIуихым жи- Iащ КIуэкIуэ Казбек. - Фашизмэр зищIысыр зыми лейуэ къыгурыгъэIуэн хуейкъым. Псори фыщыгъуазэщ 1941 - 1945 гъэхэм екIуэкIа Хэку зауэшхуэм и тхыдэм. Ди къэралым и Президентым къищта унафэхэу дызытепсэлъыхьхэр хуэгъэпсащ ди хэкум, нэгъуэщI щIыналъэхэм къихъуэну щIэблэхэм я шынагъуэншагъэм, зэIузэпэщыныгъэм. Си фIэщ мэхъу иджыпсту хамэ щIыпIэхэм щекIуэкI Iуэху мыщхьэпэхэм дуней псор гузэвэгъуэм зэрыхадзэр. Фашизмэм и купщIэри аращ - цIыхубэр зэрыщыту гъэкIуэдыным епха шынагъуэщ. Абы къыхэкIыу къызолъытэ къащта унафэ псори тэмэму, захуагъэмрэ пэжыгъэмрэ я телъхьэу. Къэбэрдей-Балъкъэрым и цIыхубэм даIыгъ Урысей Федерацэм и Президентым и унафэхэр.
АдэкIэ КIуэкIуэр къытеувыIащ Донецк, Луганск цIыхубэ республикэхэм ящыщу зи лъахэр Iэмалыншэу зыбгынахэм дадэIэпыкъун зэрыхуейм. Абы фIыщIэ яхуищIащ Къэбэрдей-Балъкъэрым и цIыхухэм ящыщу къэхъуа гузэвэгъуэм лъэныкъуэегъэз зыхуэзымыщIахэм, зи псэупIэр хыфIэзыдзэу зи псэр гъунэгъу къэралым къэзыхьахэм ядэIэпыкъун хуейуэ жэрдэм зыщIахэм. Псом хуэмыдэу гуапэ щыхъуащ нэгъуэщI щIыпIэхэм апхуэдэ гузэвэгъуэкIэ къикIахэр зэзышэлIэну, я унэхэм щагъэпсэуну хьэзыр куэд ди республикэм зэрисыр.
Волонтёрхэм я гугъу ищIу, КIуэкIуэм къыхигъэщащ абыхэм гууз-лыуз зэраIэр. А зэщIэхъееныгъэм хэт щIалэгъуалэм ящыщ куэд хьэзырщ ди деж я псэр къэзыхьа цIыхухэм ядэIэпыкъуну, ахэр пIалъэкIэ щыпсэу екIуэлIапIэхэм щылэжьэну.
- Мис аращ хэкум и цIыху нэсым иIапхъэ Iуэху еплъыкIэр, - къыхигъэщащ республикэм и Iэтащхьэм. - Къэбэрдей-Балъкъэрым и цIыхубэр а Iуэхум апхуэдэу зэреплъым мыхьэнэшхуэ иIэщ ди республикэми Урысей Федерацэми я дежкIэ. Я псэупIэхэр гузэвэгъуэкIэ зыбгынэхэм папщIэ дгъэхьэзыракIэщ цIыху 800 зыщIэхуэн псэупIэ зэмылIэужьыгъуэхэр. Апхуэдэуи оперативнэ штаб къызэдгъэпэщащ, абыхэм гуманитар дэIэпыкъуныгъэ етыным теухуа Iуэхухэр зэфIагъэхьэныр я пщэрылъу. А цIыхухэр Iэмалыншэу зыхуеину хьэпшыпхэр зэрылъ апхуэдэ зы машинэ дутIыпщакIэщ. ЕтIуанэм ишэнущ сабийхэм папщIэ хьэпшып цIыкIухэр. Псапэ ин зыпылъ а лэжьыгъэм пытщэнущ. Ди республикэм щыпсэухэр дапщэщи гурэ псэкIэ пэджэжу щытащ къуэшым, гъунэгъум я гузэвэгъуэм. Иджыри аращ: псэзэпылъхьэпIэм ихуа цIыхухэр гулъытэншэу къэдгъэнэн тхузэфIэкIынукъым.
Зэхуэсым щытепсэлъыхьащ нэгъуэщI Iуэхухэми. ЩIыналъэм и унафэщIым жиIащ республикэм щыщыIэ эпидемиологие щытыкIэм иджыри къызэрыгуэкIкIэ узэремыджэнур, атIэми, зэпIэзэрытыныгъэм и мардэ гуэрхэри абы зэрыхэплъагъуэри къыхигъэщащ.
- Сымаджэ куэд щыIащ мазаем и 6 - 8-хэм, ауэ иужьрей тхьэмахуэм абыхэм я бжыгъэр нэхъ мащIэ хъуащ процент 38-кIэ, узыр къызэуэлIа сабийхэри хэту, - жиIащ а Iуэхум теухуауэ зэхуэсым къыщыпсэлъа, КъБР-м узыншагъэр хъумэнымкIэ и министр Къалэбатэ Рустам. - Нэхъ мащIэ хъуащ «ДэIэпыкъуэгъу псынщIэр» къызыхураджэхэри, сымаджэщым дгъэгъуэлъхэм я бжыгъэри.
КъБР-м и Правительствэм и УнафэщI Мусуков Алий зэIущIэм щытепсэлъыхьащ лъэпкъ проектхэмрэ къэрал программэхэмрэ ди республикэм зэрыщагъэзащIэм. Абы зэрыжиIамкIэ, ипэкIэ зи гугъу ящIа школыщIэу 10-м (абыхэм ящыщу 3-р яухуэ, адрей 7-м ехьэлIа лэжьыгъэхэри мы гъэм яублэнущ) къыщIагъуащ иджыри курыт еджапIэу 8 яухуэн хуейуэ. Абыхэм епха Iуэхугъуэхэм щытепсэлъыхьакIэщ къэралым и щыхьэрым. А ухуэныгъэхэм иджыри хухахынущ сом меларди 4-м нэс. Дэтхэнэми еджакIуэ 800 щIэхуэну школхэр щаухуэнущ Налшык, Тэрч къалэхэм, Шэджэм ЕтIуанэ къуажэм. Прималкинскэ жылэм дащIыхьынущ сабий 500 зэкIуэлIэну школыр. Апхуэдэу курыт школыщIэхэр щызэфIагъэувэнущ Нарткъалэ (еджакIуэ 400), Шордакъ къуажэмрэ Александровскэ станицэмрэ (еджакIуэ 200), Терскол жылэм (еджакIуи 150-рэ). А школыщIэхэм епха ухуэныгъэ лэжьыгъэхэр 2023 - 2024 гъэхэм зэфIагъэкIынущ.