БзэгуIуантIэ
Къарэкъэтинэрэ Къарэщауэрэ щIыпIэ мыцIыхур щтэIэщтаблэу къаплъыхь.
-Дэнэ дыкъыщыхута, Къарэщауэ? - шынауэ щIоупщIэ Къарэкъэтинэ.
- Сэри сщIэркъым. Ауэ плъагъуркъэ, ди хъуреягъыр мамырщ, умыгузавэ, - хъыджэбз цIыкIум и гур дахэ хуищIыну хэтщ Къарэщауэ.
-НэхъыфIтэкъэ IуэрыIуатэм дыщыIэжатэмэ?
- Сыт щхьэкIэ, уэрати зи жьэр зымыгъэувыIэу сабийхэм я деж хьэщIапIэ дыгъакIуэ жызыIар? Иджы щхьэ ущIегъуэжа?
- СыщIегъуэжакъым, ауэ дауэ ахэр къызэрыдгъуэтынур?
- Сэри сщIэркъым, ауэ дыгъуэщауэ си гугъэкъым.
- Къэдгъуэтми, дауэ къытIущIэну пIэрэ?
- Умыгузавэ икIи умыпIащIэ. Ар къыщытщIэнур дахуэзэмэщ. НакIуэ, мо гъуэгушхуэм дытегъэхьэ.
Къарэкъэтинэрэ Къарэщауэрэ гъуэгушхуэм тету кIуэурэ унэшхуэ гуэрым хуозэ. Ар еджапIэт.
- ДыщIыхьэн? - щIоупщIэ Къарэкъэтинэ.
- СщIэркъым, - жи Къарэщауэ.
Чэнджащэу, зралъэфыхьу щытыху унэшхуэм сабийхэр къыщIэжащ. ЦIыкIуитIым я Iэпэхэр яубыдри щIашащ.
- Фыкъеблагъэ! – къапожьэ абыхэм егъэджакIуэ цIыхубзыр. - Фэ хэт фыхъуну, дэни фыкъикIа?
- Дэ IуэрыIуатэм дыкъыхэкIащ, - жи Къарэщауэ гуфIэжу.
- Ауэ IэнэщIу дыкъыфхуэкIуакъым, - жери Къарэкъэтинэ и сумкэм доIэбэри «БзэгуIуантIэ» жиIэу тету тхылъ цIыкIу къыдех.
Абдежым сабийхэр зэхэтIысхьэри тхылъ цIыкIум ит усэхэм зэIэпахыурэ къеджащ.
-Щ-ЩI-
Щомыщыр къырыщхьэм щощакIуэ,
Мыщэжьыр псы щхьэфэм къытощ.
Щыхь бжьабэр Iуащхьэм щохъуакIуэ,
Псэущхьэр, Дунейр - чэщей щыкъущ.
ЩIыдзыгъуэр щIыунэм щIоплъэ,
ЩIилъагъуэр и гущIэм щIохьэ:
ЩIакIи щIэрыкIуи щIэлъыжкъым,
ЩIыIубыр щIэлъщ щIэпырхъэжу.
ЩIыуэпсыр уэшхыпсым щопщIантIэ,
ЩIыуэпсыр дыгъэпсмэ, мэпсыпс,
ЩIыуэпсыр уэсыпсым щIоупсыIэ,
ЩIыуэпсыр уэ хъуэпскIым дохъуапсэ.
-Л-Лъ-ЛI-
Благъуи блани къеблэгъауэ,
Мэлыр къофэ ислъэмей.
Хьэмбылум и лъейр лъыкъуауэ,
БлапцIэр лъейуэ доцымей.
Си алъпыр жану изогъэлъ,
Бжыхь лъагэм лъейуэ зэпролъ.
Лъэрыхьу бжьэпэм щхьэщолъадэ,
Соку налъэр жьыбгъэм щызолъатэ.
ПлIанэ, плIалэ
ПлIащIэ, плIыщI.
ПлIыми лъабжьэу
ЯIэр плIыщ.
-Дж-
Джэдым жыджэру
Бэджынэ ищIащ.
Бэджынэр яшхыну
Джэдур къриджащ.
ИIыгъыу балыджэ
Бэджыр къыщыджэм,
Джэдым бэджынэр
Бэджэнду итащ.
-ЦI-
Нэмэз пэнцIывым
ПцIащхъуэ пэцIурэм
Шэр игъэпщтащ.
БзуупцIэ къарапцIэм
Кърихри псыпцIэм
ШхупцIатэ къихьащ.
ПцIащхъуэ пэцIурэ
Иритри шхупцIатэ
Шхур игъэпцIащ.
ПцIащхъуи бзуупцIи
ЦIутI къызжамыIэу
Шхур яшхыжащ.
-Жь-
Ужьэм и мажьэр
Жьым ирехьэжьэ.
Ужьэм хьэжьажьэу
Жьыр ирехужьэ:
- Си мажьэ епхьэжьэу
Жьыр уемыжажьэ,
Сыжьгъейми сыужьэщ,
Жьыр унэхъ жьажьэщ.
