Урысей Федерацэм и Правительствэм и унафэм ипкъ иткIэ, 2022 гъэм къыщыщIэдзауэ, щхьэзакъуэ хозяйствэ зезыхьэу я щхьэм хуэлэжьэж щIыкIэу официальнэу зезыгъэтхахэм къэрал дэIэпыкъуныгъэ къратынущ. Хэт икIи сыт хуэдэ щIыкIэу а щIэгъэкъуэныгъэр къыIэрыхьэфынуми ехьэлIа упщIэхэм жэуап къритащ «Урысей Мэкъумэшбанкым» Къэбэрдей-Балъкъэрым щиIэ и къудамэм и унафэщI Сокъур Алим.
- Алим, унафэщIэм сыт и къалэн нэхъыщхьэр?
- Урысей Федерацэм и цIыху къызэрыгуэкIхэм я еплъыкIэмкIэ, зи гугъу тщIы унафэр щIэгъэкъуэн хуэхъунущ щхьэзакъуэ подсобнэ хозяйствэ (ЛПХ) зиIэхэм. Ар сэбэп хуэхъунущ мэкъумэш продукцэр нэхъыбэу къыщIагъэкIыным, рынокыр ди къэралым къыщыщIагъэкIа продуктхэмкIэ гъэнщIа хъуным, къуажэм дэс цIыхухэм я хэхъуэм зиIэтыным.
- Псалъэм папщIэ, сэ ЛПХ сиIэщ. Сыт хуэдэ щIыкIэкIэ къызэрысщIэнур дэIэпыкъуныгъэхэр къысхуэгъэзарэ къысхуэмыгъэзарэ?
- Субсидием и щхьэусыгъуэ нэхъыщхьэу щытыр – ЛПХ зиIэр и щхьэ хуэлажьэу зригъэтхауэ щытынырщ.
- Сыт хуэдэ лIэужьыгъуэ дэIэпыкъуныгъэр зыхуэгъэзар? Сыт хуэдиз ар зэрыхъур?
- Субсидиер хуаутIыпщ щIы зэIухам къыщагъэкIа къэкIыгъэхэм, кIэртIофым, гъэшым, Iэщ гъэхъуным трагъэкIуэда мылъкум щыщ Iыхьэ гуэрым пэкIуэу. Абы къокI ЛПХ зиIэ псоми дэIэпыкъуныгъэр зэрыхуэмыгъэзар. Псалъэм папщIэ, бжьаIуэ уиIэрэ фо пщэмэ, иджырей унафэм къыщыгъэлъэгъуа субсидиер уэ къыплъысынукъым.
ДэIэпыкъуныгъэм и инагъыр щIыналъэ къэс езым щхьэхуэу щагъэувыж.
- ДэIэпыкъуныгъэр зэзгъэпэщын папщIэ дэнэ сыздекIуэлIапхъэр?
- Абы папщIэ щIыпIэ муниципальнэ IуэхущIапIэхэм, псалъэм папщIэ, мэкъумэш хозяйствэмкIэ щыпIэ департаментым е министерствэм. Документ къэбгъэлъэгъуахэм хэплъэмэ, ЛПХ-р дэIэпыкъуныгъэ зратынухэм хатхэнум елъыта унафэ къащтэнущ. Субсидиер зи чэзу къэсым иратурэ ящIынущ.
- Сыт хуэдэ документ абы щхьэкIэ къэбгъэлъэгъуэн хуейр?
- Субсидиер къэрал мылъкуу зэрыщытым къыхэкIыу, къэралыр хуейщ ЛПХ-м пэж дыдэу мэкъумэш хозяйствэм узэрыщытелажьэм щыхьэт техъуэ документхэр. ЛПХ-м тебгъэкIуадэ мылъкур къыщыгъэлъэгъуа тхылъхэр бгъэхьэзырыпхъэщ.
Мардэм иту зэхуэхьэсыпхъэ документхэм къызэщIеубыдэ:
- субсидие къузэратынумкIэ лIэIу тхылъыр;
- ЛПХ-м хэтым и паспортыр;
- налог IуэхущIапIэм зэрызэщригъэтхам щыхьэт техъуэ справкэр;
- субсидие къущатынум ипэ къихуэ мазэ 12-м щIигъуауэ хозяйствэр зэрыбгъэлажьэм щыхьэт техъуэ къыхэтхыкIыныгъэр;
- мэкъумэш продукцэр къыщIэгъэкIынымрэ а унэтIыныгъэм зегъэужьынымрэ текIуадэ мылъкур къыщыгъэлъэгъуа документхэр;
- производствэ IуэхущIапIэм текIуэда мылъкум щыщу субсидиер зыхуэгъэза бжыгъэр.
- Алим, дэIэпыкъуныгъэр зэ зэратыр хьэмэрэ зыбжанэрэ къысIэрыхьэфыну?
- ДэIэпыкъуныгъэр зэратыр зэкъым. Субсидиер зыхуаутIыпща Iуэхугъуэм тэтэму къызэрыбгъэсэбэпар къызэралъытэм теухуауэ ар зыбжанэрэ къыпIэрыхьэфынущ.
