УнагъуэщIэхэм яхуэгъэза гулъытэ

Бахъсэн къалэм и администрацэм и унэм дыгъуасэ зэIущIэ гуапэ щекIуэкIащ. ЩIы­пIэм и унагъуэщIэ зыбжанэм абы щратыжащ соцальнэ дэIэпыкъуныгъэ къэралым къазэрыритым щыхьэт техъуэ дэфтэрхэр. А мылъкумкIэ зэщхьэгъусэхэм псэупIэ унэ хьэзыр къащэхуми уней лъапсэ ирыра­щIыну къагъэсэбэпми хъунущ.

Фигу къэдгъэкIыжынщи, «ПсэупIэ» федеральнэ лъэпкъ проектым и гуэдзэну ди къэ­ралым илъэс зыбжанэ лъандэрэ щолажьэ «УнагъуэщIэхэр псэупIэкIэ къызэгъэпэщын» Iыхьэр. Абы зэрыщIидзэрэ блэкIа илъэс 15-м нэблагъэм къэралым къарит социальнэ дэIэпыкъуныгъэр къагъэсэбэпакIэщ щIыналъэм и унагъуэщIэ 90-м щIигъум, сабий куэд щапI унагъуэу 66-рэ яхэту. Языныкъуэхэм апхуэдэ щIыкIэкIэ я псэукIэр ирагъэфIэ­кIуащ, адрейхэм псэупIэ щхьэхуэ зэгъэ­пэ­щынымкIэ яунэтIащ мылъкур, уней лъапсэ ухуэным хэзылъ­хьаи щыIэщ.
Мы махуэхэм къэрал дэIэпыкъуныгъэ ­ягъуэтащ щIыпIэм и унагъуэщIэу 8-м. Абыхэм ящыщу 6-м сабий куэд щапI.
- Ди гуапэ мэхъу унагъуэщIэхэм апхуэдэ къэрал гулъытэ зэрагъуэтыр. Абы мы­хьэ­нэшхуэ иIэщ унагъуэу тIыса зи щIалэгъуэхэм я гур яфIэмыкIуэду, гушхуэныгъэ яIэу пщэдейрей махуэм хэбэкъуэнымкIэ, лъэ быдэкIэ гъащIэм хэувэнымкIэ, - жеIэ Бахъсэн къалэ администрацэм и Iэтащхьэ Мамхэгъ Хьэчим.
ЩIыпIэ унафэщIым къызэрыхигъэщамкIэ, апхуэдэ лэжьыгъэхэм дяпэкIи пащэнущ икIи 2022 - 2025 илъэсхэм къриубыдэу унагъуэ­-щIэу 40-м иджыри мылъкукIэ зыщIагъэ­къуэфынущ.