Иужь махуэхэм дыкъокIуэтэх

Пекин щекIуэкI ЩIымахуэ Олимп джэгухэр зэрыщIи­дзэрэ япэу махуэку кIуам Урысей Федерацэм и атлетхэр медалыншэу къэнащ, абыхэм пэгъунэгъу дыдэ ­хъуа пэтми.

Псори зэхэту ягъэджэгуат медаль комплекти 8. Ди къэ­ралым и спортсменхэм еп­лIанэ увыпIэу 2 къахьащ - лыжницэ Непряевэ Натальерэ IэжьэмкIэ эстафетэмрэ.
Абы ипэкIэ, мазаем и 9-м шорт-трекымкIэ метр 1500-м и финалым хэта цIыхуипщIым я зэпеуэ гугъум домбеякъ ­медалыр къыщыхитхъащ Со­чэ-2014 Олимп джэгухэм я чемпион Елистратов Семён.
Олимп джэгухэм я медалхэм пэгъунэгъу дыдэ хуэхъуат километри 10-м къыщызэдэжахэм яхэта Непряевэр. Арщ­хьэкIэ домбеякъ къэзыхьам ар къыкIэрыхуащ секунд 0,1-кIэ.
Дуней псом и иджырей чемпион Урысей Федерацэм и фристайлистхэм къехъулIакъым лыжэ акробатикэмкIэ зэ­хьэзэхуэхэр. Уеблэмэ, кIэух зэпеуэхэм ахэр нэсыфакъым.
Апхуэдэ дыдэу, Iэжьэ спортымкIэ эстафетэми медалхэм пэгъунэгъуу щыта ди спортсменхэм я зэфIэкIыр еп­лIанэ увыпIэм къыщыувы-Iащ.
КёрлингымкIэ Урысейм и Олимп Комитетым и цIыхубз командэр зэхьэзэхуэм зэры­щIи­дзэу къыщахигъэщIащ Америкэм и Штат Зэгуэтхэм        я лIыкIуэхэм - 3:9. ЦIыху­хъухэм я гупыр етIуанэ зэIущIэм 7:4-уэ Китайм текIуащ.
ЩIымахуэ Олимп джэгухэм я еханэ махуэм екIуэкIа зэ­хьэзэхуэхэм иужькIэ официальнэу щымыт къэралхэм я медаль зэпеуэм Урысей Федерацэм и атлетхэр зыкIэ ­къеIэбхри ебгъуанэ увыпIэм къыщызэтеувыIащ.
Махуэр медалыншэу къы­зэрырахьэлIам имызакъуэу, ди спортсменхэр къызэре­кIуэ­тэхам щхьэусыгъуэ хуэ­хъуащ иджыри къэс текIуэ­ныгъэ зимыIа США-м зыкъызэрызэкъуахар. МахуитIым къриубыдэу абыхэм дыщэ медалищ зыIэрагъы­хьэри Урысей Федерацэм и атлетхэм ящхьэщыкIащ.
Пекин щекIуэкI ЩIымахуэ Олимп джэгухэр зэрыщIи­дзэрэ медаль бжыгъэхэмкIэ япэ ита ди къэралыр мэрем махуэм ирихьэлIэу еплIанэ хъуащ. Австрием медаль 13, Норвегиемрэ Канадэмрэ 12 яIэу Олимпиадэм и ебланэ махуэм техьащ.
Дыгъуасэ зэхэта зэхьэ­зэ­хуэхэм Большунов Александр дыжьын медалыр къыщихьащ. Фигу къэдгъэкIыжынщи, Пекин щекIуэкI Олимпиадэм ар чемпион щыхъуа-кIэщ. ЩIымахуэ Олимп джэгухэм къыщахьа медаль бжы­гъэхэмкIэ (6!) абы къыпэ­лъэ­щын лыжник зэкIэ щыIэ-къым.
 Абы и фIыгъэкIэ гуп зэ­пеуэм и таблицэм ди атлетхэр зыкIэ къыщыдэIэбеижащ.
ГугъэфIхэр уегъэщI хоккеймкIэ Урысей Федерацэм и командэ къыхэхам. Ди щIалэхэм япэ зэIущIэм Швейцарием и хоккеистхэр 1:0-у хагъэщIащ. КъыкIэлъыкIуэм, мазаем и 11-м, 2:0-у ахэр те­кIуащ Данием текIуащ. Очкоих къэзыхьа ди къэралым и хоккеистхэр и чэзу къэмысу Пекин щекIуэкI ЩIымахуэ Олимп джэгухэм я кIэух зэ­пеуэхэм нэсащ.
Пекин щекIуэкI зэхьэзэхуэм бжьыпэр щаубыдащ Норве­гием и спортсменхэм. Абы­хэмрэ Германием икIахэмрэ дыщэ медалу хырых зыIэ­ра­гъэ­хьащ, арщхьэкIэ скандинавхэм домбекъыу яIэр хуэдитхукIэ нэхъыбэщ.

 

Жыласэ Замир.
Поделиться:

Читать также: