Утыкур зыгъэдахэ Ташло Алий

Зи макъ дахэмкIэ ди республикэм и мызакъуэу нэгъуэщI щIыналъэ куэдми къыщацIыхуа оперэ уэрэджыIакIуэ лъэщщ Музыкэ театрым и солист, Урысей Федерацэм щIыхь зиIэ и артист, Пуччини Джакомэи цIэр зэрихьэу оперэ уэрэджыIакIуэхэм я зэхьэзэхуэ Италием щекIуэкIам и лауреат Ташло Алий. Абы хузэфIэкIамрэ лэжьыгъэу зыхэтамрэ я гугъу къэмынэIауэ сщIынщ жыпIэу уи пщэ дэплъхьэжыныр щхьэгъэпцIэжщ, уеблэмэ къеббжэкIын къудейри гугъущ ахэр апхуэдизкIэ куэд мэхъури.
Лирикэ тенор макъ лIэужьыгъуэр зиIэ, илъэс плIыщIым нэблэгъауэ утыкушхуэм ит адыгэлIыр зэман зэхуэмыдэхэм IуэхущIапIэ зэмылIэужьыгъуэхэм щылэжьащ. Псалъэм папщIэ, сэ сощIэж Дер Вячеслав 2005 гъэм къызэригъэпэщауэ щыта къафэмрэ уэрэдымкIэ уней ансамблым и унафэщI дзыхь къыхуищIу ищIауэ зэрыщытар. Дагъыстэн Республикэм оперэмрэ балетымкIэ и театрым щылэжьащ, Ставрополь щIыналъэ театрымрэ Пятигорск и опереттэ театрымрэ зэгурыIуэныгъэкIэ ядэлэжьащ, губернаторым и театру Ярослав дэтым иригъэкIуэкI опернэ фестивалым уэрэд щыжиIащ, Таллинн концертхэр щитащ. Римский-Корсаков и цIэр зэрихьэу Санкт-Петербург дэт къэрал консерваторэр къэзыуха, КарузэЭнрикэ и студием и лэжьыгъэм зыщыхэзыгъэгъуэза щIалэр Къэбэрдей-Балъкъэрым къызэрыкIуэжыр и егъэджакIуэ-гъэсакIуэхэм яфIэфIтэкъым, «утыкушхуэм къыхуигъэщIа уи макъыр къуажэ гуэркIэ зэрыбгъэкIуэдыжынур дауэ?» къыщыжраIэпаи щыIэт. ИужькIэ Краснодар, Ростов ирагъэблэгъат, а къалэхэм щылажьэмэ я гуапэу, арщхьэкIэ идакъым. Оперэ гъуазджэм ди щIыналъэм зыщригъэужьыфыну къызыщыхъу, и лъэпкъым хуэлажьэмэ нэхъ къэзыщтэ Алий къахутегъэхьакъым, еджапIэр къызэриухрэ къэкIуэжауэ Налшык щолажьэ, щопсэу.
Фигу къэдгъэкIыжынщи, Алий игъэзэщIащ Жермон Альфред (Верди Дж. и «Травиата»), Герцогым (Верди Дж. и «Риголетто»), Ленский (Чайковский П. и «Евгений Онегин»), цыджан щIалэм (Рахманинов С. и «Алеко») я ролхэр, нэгъуэщI куэди.
Иджыпстуи Тэшлор жыджэру пыщIащ гъуазджэ гъащIэм: Музыкэ театрым игъэув лэжьыгъэхэм щIагъуэ яхэткъым абы партие нэхъыщхьэхэм ящыщхэр щимыгъэзащIэу, оперэхэм, опереттэхэм нэмыщI, IуэхущIапIэм утыку кърихьэ псысэхэми и зэфIэкI ирехьэлIэ. Ирагъэблагъэурэ ар щоджэгу гъунэгъу республикэхэми къэралым и къалэшхуэхэми щагъэув спектаклхэм, нэхъыбэу игъэзащIэри куэд зыпэмылъэщ партие гугъухэрщ. Махуэшхуэ пшыхьхэу Къэбэрдей-Балъкъэрым щызэхашэхэм къекIуэлIахэр и макъ дахэмкIэ хьэщыкъ ищIу уэрэд щыжеIэ Алий. Утыку къызэрихьэу хуаIэт Iэгуауэшхуэр. Сэ мызэ-мытIэу слъэгъуащи, сощIэ ар псоми зэрацIыхур, фIыуэ зэралъагъур.
2003 гъэм «Газета Юга» газетым ирита интервью кIэщIым Алий щыжиIауэ щытащ Чайковский Пётр и «Пиковая дама»-м роль нэхъыщхьэр, Герман и партиер, щигъэзэщIэну зэрыхуейр. Ташлом и хъуапсапIэр мыгувэу къехъулIэныр зыхуэкIуа щыIэкъым: Музыкэ театрым игъэувыну и мурадщ а лэжьыгъэшхуэри, зэман кIэщIым къриубыдэу Алий Герман хъуну дыщогугъ. Апхуэдэуи илъэс куэд ипэкIэ театрым и репертуарым хэта, Ташлор щыджэгуа Джузеппе Верди и «Травиата»-р ягъэувыжати, япэм нэхърэ зыкIи мынэхъыкIэу и макъ щигъэIуащ.
Ташло Алий утыкум щхьэкIэ и ныбжьым хуэмыфащэ зылэжьыну цIыхухэм ящыщкъым. Артистым фIы дыдэу къыгуроIуэ щIалэгъуалэм гъуэгу етын зэрыхуейр, я макъми, я утыку итыкIэми ехьэлIауэ ахэр зэрыущиипхъэр. Аращ и концертхэм, зыхэт спектаклхэм нэхъыбэу ныбжьыщIэхэр хишэмэ нэхъ къыщIищтэр, хузэфIэкIIауи къыщIимыгъанэр.
ЦIыху къэс езым и хъуапсапIэ иIэжщ, ар лэжьыгъэ ирехъу, унагъуэм ехьэлIауи щрет. Къэбэрдей-Балъкъэрым и мызакъуэу зи зэфIэкIыр нэгъуэщI щIыпIэ, уеблэмэ къэралхэм нэIуса Ташлом и лэжьыгъэр къызэрехъулIам зыми шэч къытрихьэркъым. Абы къыдэкIуэу, унагъуэ дахэ иIэщ Алий, и хъуапсапIэм и нэхъыфIыр зэхьэлIари, шэч хэмылъу, и къуэ закъуэ Темболэтщ. ЩIалэм и ехъулIэныгъэ дэтхэнэри Алийрэ и щхьэгъусэ Тамарэрэ я дежкIэ гуфIэгъуэщ, гухэхъуэгъуэщ, насыпщи, абы къарит дэрэжэгъуэм зыхагъэпскIыхьу зэщхьэгъусэхэр гъащIэм тезэшэну ди гуапэщ.

ИСТЭПАН Залинэ.
Поделиться: