Иджыри медаль куэдым дыщогугъ

Пекин щекIуэкI ХХIV ЩIымахуэ Олимп джэгухэм и саугъэтхэм папщIэ зэхьэзэхуэ гуащIэхэр йокIуэкI. Урысей Федерацэм и спортсменхэр зэпеуэхэр къызэрызэIуахрэ пашэхэм яхэтщ.

Джэгухэм и япэ махуэ ди атлетхэм медалхэр зыIэрагъэхьащ. Урысейм япэ дамыгъэ лъапIэр къыхуихьащ лыжэкIэ къызэдэжэнымкIэ етIуанэ хъуа Непряевэ Наталье. ПэщIэдзэ зэхьэзэхуэм абы дыжьын медалыр зыIэригъэхьащ. А махуэ дыдэм биатлонымкIэ эстафетэ зэхэтым урысей командэр ещанэ щыхъуащ.

ЩIымахуэ Олимп джэгухэм ди къэралым икIа спортсменхэм ящыщу япэ дыщэ медалыр Урысей Федерацэм  къыхуихьащ лыжник Большунов Александр. Скиатлон къызэдэжэм ар и хьэрхуэрэгъухэм куэдкIэ къащыщхьэщыкIащ. Командэ нэхъыщхьэм къыдыхэт Спицов Денис а зэпеуэм дыжьын медалыр щызыIэрызыгъэхьащ.

Фигу къэдгъэкIыжынщи, 20I8 гъэм Корее Ипщэм и Пхёнчхан щIыпIэм щекIуэкIа зэхьэзэхуэхэм зы мащIэ дыдэщ Большунов Александр дыщэм лъэIэсыным къыщыхуэнэжауэ щытар. Абы ди щIалэм дыжьын медалу щырэ  зы домбеякърэ щызыIэригъэхьащ.

Мазаем и 7-м, фигуристхэм я гуп зэпеуэм щытекIуащ Урысей Федерацэм и командэр. Мишинэ Анастасиерэ Галлямов Александррэ, Синицинэ Викториерэ Кацалапов Никитэрэ я дуэтхэм япэм очкоипщI къыкIэлъыкIуэм 9 къыщахьат. Псори щызэхэкIар икIи ди къэралым дыщэ медалыр къызэрихьар наIуэ щыхъуар Валиевэ Камилэ дахэ дыдэу фигурнэу къижыхьыу абыи очкоипщI судьяхэм хуагъэува нэужьщ. Ди командэм хэту, къищынэмыщIауэ, зыкъигъэлъэгъуащ Кондратюк Марки. Ахэр псори олимп чемпион хъуащ!

Гъубжым ирихьэлIэу Урысей Федерацэм и атлетхэм зэхьэзэхуэм етIуанэ гуп увыпIэр щаIыгъщ. Олимп джэгухэм и япэ махуищым къриубыдэу абыхэм зыIэрагъащ медаль лIэужьыгъуэ псоми щыщу тIурытI (псори зэгъусэу медали 6). Къыхэдгъэщынщи, 20I8 гъэм екIуэкIа Олимпиадэм къриубыдэу ди къэралым икIа спортсменхэм псори зэхэту дыщэ медалу тIу къудей зыIэрагъыхьэфауэ щытауэ арат. Иджы щIэдзэкIэр нэхъ жыджэрщ. Дыщогугъ зэрырагъэжьа щIыкIэм кIэрыху имыIэу адэкIи ирахьэкIыну.

ЩIымахуэ Олимп джэгухэм официальнэу щымыт къэралхэм я медаль таблицэм щхьэзакъуэ пашэныгъэр щиубыдащ Швецием и командэ къыхэхам. Абы псори зэхэту медалищ къудей иIэу аращ, ауэ дэтхэнэ зыри дыщэщ. Медаль бжыгъэкIэ Урысей Федерацэм и атлетхэм адрей къэралхэм нэхърэ нэхъыбэ зыIэрагъэхьами, Дунейпсо Олимп комитетым и хабзэм къызэрыщыгъэлъэгъуамкIэ, пашэр къызэралъытэр дыщэ медалхэм я куэдакъымкIэщ. Ещанэу къокIуэ Нидерландхэр. Абыхэм дыщэ медалу тIу, дыжьынрэ домбеякъыу зырыз яIэщ.