Мамырыгъэмрэ лъэщагъымрэ зи нэщэнэ

Китайм и къалащхьэ Пекин дыгъуасэ Iэтауэ къыщызэIуахащ ХХIV ЩIымахуэ Олимп джэгухэр. Дунейпсо мыхьэнэ зиIэ спорт зэхьэзэхуэ иным кърихьэлIащ ЩIы Хъурейм и щIыпIэ куэдым къикIахэр. Пасэрей алыджхэм кърагъэжьа Олимпиадэхэр щекIуэкI лъэхъэнэм къриубыдэу ижь-ижьыж лъандэрэ зауэ псори къызэтрагъэувыIэрти, лIыгъэ зэхэгъэкIыпIэр спорт зэхьэзэхуэхэр щекIуэкI утыкухэм Iэпхъуэрт. Иджыри апхуэдэу щытыну дыщогугъ.

Мамырыгъэмрэ лъэщагъымрэ зи нэщэнэ зэпеуэхэр щригъэкIуэкIыну иджы Пекин къылъысащ. США-м и доллар мелардиплIым нэблагъэ тригъэ­кIуа­дэри, Китайм и къару псори ирихьэлIащ «Олимпиадэ хужьыр» абы хэтыну, еплъыну дэтхэнэми гукъинэж ящыхъун папщIэ. Ди жагъуэ зэрыхъущи, иджыри дызыпэмылъэщ корона­вирус уз зэрыцIалэм и зэранкIэ ахэр зыкъомкIэ нэхъ фаджэ мэхъу, зып­лъыхьакIуэхэр къызэрамыгъэкIуам, зэ­хьэзэхуэхэм кIэлъыплъынухэм я бжы­гъэр хэпщIыкIыу зэрагъэмэщIам къы­хэкIыу. АрщхьэкIэ телевиденэм и Iэмалхэри гъунапкъэншэм хуэдэщ икIи шэч хэлъкъым абы къит репортажхэм дуней псом дэрэжэгъуэ зэрыща­гъуэтынум.
Къэрал 91-м икIа спортсмен мини 4-м щIигъу зыхэтыну ХХIV ЩIымахуэ Олимп джэгухэм спорт лIэужьыгъуи 7-м и унэ­тIыныгъэ 15-м мазаем и 20-м пщIондэ медаль комплекту 109-м щризэпеуэнущ. Ди къэралым и щIыхьыр ихъумэнущ Урысейм и Олимп Комитетым и гуп къыхэхам. Куэдым зэращIащи, допинг Iуэхум и зэранкIэ къыттралъхьа тезы­рым и пIалъэр иджыри иухакъым. Абы къыхэкIыу Урысей Федерацэм икIахэм я хэкум и цIэкIэ утыку къихьэну хуиткъым, я текIуэныгъэхэр щагъэлъапIэкIи ди гим­ныр кърагъэуэнукъым, къэрал ныпри яIэтынукъым. А псори Урысейм и Олимп Комитетым и дамыгъэхэмкIэ яхъуэжащ.
Урысей Федерацэм и олимп гупым спортсмен 212-рэ хэтщ (цIыхубзу 103-рэ, цIыхухъуу 109-рэ). Ар хэпщIыкIыу нэхъыбэщ илъэсиплI ипэкIэ Пхенчхань кIуахэм нэхърэ. Псори зэхэту (тренерхэр, дохутырхэр, къулыкъущIэхэр…) Пекин я хэщIапIэ хъуащ ди къэралым щыщ цIыху 461-м.
ХХIV ЩIымахуэ Олимп джэгухэм хэтыну спортсменхэм я бжыгъэкIэ дыдейхэр къызыпикIуэтар Америкэм и Штат Зэгуэтхэращ. Абыхэм цIыху 223-рэ Пекин яшащ.
Китайм и къалащхьэм дэт Лъэпкъ стадионым Олимпиадэ-2022-р къыщы­зэIуахым Урысейм и Олимп Комитетым и ныпыр яIыгъыну хуагъэфэщащ щIымахуэ зэпеуэм и спорт лIэужьыгъуэ нэхъыщхьэу къалъытэ хоккеймкIэ ди къэралым и гуп къыхэхам и капитан ­Шипачёв Вадимрэ лъэрыжэкIэ къы­зэдэжэм хэтыну Фаткулинэ Ольгэрэ. Ар дэтхэнэ зыри зыщIэхъуэпс щIыхьыш­хуэщ.
Дауи, дауэдапщэм кърихьэлIащ Дунейпсо Олимп Комитетым, къэрал щхьэхуэхэм я лIыщхьэ куэд. Китайм и Iэтащхьэ Цзипьин Си дэщIыгъуу абыхэм яхэтащ Урысей Федерацэм и Президент Путин Владимири.
ГуфIэгъуэкIэ дыгъуасэ къызэIуаха ХХIV ЩIымахуэ Олимп джэгухэр яхуэугъурлыну дыщогугъ ди къэралым икIахэм. Зэхьэзэхуэхэр зэрекIуэкIымрэ ди спортсменхэм я ехъулIэныгъэхэмрэ ятеухуа тхыгъэхэр «Адыгэ псалъэ» газетым и къыкIэлъыкIуэ къыдэкIыгъуэхэм тетынущ.