ЛIыжьымрэ фызыжьымрэХъыбар Зы лIыжь цIыкIурэ зы фызыжь цIыкIурэ псэут. ЛIыжьымрэ фызыжьымрэ зэхуэбзаджэт. ФIыуэ зэрылъагъуртэкъым. Хуэмыхьыжу лIыжьым и щхьэр ирихьэжьэри ежьэжащ. ЗдэкIуэр имыщIэу куэдрэ гъуэгу тетауэ, зы мащэшхуэ гуэр IущIащ. Иплъэмэ, благъуэ абрагъуэ ису лIыжьым къилъэгъуащ. Къигъэзэжри, лIыжьыр и фызыжьым деж къэкIуэжащ. – Дэнэ уздэщыIар? – жиIэри фызыжьыр лIыжьым щIэгубжьащ. – Зы мащэ гуэрым дыщэ куэд илъу срихьэлIати, си закъуэти, симыхьэфу сыкъэкIуэжащ, – жиIащ лIыжь цIыкIум. – НакIуэ, – жиIащ фызыжь цIыкIум. КIапси къыздащтэри, еуэри кIуащ. ЛIыжьыр мащэм щхьэщыхьэри иплъащ. – Сэ сихьэнщ, фызыжь, уэ моуэ щыт, – жиIащ абы. Ауэ фызыжьыр мащэм щхьэщыхьащ. Абы иплъэну зыщишийм, лIыжьыр еIунщIэри, и щхьэр и щIагъыу фызыжь цIыкIур мащэм иридзащ. ЛIыжьыр къыщIэпхъуэжауэ къыздэжэм, зэщIэувыIыкIащ. Фызыжьым игу щIэгъужри къигъэзэжащ. Къыздигъэзэжам, еплъмэ, къелъагъу: фызыжьым благъуэр гъуэм кърихуащ. Апхуэдизу зи жагъуэ ящIа благъуэр жылэ гуэрым кIуэри егъуэлъылIащ, цIыхуи Iэщи къыдимыгъэкIыу. Къуажэр хьэлэбэлыкъышхуэ хэхуащ. Ар лIыжь цIыкIум къыщищIэм, а жылэм къэкIуащ. И пыIэр зыщхьэрехри едз, и цейр зыщехри хуедз, благъуэм дежкIэ мажэ. ЯгъэщIагъуэу зэрыжылэу лIыжьым йоплъ. Благъуэм и щхьэр къиIэтри: «Сыт укъыщIэкIуар, лIыжь мыгъуэ цIыкIу?» – къеупщIащ. «Фызыжьыр мащэм къикIыжауэ къокIуэ уи деж, ар бжесIэну аращ сыкъыщIэкIуар», – жиIащ лIыжьым. «Фызыжьыр къакIуэуи?» – щIэупщIащ благъуэр. «Къожэ, иджыпсту къэсынущ», – жиIащ лIыжьым. Благъуэм кIэбгъу зищIри зигъэпщкIужащ. ЛIыжьри, игъэзэжри, и унэ кIуэжащ.
Поделиться:
Читать также:
26.03.2024 - 13:57 →
ГъащIэм и кIапэр къэпIэтмэ
25.03.2024 - 16:00 →
Щызэдагъэхъар гъунэншэщ
25.03.2024 - 15:30 →
Си жэнэт
22.03.2024 - 14:55 →
ГъащIэм и кIапэр къэпIэтмэ
21.03.2024 - 11:30 →
Ахъмэт и фо изщ
|