МафIэм уримыджэгумэ нэхъыфIщ

 ЩIышылэм и 21-м Женевэ щызэхуэзащ УФ-м нэгъуэщI къэрал IуэхухэмкIэ и министр Лавров Сергейрэ Америкэм и къэрал секретарь Блинкен Энтонирэ.

Украинэм теуэну Урысейм зэрызимыгъэхьэзырыр, ауэ США-м и унафэ щIэт НАТО-м и ракетэхэр ди гъунэгъу къэралхэм къызэрыригуашэр имылъагъууи фэ зэрызытримыгъэуэфынурщ утыку зэрихьар УФ-м нэгъуэщI къэрал IуэхухэмкIэ и министр Лавров Сергей.

 Урысейм Америкэм пиубыдыр зы псалъэухам йохуэ: «НАТО зэгухьэныгъэм къуэкIыпIэмкIэ зевмыгъэубгъу». Дауэ ар къыбгурыIуэн зэрыхуейр?  1949 гъэм СССР-м зыщахъумэн папщIэ къызэрагъэпэщауэ щыта НАТО зэгухьэныгъэм дызэрыт зэманым къэрал 30 хохьэ. США-м и жыжьэрыуэ ракетэхэр нобэкIэ Румыниемрэ Болгариемрэ итщ. А къэралитIыр Урысейм къыщыпэгъунэгъукIэ, езыхэри НАТО-м щыхэткIэ, гурыIуэгъуэщ я ракетэхэри УФ-м къытегъэпсауэ зэрыщытыр. Урысейм США-м хуимыдэ Iуэхухэм язщ зэгухьэныгъэм Украинэмрэ Грузиемри хигъэхьэну зэримурадыр. Сыт гъэщIэгъуэну хэлъыр уи гъунапкъэхэм къыбгъурыт къэралхэм зигу фIы къыпхуимылъ бийм и Iэщэр къребгъэгъэувэну умыдэным?!

Езы США-м УФ-мрэ Белоруссиемрэ къытракъузэ Украинэм пэгъунэгъу я гъунапкъэхэм деж Iэщэр щагъэунэху, сэлэтхэр щагъасэ лэжьыгъэхэр щрамыгъэкIуэкIыну. «Фыдгъэпсэунукъым, ауэ зыфхъумэжынуи хуит фытщIыркъым», - жаIэм ещхьщ Урысейм гукъанэ къыхуэзыщIхэм. США-м апхуэдэуи фIэгъэнапIэ ещI Украинэм езы къэралым и унафэм щIэмыту ит Донецкэ, Луганскэ областхэм щызэрагъэпэща республикэхэм УФ-р къазэрыщхьэщыжыр, Кърымыр Урысейм къызэрыхагъэхьэжар.

КъэралитIыр зэгурыIуэныгъэ гуэрым хуэкIуэн папщIэ, Лавров Сергейрэ Блинкен Энтонирэ Женевэ щызэхуэзащ. ИджыпстукIэ ахэр унафэ гуэрми хуэкIуауэ щыткъым, ауэ Урысейм хэкIыпIэу къилъытэхэм США-р къыщыпэджэжа тхыгъэр щIышылэм и 27-м Урысейм къыIэрыхьакIэщ. Абы тепсэлъыхькIэрэ, Лавров Сергей жиIащ Америкэм упщIэ нэхъыщхьэм - НАТО-м къуэкIыпIэмкIэ зимыубгъуным теухуам - иджыри жэуап къызэрыримытыр. «Дызэрыт зэманым Мэзкуур йогупсыс Вашингтон кърагъэха жэуапыр къызэрыбгурыIуэн хуей щIыкIэм», - жиIащ министрым.

«Зыри зауэм хущIэкъуркъым, - иджыблагъэ ита пресс-конференцым къэралым и Iуэху еплъыкIэр наIуэ къыщищIащ УФ-м ЗыхъумэжыныгъэмкIэ и советым и унафэщI Медведев Дмитрий. – Псори зытеухуауэ щытын хуейр ар къэмыгъэхъунырщ, Урысеймрэ НАТО-мрэ щIызэпэщIэувэнкIэ хъуну щхьэусыгъуэхэр зэтремыгъэхьэнырщ». Медведевыр тепсэлъыхьащ Украинэм ищIэхэр къазэрыщыхъуми: «Украинэр НАТО-м хэмыхьэу щытми, и щIыналъэм ракетэхэр иригъэувэну хуитыныгъэ къезыт зэгурыIуэныгъэ къелъыхъуэ. НАТО-мрэ США-мрэ я джэгупIэ зригъэщIауэ, Урысеймрэ Китаймрэ зэрыхагъэзыхьын Iэмэпсымэу закърегъэгъэсэбэп».

Нэрылъагъум нэхъ куууэ хэплъэхэм къазэрыфIэщIымкIэ, иджыпсту екIуэкIыр зы Iуэхущ: СССР-р лъэлъэжа нэужь, Урысейр илъэс куэдкIэ къарууншэу, дунейм щызэIэпах унафэхэм хамыгъэIэбэжыщэу щытами, иджы псоми зихъуэжащи, и хьэтыр къамылъагъуу идэнукъым. ЖытIэм и щыхьэту къытщохъу ФРГ-м Хьэуамрэ хымрэ тет и дзэхэм (ВМС) я унафэщI, вице-адмирал Шёнбах Кай-Ахим Индием щыкIуам къыщипсэлъахэр: «Сыт Урысейм Украинэм хуэдэ къэрал цIыкIунитIэ зэрищIынур? ЗыкIи хуейкъым ар абы. Путин Владимир зыхуейр зыщ – пщIэ зыхуригъэщIыну. Урысейм икIи пщIэ хуэфащэщ. Ар хэмыту дэ зыри тхузэфIэкIынукъым».

Адмиралыр ФРГ-м нэсыжыну хунэсатэкъым, Украинэм и лIыщхьэхэм я тхьэусыхафэхэр щыкIэлъысам. «Сэ псынщIагъ хэлъу сыпсэлъащ, - зрагъэумысащ «демократиер щытепщэ» къэралым и къулыкъущIэм. - Сэ жысIахэр къэралым и Iуэху еплъыкIэм техуэркъым». Ардыдэхэр жиIащ ФРГ-м и канцлер Шольц Олафи. Адмиралыр и IэнатIэм трагъэкIыну зрагъэлъэIури, ари къыхуащIащ. Шёнбах нэхъ хуамыгъэгъуа дыдэу къыжьэдэкIар сыт жыпIэмэ, Кърымыр Урысейм къыхэмыкIыжыну зэрыхыхьэжамрэ, езым и унафэм щIэмыт республикитI зиIэ Украинэр НАТО-м зэрыхэмыхьэфынум зэрытепсэлъыхьамрэщ.

Ираным и президент Раиси Ибрэхьим Мэзкуу щIышылэм и 19 - 20-хэм щыщыIам и щхьэ течыпауэ жиIащ УФ-м къыпэщIэува къэралхэм зи Iуэху зэрахуэр: «НАТО-м щхьэусыгъуэ гуэрхэр къигупсысурэ, я щхьэ хуитыж къэралхэм я щIыналъэхэм йохьэри, Iуэху шынагъуэхэр къегъэхъу, - жиIащ Раиси УФ-м и Къэрал Думэм къыщыщыпсалъэм. - Демократие щызекIуэ къэрал щхьэхуитхэм я хуитыныгъэм и нэщэнэхэм, къэрал хабзэм, абыхэм щыпсэу лъэпкъхэм къадекIуэкI щэнхабзэм ебгъэрыкIуэныр и нэрыгъщ НАТО-м, езым зэрихьэр зэрыщыту пцIыщ. Гува-щIэхами, щIэлъэлъэжынури аращ».

ГъэщIэгъуэнщ иджыблагъэ Хорватием къиIукIа хъыбархэри. Къэралым и президент Миланович Зорфан щIышылэм и 27-м хэIущIыIу ищIащ Урысеймрэ США-мрэ зэгурымыIуэфу щытмэ, Хорватиер НАТО-м къыхэкIыжынкIи зэрыхъунур. «Хорватием и армэм и унафэщIыр сэращи, тIасхъэщIэххэр игъэлажьэ зищIурэ, НАТО-м и кхъухьхэм кIуэ пэтми зэрызаригъэубгъум сыкIэлъоплъ. ЗыгуэркIэ зауэ зэпэщIэтыныгъэ къэхъумэ, Хорватием и дзэр абы химыгъэхьэну къудейкъым, зы сэлэт къимыгъанэу ириджэжынущ. Ди сэлэтхэм Украинэм щащIэн щыIэкъым».

А щыхьэт мащIэхэми къагъэлъагъуэу къытщохъу мамырыгъэм и уэчылу фэ зытезыгъауэ НАТО-м хэт къэралхэм я «демократиер» здынэсыр.

ЧЭРИМ Марианнэ.
Поделиться: