Адыгэхэм апхуэдэ псалъэжь яIэкъым

Тырку къэралым и президент Эрдоган Реджеп хуэмыфащэу зэрытепсэлъыхьамкIэ ягъэкъуаншэу, хабзэм ирашэлIащ илъэс 54-рэ зи ныбжь тележурналист Кабаш Сенеф.

 «Тажым щхьэри Iущ дохъу» жаIэ, - къахь хъыбарегъащIэхэм Кабаш Сенеф зытекIуадэ жыIэгъуэр. - Ауэ дэ ди нэгу щIокI Iуэхур зэрыапхуэмыдэр. Пэж дыдэу, выр сэрейм щIэпшэ щхьэкIэ, ар пащтыхь хъуркъым, езы сэрейр бо мэхъу армыхъумэ».

Бзылъхугъэр щылажьэ «Теле 1» каналыр къэралыгъуэм пэщIэт, оппозицэм ейхэм хабжэ. Журналистым жиIам гу лъамытэнкIи хъунт, ар Кабаш Сенеф и Твиттер напэкIуэцIым къримылъхьэжамэ. ИщхьэкIэ къэтхьа псалъэжьыр цIыхубзым абдежми къритхащ. И лъабжьэм «адыгэ псалъэжь» жиIэри, кIэщIитхэжащ. «Адыгэхэм апхуэдэ псалъэжь фиIэ?» - жаIэурэ, тырку адыгэхэри зыбжанэрэ хагъэзыхьащ.

«Сэ зыми и напэ тесхын мурад сиIакъым», - жиIащ суд нэхъыщхьэм ирашэлIа, къуаншэу зыкъэзымылъытэж Кабаш Сенеф. Ауэ унафэ пыухыкIа ящIыху къаутIыпщыжын ядакъым.

«Журналистым къигъэлъэгъуар оппозицэм и Iуэху еплъыкIэкъым, атIэ акъылыншагъэрэ хьэлыншагъэрэщ, - жаIащ къэралым бжьыпэр щызыIыгъ, Захуагъэмрэ зыужьыныгъэмрэ я партым щыщхэм. - Президентым и пщIэр щIыналъэми и пщIэщ!»

«Псалъэжь игу къэкIыжащ жыпIэу, цIыхур жэщым сыхьэтитIым и унэ къыщIэпшу щIэбгъэтIысын Iуэхушхуэтэкъым ар, - къыщхьэщыжащ и лэжьакIуэм «Теле 1» каналым и редактор нэхъыщхьэ Мердан Янардаг. - Апхуэдэ щIыкIэу журналистхэр ягъэшынэну хуейуэ аращ».

КъызэрыщIэкIымкIэ, Кабаш Седеф Эрдоган и цIэр зэригъэулъийм щхьэкIэ хабзэм етIуанэу ирашалIэ. 2019 гъэм ар мазэ 13-кIэ ягъэтIысауэ щытащ, ардыдэмкIэ ягъэкъуаншэу.

«Захуагъэмрэ зыужьыныгъэмрэ я партым и унафэм щIэт судхэм Эрдоганрэ тырку къэралыгъуэмрэ я напэр тетхыу жиIэурэ, хьэпсхэм драдзэ, пэжым щошынэри, - жриIауэ щытащ абы щыгъуэм Кабаш Седеф «halk.tv» телеканалым. - Езы президентым къэралым и унафэм щIэт СМИ-хэм я процент 95-м я эфирым къыщыпсалъэурэ пцIы еупс».

Илъэситху иримыкъум къриубыдэу зы къуаншагъэкIэ хабзэм тIэунейрэ ирашэлIа цIыхубзыр тезыр нэхъ лъагэ дыдэм IэщIэкIыныр дзыхьщIыгъуэджэу къалъытэ. Тыркум и радиомрэ телевиденэмрэ я совет нэхъыщхьэм Кабаш Седеф щылажьэ «Теле I» каналым и Iуэху кърихьэжьауэ, я лэжьыгъэм зэрыкIэлъыплъри абы и щыхьэтщ.

Журналистым къыщхьэщыжхэм я бжыгъэм кIуэ пэтми хохъуэ. Къэрал унафэм пэщIэт, Республикэм и лъэпкъ партым и унафэщI Кылычдароглу Кемали абыхэм ящыщщ. «Эрдоган и пщIэ ехуэхыр Кабаш Седеф игъэтIыскIэ къигъэщIэрэщIэжыфын и гугъэу аращ», - жеIэ абы. Езым илъэс блэкIам Тыркум и цIыхубэ зэхуэсым щыжиIам щхьэкIэ апхуэдэ тезыр тралъхьэри, доллар 3200-рэ ирагъэпшынауэ щытащ. Ахъшэр иужькIэ Университет фондым иратри, студентхэм я стипендием хагъэхьащ.

Тыркум юстицэмкIэ и министерствэм къызэрыщагъэлъагъуэмкIэ, 2020 гъэм и закъуэ къэрал лIыщхьэр зэрагъэпудам и щхьэусыгъуэкIэ хабзэм къиIэтащ Iуэху 31297-рэ. Псори зэхэту зэпкъраха Iуэху 7790-м япкъ иткIэ тезыр тралъхьащ цIыху 3325-м.

Эрдоган Реджеп къэралтет залымхэм хабжэркъым. Ататюрк Кемал и сурэтыр зи дапхъэм тет Кабаш Сенеф абы пэщIэзыгъэувэр къэралым диныр тегъэщIапIэ зэрыхуэхъур зыфIэмыфIхэрщ. Дауэ хъуами, адыгэ псалъэжьым и щхьэусыгъуэкIэ бэлыхь хэхуа бзылъхугъэм и Iуэхур Тхьэм зэтриухуэж. Адыгэхэм апхуэдэ лъэпкъ Iущыгъэ диIэу зэхэзыха щыIэмэ, хъыбарыншэ дывмыщI.