Псыгуэнсу щIалэр къэралым и чемпионатым макIуэ

Осетие Ищхъэрэ-Аланием и къалащхьэ Владикавказ дэт «Манеж» спортым и уардэунэм щIы­шылэм и 20-22-хэм щекIуэкIащ IэпщэрызауэмкIэ Ипщэ дзэ щIыналъэм и чемпионат. Псори зэгъу­сэу командийуэ гуэшауэ абы хэтащ дзэ къулыкъу езыхьэкI цIы­хуи 100-м щIигъу. 

Зи хьэлъагъыр килограмм 85-м нэблагъэ Къэ­бэрдей-Балъкъэрым щыщ Хьэ­санэ Мурат иригъэкIуэкIа зэIущIитхум псоми шэч къы­зытумыхьэн те­кIуэныгъэ къыщихьри, Ипщэ дзэ щIыналъэм (ЮВО) и чемпион хъуащ. Абы хигъэщIахэм ящыщщ ММА-м и иджырей чемпионыр. 
Медалхэмрэ грамотэхэмрэ ­къи­­щынэмыщIауэ, я хьэлъагъ елъы­тауэ гуэшауэ щыта гупиблим щытекIуахэмрэ къыщыхэжаныкIахэмрэ саугъэт лъапIэхэр ЮВО-м и унафэщIхэм къабгъэдэкIыу тыгъэ хуащIащ. А псом ищIыIужкIэ, абы­хэм Iэмал ягъуэтащ мы гъэм и гъат­хэпэм Санкт-Петербург ще­кIуэкIыну Урысей Федерацэм Iэ­щэкIэ ЗэщIэузэда и Къарухэм я чем­пионатым хэтыну. 
Мурат и спорт зыгъэсэныгъэхэм щыщIидзащ къыщалъхуа къуа­жэм дэт «Псыгуэнсу» спорт клу­бым. Иджыпсту абы зыщегъэхьэзыр «Файт Зон» зэзауэ зэхэтхэмкIэ клубым. Спортсменыр егъасэ грэпплингымкIэ Урысей Федерацэм и командэ къыхэхам и тренер Шыхъуэстэн Руслан.