ЩIыуэпс хъыбарыщIэхэр

• Замботти жыхуаIэ исландие дизайнерым хыфIадзэжа маскэ мини 2-м нэс зэхуихьэсщ, игъэкъабзэри, кIагуэ къыхищIыкIащ. Замботти къызэрихутамкIэ, маскэхэр къызыхэщIыкIа щэкIыр хуэдэпсщ кIагуэм хуэбагъэ къезыту къагъэсэбэп щэкI лIэужьыгъуэм. Дизайнерым игу къеуэу къыщIэкIынт дакъикъэ къэс дуней псом маскэ мелуани 3 зэрыщыхыфIадзэм. Къыхэгъэщыпхъэщи, маскэхэм зыри елэжьыжыркъым, «етIуанэ гъащIэ» ептыфыркъым, атIэ цIыкIу-цIыкIуу зэпкърощэщри, щIым къыхонэ, уеблэмэ дызэфэ псыми нос.
• Гъэ кIуам, дызэрыщыгъуазэщи, мафIэс шынагъуэхэр щыIащ дуней псом. ЩIы щхьэфэр трисыкIащ гектар мелуан бжыгъэкIэ. Апхуэдэу, мафIэсым игъэгулэзащ Урысей Федерацэр, Тыркур, США-р, Америкэ Ипщэр, Италиер, Румыниер, Грециер, Африкэр, Канадэр, нэгъуэщI щIыналъэхэри. Апхуэдиз насыпыншагъэм хэкIуэдащ цIыхухэри, хьэкIэкхъуэкIэхэри, мафIэсым и зэранышхуэ екIащ хьэуами псыми. Абы ирихьэлIэу Тундрэмрэ хы ФIыцIэмрэ щаIэщIэкIат мафIэсыр нэхъ гуащIэжу къезыгъэблынкIэ хъуну щIы дагъэр. Псы къабзэу дунейм тетым и процент 20-р щызэхуэхьэза Байкал гуэлым ткIуаткIуэ цIантлъэ трищIати, цIыхухэм пэгункIэ трахырт ар, нэгъуэщI Iэмал ямыгъуэту! Аргентинэм щыIэ гуэлым кIэрыхубжьэрыху хакIутэри, тхьэмбылыфэу псыр ириIат. Венецием и псым зыкъиIэтат, Италиеми зэи щамылъэгъуа уэ шынагъуэ къыщехат.
 Дунейкъутэжым теухуа фильмхэм ещхьщ мы къедбжэкI псори, ауэ ар цIыху цIыкIум и нэгу щIэкIа телъыджэщ. КъызыхэкIари цIыхур зыхэпсэукI щIыуэпсым хуэмыгъэзэкIуэжын фэбжь зэрырихырщ. А псоми и Iэужьу иджыблагъэ дунейпсо хым къыщагъуэтащ кIэрыхубжьэрыху защIэкIэ зэIылъ хытIыгу абрагъуэ.
•    Красноярк и уафэр фIыцIэ хъуащи, дыгъэр къыпхрыплъыфкъым. Къалэм и щIыпIэ зыбжанэм къыщхьэщыува пшэ фIыцIэхэр кудащ щхъухь зэмылIэужьыгъуэхэмкIэ. Красноярск уэхым зэритым къыхэкIыу, пшэ фIыцIэр жьым ирихьэжьэфкъым. «Роспотребнадзор»-м къызэрихутамкIэ, мы щIыпIэм и хьэуар кIуэ пэтми нэхъ фIей мэхъу. 202I гъэм и шыщхьэуIу мазэм ирагъэкIуэкIа къэпщытэныгъэхэм къызэрагъэлъэгъуамкIэ, дуней псом и къалэ нэхъ ин дыдэхэм ящыщу зи хьэуа нэхъ фIейм Красноярск бжьыпэр щиубыдащ.