ЗыкIи зэмыщхьу, куэдкIи зэтехуэу

 Бэрбэч ХьэтIутIэ и цIэр зезыхьэ Къэбэрдей-Балъкъэр къэрал универси­тетым и «Занавес» студент театрым хэтхэм иджыблагъэ ягъэлъэгъуащ ­франджы пьесэхэм къытращIыкIа спектакль кIэщIу щы. Артист ныбжьы­щIэхэмрэ абыхэм я художественнэ унафэщI Дэхъушокъуэ Мадинэрэ ­яху­зэфIэкI къагъэнакъым утыку кърахьа лэжьыгъэр щIэщыгъуэ, узы­Iэ­пызышэ ящIын папщIэ.
 Рудио Пьер и «Омлет с горчицей» пьесэм къытращIыкIа спектаклым и ­лъабжьэр зи ныбжь хэкIуэта зэщхьэ­гъусэхэм я зэщыхьэщ. ДжэдыкIэ уда гъэжьауэ лIым ишхыну игу къы­зэрыкIар сыхьэт ныкъуэ хъу зэфIэнэм ­хуокIуэ. ЦIыхубзым игу техуэркъым ар зэрымы­къабзэлъабзэр, цIыхухъум къыщохъу и щхьэгъусэм езыр къыфIэ­мы­Iуэхуу. Ауэ, зэрыхабзэу, лъагъуныгъэр т­окIуэ. 
 ФIыуэ зэрылъагъухэр цIыху зыбжанэ щохъу Митуа Марсель и «Странный мир театра» пьесэр зи лъабжьэ спектаклым. Ахэр щыджэгур утыкум и за­къуэкъым, гъащIэми роль щхьэхуэхэр щагъэзащIэ. Спектаклым гъэщIэгъуэну хэлъыр абы хэтхэм зыуагъэцIыхужу зэрыщытырщ. 
 Фортюно Клод и «Учитесь водить за­очно» пьесэращ студентхэм ещанэ лэжьыгъэу къащтар. Абы къыбгуре­гъаIуэ уи нэ къызэрыхуикI къудеймкIэ машинэ къехуэкIыкIэ зэрыпхузэ­мыгъэщIэнур, шэнт щхьэгуэм утесу, рулым и пIэкIэ тас пIыгъыу, уи ныбжьэ­гъум и жыIэр уи гъуазэу уи хъуэпсапIэм  ­уху­щIэкъунри  мащIэщ. 
 Къыхэгъэщыпхъэщ зи гугъу тщIа спектаклхэр ящIэлъ гупсысэкIи, къуат ­гукъыдэжкIи зэрызэмыщхьыр. Студентхэм яхузэфIэкIащ ахэр зэрызэщ­­хьэ­щыкIри зэщхь зыщIри къыдгурагъэIуэну - ар франджы гушыIэкIэмрэ тха­кIуэм и ауан щабэмрэщ.
 «Занавес» театрым хэтхэр илъэс ­зыбжанэ хъуауэ цIыхухэм яхуоупсэ я лэжьыгъэ гъэщIэгъуэнхэмкIэ. Абыхэм я Iэзагъэм хэхъуэ зэпытщ, еджэным къы­щы­дэхуэ зэманым театр утыкум ­гуапэу щы­зэдолажьэ. Тыгъэу къалъы­тэри ­цIы­ху­хэр нэжэгужэрэ гукъыдэж яIэу ­зэбгрыкIыжынырщ.

Блий Даянэ.

Свежие номера газет Адыгэ псалъэ


17.07.2018
16.07.2018
13.07.2018
10.07.2018