Шыхъуэм къиIуэтэжа хъыбар
Зэгуэрым дэ шыхъуэ пщыIэу Дзэлыкъуэ дыдэст, Iуащхьэмахуэ и лъапэ дыдэм деж.
Сэ шыхъуэ нэхъыжьу абы сыщыIэт.
ЖэщкIэрэ ди шыхъуэ щIалэр зытес шыр пщIэнтIауэ нэху къекIырт. Пшэр хъуным и пIэкIэ, нэхъ уэд хъурт.
«Сыт мы уи шыр пщIэнтIауэ нэху къыщIекIыр? Пшэр хъуным и пIэкIэ нэхъ Iей мэхъу! Си гугъэщ жэщкIэрэ умыгъашхэу утесу!» - жысIэу щIалэр щыхэзгъэзыхьым, дыхьэшха фIэкIа, зызигъэумысакъым.
Ауэ щыхъум сэ мурад сщIащ щIалэм жэщкIэрэ шыхэр зэригъэхъум сеплъэкIуэну.
Пщыхьэщхьэм щIалэр шхэщ, щIак1уэ-бащлъыкъыр зыфIилъхьэщ, и фочыр къищтэщ, шым шэсри, плъырыну текIащ. ЩIалэр зэрытекIыу, сышэсри, сыкIэлъыкIуащ, къуэгъэнапIэ зысщIри, сеплъакIуэу сытIысащ.
ЩIалэр шым зэрыпэрыувэу, зы мыщэ ин къуэ кIуэцIымкIэ къыдэкIри, къеплъу абы къыбгъэдэуващ.
«СлIожь, си ныбжьэгъу, ушэсынут? КIуэж, кIуэж адэ, дыкъащIащи ядэркъым», - жиIэрт щIалэм, ауэ мыщэр IумыкIыжу къеплъу щытт.
«Хъунщ, ныжэбэризэм схуэплъырыж, сэ сыжеинщ, дяпэкIэ укъэмыкIуэ», - жиIэри, дэIэпыкъуурэ щIалэм мыщэр шым игъэшэсащ.
Мыщэм уанэгур зэригъуэту и фIалъэ лъакъуэхэмкIэ шхуэмылакIэр къызэщIикъуэщ, шым елъэдэкъауэри, шы гуартэм и хъуреягъыр къикIухьу щIидзащ, езы щIалэми щIакIуэм зыкIуэцIишыхьри, жеину гъуэлъащ.
Сэ ар зэрызгъэщIэгъуэнур сымыщIэу куэдрэ сеплъащ. ЩIалэр пырхъыжу жейрт, мыщэ шум шы гуартэм и хъуреягъыр къижыхьырт. Шыхэри мамыру хъуакIуэрт.
А гъэщIэгъуэным еплъынымкIэ срикъуа нэужь, лъэбышэжьыр згъэшынэн си мураду, си фочыр зыпщIыхэсхри, згъэуащ. ЩIалэми къэхъуар имыщIэу къыщылъэтри, и фочыр игъэуащ. ФочитIым я уэ макъым игъэщта мыщэр шым къелъэри, къуэм дэлъэдэжащ.
«Къэхъуар сыт?» - жиIэу щIалэр къыщызбгъэдэлъадэм, сыкъицIыхури, укIытэжащ.
«Къэхъуар пщIэркъэ, шыр мыщэм шэсауэ шы гуартэр егъэхъу», - жысIащ сэ сыпыгуфIыкIыурэ.
«Хьэуэ, мыщэращ шым шэсар», - жиIащ абы.
ЩIалэм къызэрызжиIамкIэ, шы тесын зыфIэфI а лъэбышэжьыр нэгъабэ мыщэ шыр цIыкIуу мэзым къыщиубыдри, зэштегъэууэ ириджэгуурэ шым тесыфу езым игъэсат.
Япэ махуэхэм хуэмыгъасэу гугъу дехьу щытащ: зэм шыр абы щышынэрти, зытримыгъэтIысхьэу етхауэрт, зэми езы лъэбышэжьри темысыфу и щхьэр и щIагъыу къехуэхырт, ауэ зэман дэкIа нэужь, мыщэжьым шы тесыныр игу ирихьат.
«АфIэкIа апхуэдэу умыщI», - жесIащ сэ абы ткIийуэ, арщхьэкIэ кIыфIым сыздыхэтым си Iупэр сфIызэтежырт.
А жэщым щIалэм деж сыщыIащ. «А мыщэжьыр и гъусэу щIалэр циркым щыджэгуфынт», - сегупсысурэ сыIурихащ.
