Тэрч бэнакIуэхэм я текIуэныгъэ

ЩIышылэм и 7 - 9-хэм Налшык дэт «Гладиатор» спорт комплек­сым щекIуэкIащ 2002 - 2007 гъэ­хэм къалъхуа ныбжьыщIэхэм алыдж-урым бэнэкIэмкIэ я республикэпсо зэхьэзэхуэ. Къэбэрдей-Балъкъэрым щыщу абы хэтащ спортсмен 300-м нэблагъэ. 

Зэхьэзэхуэм зэфIэкI лъагэ­хэр къыщагъэлъэгъуащ Тэрч ­куейм и бэнакIуэхэм. Я хьэлъагъ елъытауэ зэщхьэщыха гупхэм пашэныгъэхэр щаубыдащ Тэркъан Къазбэч, Хъуп Астемыр, КIыщ Аслъэнбэч сымэ. КIыщ Мурат и нэIэ щIэту щIалэщIэхэм зыщагъасэ Акъбаш Ипщэ дэт спорт школым. 
Тамбовскэ жылагъуэм щыIэ олимп резервхэр щагъэхьэзыр спорт школым и гъэсэн Щомахуэ Албиян килограмм 82-м нэблагъэ зи хьэлъагъхэм я деж пашэныгъэр щиубыдащ. Ар ягъасэ Умархэ Залымрэ Валерэрэ. 
КъищынэмыщIауэ, етIуанэ, еща­нэ увыпIэ куэд зыIэрагъэхьащ Тэрч щIыналъэм и спортсмен ­ныбжьыщIэхэм. 
Алыдж-урым бэнэкIэмкIэ республикэ зэхьэзэхуэм щыте­кIуахэмрэ къыщыхэжаныкIахэмрэ хэтынущ Кавказ Ищхъэрэ федеральнэ щIыналъэм и зэпеуэу щIышылэм и 26 - 30-хэм Дагъыстэным и Каспийск къалэм щекIуэкIынум.