Налшык и теплъэр кIуэ пэтми йофIакIуэ. Къалащхьэм и зы хьэбли къэнакъым лъэс зекIуапIэ екIухэр щамыухуарэ фэтэр куэду зэхэт унэхэм я бжэIупэхэр зэIузэпэщ щамыщIарэ. КъищынэмыщIауэ, «Хрущевка» унэ куэдыр, къомыцIыхужыным хуэдизу, къагъэщIэрэщIэжащ.
КъатитI-къатищу зэтет апхуэдэ унэхэр ди къалащхьэм щымащIэкъым. Абыхэм я нэхъыбэр 1958-1960 гъэхэм яухуащ. Подъезд щIыхьэпIэхэм, коммуникацэ хуэIухуэщIэхэм, якIэлъыIэбэн зэрыхуейрэ куэд щIат. АбыкIэ сэбэпышхуэ хъуащ зэраухуэрэ куэд щIа унэхэр къызыхуэтыншэу зэгъэпэщыжынымкIэ Урысей фондымрэ щIыналъэ унафэщIхэмрэ. Мы Iуэхум теухуауэ лэжьыгъэшхуэхэр къыщрахьэлIащ Ашуровым, Iэхъуэхъум, ПащIэм, Лермонтовым, Головком цIэхэр зезыхьэ уэрамхэм тет унэхэм: унащхьэхэр, унэ щIыбхэр, пщIантIэхэр зыхуей хуагъэзащ, Iэгъуэблагъэм щыт жыгхэм я щхьэкIэхэр яухъуэнщIащ. Иджыпстуи гъэр здынэсам лэжьыгъэ цIыкIуфэкIухэр кърахьэлIэж.
Лэжьыгъэшхуэ къыщрахьэлIа щIыпIэхэм ящыщщ Налшык и «Дэшхуей хадэр»: плиткэхэр къызэрылъэлъа лъэс зекIуапIэ нэхъыщхьэм асфальт тралъхьащ, хадэм щызэбгрыгуэшыкIа адрей зекIуапIэ цIыкIухэр илъэс куэдкIэ зекIуэну плиткэ нэхъыфIхэмкIэ къращIыкIащ, сабий джэгупIэр иджырей мардэхэм тету къагъэщIэрэщIэжащ. Иджы абы хэтщ Интернет хуэIухуэщIэхэм щыпадзэ щIыпIэ щхьэхуэ. Ар къахуэсэбэпынущ я сабийхэр ягъусэу махуэкIэ хадэм къыщызыкIухь анэ-адэхэм.
Лениным и проспектым щегъэжьауэ Къэрэшеймрэ Шортэнымрэ я уэрам зэхэкIыпIэм нэсыху ирикIуэ бульварыр Налшык щынэхъ инхэм ящыщщ. Зи гъуэгубгъуитIыр бзииху лъагэхэм ягъэдахэ щIыпIэр къалэдэс куэдым я кIуапIэу сыт щыгъуи къокIуэкI. Абы и кIыхьагъкIэ асфальтыр щIэуэ тралъхьащ, гъуэгубгъухэр дахэу къагъэувыхьри, уэздыгъэ пкъо екIухэр ягъэувыжащ.
КъыумыцIыхужыным хуэдизу зэIузэпэщ ящIащ Правительствэм и Унэм къыпэзыкIухь скверыр. ИпэкIэ асфальт лъагъуэ цIыкIуитI фIэкIэ зимыIа щIыпIэр иджыпсту ягъэдахэ гипс къэухь хужьыбзэхэмкIэ къэщIыхьа утыкум. Абы и хъуреягъкIэ тетIысхьэпIэхэр къокIуэкI.
Апхуэдэ тетIысхьэпIэхэр щIэуэ ящIа лъэс лъагъуэхэми жыг лъабжьэ жьауэхэми щIэтщ. Лъэс зекIуапIэ зэпэщыр иджы ныбжь зиIэхэми щIалэгъуалэми я мызакъуэу, абдежыр сурэт зытрегъэхыпIэ яхуэхъуащ нэчыхь щатх унэм къыщIэкIыж зэрышагъащIэхэми.
Головко уэрамым и пэщIэдзэм тетщ Налшык пасэу дащIыхьа унэхэм ящыщ зы. БжэIупэм къыщыкI жыгыжьхэр ирахыу жыгыщIэ цIыкIухэр уэру щыхаса лъэс зекIуапIэм щагъэуващ уэрамым зи цIэр зэрихьэ адмирал Головко и фэеплъри.
