Къэбэрдей-Балъкъэрым и Iэтащхьэ КIуэкIуэ Казбек лэжьыгъэ IуэхукIэ яIущIащ щIэрыщIэу хахыжауэ КъБР-м и Жылагъуэ палатэм хэтхэм.
«Илъэс блэкIахэм уриплъэжмэ, Къэбэрдей-Балъкъэрым и Жылагъуэ палатэр цIыхубэм я деж увыпIэшхуэ щызыубыд, зи еплъыкIэхэм, жэрдэмхэм къэрал унафэщIхэри жылагъуэри зыщIэдэIу зэгухьэныгъэу зыкъигъэлъэгъуащ, - жиIащ КIуэкIуэ Казбек зэIущIэр къыщызэIуихым. - Си фIэщ мэхъу, щIэрыщIэу хахыжа палатэм хэтхэм, зыIэрагъэхьа Iэзагъ куур къагъэсэбэпурэ я къалэнхэр нэгъэсауэ зэрагъэзэщIэнур, унафэгъэув, гъэзэщIакIуэ къэрал IуэхущIапIэхэм жыджэру хэтыну икIи республикэ гъащIэм и сыт хуэдэ унэтIыныгъэми и зыужьыныгъэм и бгъэдыхьэкIэщIэхэр къыщыхалъхьэ джэлэс купщIафIэ зэрыхъунур».
Республикэм и Iэтащхьэм къыхигъэщащ Жылагъуэ палатэм зэрыдэлэжьэну унэтIыныгъэ нэхъыщхьэхэр. «Коронавирус эпидемием ебэныныр иджыри йокIуэкI. А щытыкIэм къыдэкIуэу Iэмал зимыIэу щытщ цIыхухэм, сабий зиIэ унагъуэхэм, хьэрычэтыщIэ мащIэмрэ курытымрэ социальнэ щIэгъэкъуэныгъэ етыным, экономикэм и зыужьыныгъэмрэ лэжьыгъэ рынокыр зэфIэгъэувэжынымрэ ехьэлIа унафэхэр гъэзэщIа зэрыхъум хуэунэтIауэ жылагъуэ кIэлъыплъыныгъэхэр щIэгъэхуэбжьэныр. А Iуэхум Жылагъуэ палатэр зэзыгъэуIуу хэтын хуейщ, мыхьэнэшхуэ зиIэ къалэнхэр зыгъэзэщIэну зи пщэ къыдэхуэхэр хагъэзыхьыу», - жиIащ КIуэкIуэ Казбек. - Республикэм и зыужьыныгъэмкIэ мыхьэнэшхуэ зиIэ, цIыхухэм зыкъызэрагъэлъэгъуэным ехьэлIа проектхэр нэхъ жыджэру пхыгъэкIыным ехьэлIа къалэнхэм ящыщхэри палатэм и пщэрылъ зыхуищIыжами хъуну къызолъытэ. Дызытепсэлъыхьыр егъэджэныгъэм, узыншагъэр хъумэным, хьэрычэтыщIэм щIэгъэкъуэн яхуэхъунырщ, гъащIэм и фIагъыр егъэфIэкIуэным хуэунэтIа цIыхубэ инфраструктурэм зегъэужьыным теухуа проектхэрщ».
«Палатэм гулъытэ хэха зыхуищIын хуейр мылъку къезымыгъэщI (НКО) унэтIыныгъэм и зыужьыныгъэм ехьэлIа Iуэхугъуэхэрщ. Абыхэм лэжьыгъэр къызэгъэпэщыныр щытыкIэфI ихуэным жыджэру фыхэтыну дыфщогугъ. Дэ дыщыгъуазэу щытын хуейщ дэтхэнэ НКО-м сыт и лэжьыгъэми, абыхэм я проектхэр дауэ хъуми, къалэнхэр щызэфIахкIэ сыт хуэдэ гугъуехьхэр къапэувми. Социальнэ унэтIыныгъэ зэмылIэужьыгъуэ куэдым хуэунэтIа муниципальнэ IуэхущIапIэхэмрэ хьэрычэтыщIэ мащIэмрэ къадэкIуэу лэжьыгъэр езыхьэкIыфын НКО-м и зыужьыныгъэм и дежкIэ ар мыхьэнэшхуэ зиIэщ. А псом къадэкIуэу, шэч хэмылъу, Палатэм дяпэкIи зиужьын хуейщ профессиональнэ экспертизэ щхьэхуит центру икIи зэпыщIэныгъэ IэмалыфIу. Дэ дыхущIэкъун хуейщ цIыхухэм я гукъеуэхэр къэрал унафэщIхэм я сыт хуэдэ IэнатIэми щызэхахыным. Апхуэдэ псалъэмакъхэр ди пащхьэм, къэрал унафэщIхэм я деж, нэхъ жыджэру къыщыфIэтыну фыкъыхузоджэ. Дызэгъусэу тлъэкIынущ цIыхухэм я гъащIэр едгъэфэкIуэну - а къалэныр егъэув Урысей Федерацэм и Президентми. Фи Iэзагъыр къэдгъэсэбэпурэ республикэм куэд хуэтщIэфынущ», - къыхигъэщащ КъБР-м и Iэтащхьэм.
Илъэсищ блэкIам кърахьэлIа лэжьыгъэмрэ адэкIэ къапэщылъ къалэнхэмрэ ятеухуа докладым къеджащ КъБР-м и Жылагъуэ палатэм и унафэщIу щIэрыщIэу хахыжа Берд Хьэзрэталий. Республикэм и дежкIэ мы махуэхэм мыхьэнэшхуэ зиIэ псалъэмакъхэр къыщаIэтащ.
«ГъэзэщIакIуэ властым и дежкIэ мыхьэнэшхуэ зиIэщ цIыхухэм я еплъыкIэхэм щыгъуэзэныр, цIыхубэм къыщекIуэкIыр зэхищIыкIыныр. ТхуэмыгъэзэщIэн Iуэхугъуэ щыIэкъым. Республикэм и социальнэ зыужьыныгъэм ехьэлIа Iуэхугъуэхэр лъэпкъ проектхэм я фIыгъэкIэ гъэзэщIа мэхъу. ИджыпстукIэ куэд доухуэ. 2022 гъэм школи 7-м я лъабжьэ ягъэтIылъынущ. Нобэ къыдэкIащ щIэныгъэ щрагъэгъуэт IуэхущIапIэхэм ехьэлIа документыр - дызыхуэкIуэ илъэситIым къриубыдэу къызыхуэтыншэ щымыIэу зэрагъэпэщыжынущ школ 50. Апхуэдэщ узыншагъэр хъумэным хухэха ухуэныгъэхэри. Илъэс бжыгъэкIэ цIыхухэм къагъэсэбэпыну IуэхущIапIэхэр къызэгъэпэщыжыным ехьэлIауэ екIуэкI лэжьыгъэхэм цIыхубэ кIэлъыплъыныгъэхэр яIэн хуейщ лэжьыгъэхэр нэгъэсауэ ягъэзэщIэн папщIэ», - жиIащ КIуэкIуэ Казбек.
ЩIыналъэм и унафэщIым палатэм хэтхэр къыхуриджащ зэрызэдэлэжьэну щIыкIэхэр къыхалъхьэну. ЗэIущIэм и кIэухыу Къэбэрдей-Балъкъэрым и Iэтащхьэр Жылагъуэ палатэм ехъуэхъуащ дызыхуэкIуэ илъэсым ехъулIэныгъэ яIэу лэжьыгъэ купщIафIэ кърахьэлIэну.