УщамыцIыху ущылъапIэркъым

 Урысейм зэрыщыпсэун дэфтэрхэр къыдахын папщIэ, Мэзкуу лэжьакIуэ къакIуэхэм я нэхъыбэм здаунэтIыр Сахаровэ щIыпIэрщ. Абы унэсын щхьэкIэ, нэхъ къэщхьэпэр «Прокшино» метрорщ. ФIыуэ урысыбзэ зэрамыщIэм къыхэкIыу, гугъу ирамыгъэхьын папщIэ, метром и унафэщIхэм гъуэгугъэлъагъуэхэм тет тхыгъэхэр таджикыбзэкIэ, узбекыбзэкIэ, персыбзэкIэ зэрадзэкIащ.
 А унафэм къигъэгубжьащ ЦIыхум и хуитыныгъэр хъумэнымкIэ советым и унафэщI Фадеев Валерий. Абы Мэзкуу къалэм и унафэщI Собянин Сергей зыхуигъэзащ, цIыхухэм таджикыбзэрэ узбекыбзэрэ метром зэрыщалъагъум щхьэкIэ къыхуэтхьэусыхэу жиIэу.
 «Псом хуэмыдэу ахэр егъэбампIэ «Прокшино» метром узбекыбзэрэ таджикыбзэкIэ гъуэгугъэлъагъуэхэр къызэрыщыфIадзам, - жеIэ Фадеевым. – Къэралым лэжьакIуэ къихьэхэр щIыпIэм и щэнхабзэмрэ и цIыхубэ гъащIэмрэ зыдрагъэкIуным трагъэгушхуэным и пIэкIэ, абыхэм урысыбзэ ямыщIэуи тыншу зэрагъэпсэун Iуэху зэрахуэ».
 ЦIыхум и хуитыныгъэр хъумэнымкIэ советым и унафэщIым къызэрилъытэмкIэ, метром и лэжьакIуэхэм ящIар зыкIи бгъэдыхьэркъым «УФ-м щызекIуэ къэралыбзэм теухуауэ хабзэми метрор къызэрыгъэщхьэпапхъэми. Урысыбзэм нэмыщI, инджылызыбзэм и закъуэщ абы къыщагъэсэбэпын хуейр».
 - Абы ищIыIужкIэ, - тепыIэркъым Фадеевыр, - ар хамэ щIыпIэ къикI лэжьакIуэхэм урысыбзэ ящIэн хуейуэ зэракъалэным езэгъыркъым».
 Фадеевыр Собяниным елъэIуащ цIыхухэм я тхьэусыхафэм хэкIыпIэ къыхуигъуэтыну.
 ФокIадэращ «Прокшино», «Лесопарковая» метро станцхэм тет тхыгъэхэр таджикыбзэкIэ, узбекыбзэкIэ, персыбзэкIэ щызэрадзэкIар. «Дэ ди къалэныр, - жэуап къратыкIащ езы IуэхущIапIэм, - метрор къэзыгъэсэбэпхэр тыншу зедгъэкIуэнырщ. Псалъэм папщIэ, мафIэгум ит электрон таблом тет тхыгъэр бзибгъукIэ зыдодзэкI».
 Абы иужькIэ зи псалъэ пхыкI урысей журналистхэм лъэныкъуитIу загуэшащ. Зы гупыр, зэрыгурыIуэгъуэщи, ЦIыхум и хуитыныгъэр яхъумэу къэзылъытэхэм къадэщIырт.
 Коненкэ Максим абыхэм япидзыжар мыращ: «Сэ си щхьэкIэ сыарэзыщ. ГъэщIэгъуэнщ Фадеевыр ЦIыхум и хуитыныгъэр зыхъумэ советым и унафэщIым тету плъагъуныр. Сыт нэгъуэщIыбзэкIэ тха гъуэгугъэлъагъуэхэм цIыхум и хуитыныгъэр зэрыдакъузэр. Апхуэдэ щIыкIэущ цIыхум и хуитыныгъэр зэрахъумэр. НтIэ, Шереметьевэ метром инджылызыбзэрэ китаибзэкIэ тетхэри дывгъэхъуэж».
 Ахмедовэ Маринэ ар идакъым: «Метрор къызэрагъэщхьэпэ хабзэм инджылызыбзэрэ китаибзэрэ хэтщ, ауэ, фи жагъуэ зэрыхъунщи, таджикыбзэрэ узбекыбзэрэ хэткъым».
 Узбекыбзэрэ таджикыбзэкIэ гъуэгугъэлъагъуэхэр зэрытрагъэувам и фIыгъэкIэ, цIыхур зэрызэтрихьэр процент 40-кIэ зэрыхэщIам и щыхьэту къэуващ мэзкуу метром и лэжьакIуэхэри.
 ЛъэныкъуитIыр зэригъэкIуж щIыкIэу, УФ-м и Президент Путин Владимир ЦIыхум и хуитыныгъэр хъумэнымкIэ советым и зэIущIэм щыжиIащ къэралым лэжьакIуэ къакIуэхэм урысыбзэ ящIэу, щэнхабзэми хащIыкIыу щытын папщIэ, ахэр къыздикI СНГ-м хыхьэ къэралхэм ядэлэжьэн зэрыхуейр.
 Къэралым цIыху лэжьакIуэ куэд къызэрагъакIуэм зэгуигъэпхэм нэгъуэщI зы гукъеуи яIэщ. Улахуэ мащIэкIэ арэзы пхуэщI хамэхэм я зэранкIэ, зы лъэныкъуэкIэ, Урысейм щыщхэр лэжьапIэншэ мэхъу. А щхьэусыгъуэ дыдэм къыхэкIыу, лэжьапIэ Iутхэм я улахуэм зэрыхагъэхъуапхъэм нэсыну Iэмал щыIэкъым, сыту жыпIэмэ, итIанэ лэжьакIуэ къэкIуахэми апхуэдиз дыдэ иратын хуей хъунущ.

Чэрим Марианнэ.
Поделиться: