Балъкъэр цIыхубэ уэрэдыжьхэм я фестиваль

Кулиев Къайсын и цIэр зезыхьэ Балъкъэр лъэпкъ къэрал драмэ театрым щекIуэкIащ балъкъэр цIыхубэ уэрэдыжьхэм я фестиваль. Ар къызэрагъэпэщащ КъБР-м и цIыхубэ артист Отаров Омар къызэралъхурэ илъэси 105-рэ зэрырикъум и щIыхькIэ.
Театрым и япэ къатым щагъэуват дэфтэрхэр зи лъабжьэ выставкэ, IуэрыIуатэдж, балъкъэр цIыхубэ уэрэдыжьхэр зыгъэзащIэу щыта Отаров Омар и гъащIэмрэ гуащIэмрэ теухуауэ.
Фестивалым балъкъэр лъэпкъ уэрэдыжьхэр щагъэзэщIащ Жаникаев Эльдар, Мусукаев Руслан, Занкишиев Марат, «Ийнар», «Жашлыкъ», «Эрирей» ансамблхэм. Апхуэдэу экранымкIэ къагъэлъэгъуащ документальнэ нэтынхэр, Отаровым уэрэдыжьхэр игъэзащIэу зэрыщытар къызыхэщхэр. Пшыхьыр езыгъэкIуэкIа Созаев Ильясрэ Гергокаевэ Хьэлимэтрэ кIэщIу тепсэлъыхьащ Отаров Омар и гъащIэм теухуахэр.
Республикэм и радиомрэ телевиденэмрэ я хорым хэта балъкъэр уэрэджыIакIуэ, узэщIакIуэ цIэрыIуэ Отаров Омар и уэрэд жыIэкIэмрэ и макъымрэ куэдым гукъинэж ящыхъуащ. И лъэпкъым и блэкIар, балъкъэр, къэрэшей лIыхъужьхэм я IуэхущIафэхэр къыхощыж абы игъэзащIэу щыта уэрэдхэм. Отаров Омар цIыхубэм я узэщIакIуэу, лъэпкъ IуэрыIуатэм тхыдэ фэеплъ мыхьэнэ зэриIэр и лъэпкъэгъухэм захригъащIэу, абы пщIэ хуащIыным къыхуриджэу щытащ.
Фестивалым хэта псоми щIыхь тхылъхэмрэ саугъэтхэмрэ иратащ.

ТЕКIУЖЬ Заретэ.
Поделиться: