ЗыгъэпсэхупIэхэр къэкIуэнум поплъэ

Псыхуабэ щызэхэтащ Кавказ Ищхъэрэм и къалэхэм я унафэщIхэм я зэIущIэ.

Ар теухуат зэгуэр турист кIуапIэрэ зыгъэпсэхупIэу щыта ди щIыналъэхэм курортхэмрэ санаторэхэмрэ щызэфIэгъэувэжауэ, ар ди цIыхубэм щIэрыщIэу яхуэгъэлэжьэным. Зэхуэсым къекIуэлIахэм зытепсэлъыхьын яIэт. Ахэр зэдэгуэшащ я Iуэху еплъыкIэхэмрэ нобэ яIэ хэкIыпIэхэмкIэ.

Къэбэрдей - Балъкъэрым къыбгъэдэкIыу зэхыхьэм хэтащ Налшык къалэ администрацэм и Iэтащхьэм и къуэдзэ Дыгъужь Нателлэ. Абы зэрыжиIамкIэ, «апарт хьэщIэщхэм» хуэдэхэр щIадзауэ яухуэ, «Радионовэ псыхущхъуэм» и къыщIэшыпIэми иужь ихьащ.

- Санаторэ, курорт щIыпIэхэм я мызакъуэу зедгъэужьыну ди мурадщ ди шхыныгъуэхэм, ди блэкIам, тхыдэм къыхэна Iуэхугъуэ нэхъ инхэм ущызыгъэгъуазэ туризмэхэми, - жиIащ Нателлэ. Апхуэдэу абы къыхигъэщащ иджыпстукIэ зыгъэпIейтей Iуэху щхьэхуэхэри: турист кIуапIэу щыта ди щIыпIэхэм я инфраструктурэр иджырей дунейпсо мардэхэм къыкIэрымыхуу зэгъэпэщын хуейщ. Абы щIыгъущ цIыхубэ транспортым и зэфIэгъэхьэнри, къалэ кIуэцIхэм я шынагъуэншагъэ мардэхэри. А псоми текIуэдэнур къэплъытэмэ, республикэр хуэныкъуэщ Iуэхум тегушхуэу зи мылъку хэзылъхьэну хуей инвесторхэм.

Къэбэрдей-Балъкъэрым туризмэм зыщиужьынымкIэ нобэ нэхъ зытрагъащIэр нэгъуэщI къэралхэм къикI зыплъыхьакIуэхэр япэу Налшык къэшэнырщ. Абы ипкъ иткIэ щыхьэрым псыкIэ, ятIэкIэ щеIэзэу щыта и курортыр къэгъэщIэрэщIэжын хуейщ. Ди нэхъыжьхэм фIыуэ ящIэж Налшык паркым иту щыта «Водогрязелечебница» зыгъэпсэхупIэ ехьэжьар. Зи узыншагъэр абы щезыгъэфIэкIуэну хуейхэр ди къэралышхуэм и щIыпIэ куэдым мин бжыгъэкIэ къикIырт. Къэралым и лъэлъэжыгъуэм хиубыда а уардэунэр зэрымылажьэжрэ куэд щIа пэтми, и хъуреягъыр, щIыхьэпIэхэр къабзэу зэрахьэ, плиткэ дахэхэмкIэ къищIыкIа лъэс зекIуапIэхэр йокIуалIэ, дыхьэпIэр зыгъэдахэу щыта гъэгъа хэсапIэшхуэр хуэм-хуэмурэ къагъэщIэрэщIэж.

Iуащхьэмахуэ лъапэ иужьрей илъэсхэм туристу куэд къэкIуащ. ЗэманкIэ дызэIэбэкIыжмэ, Iуащхьэмахуэ лъапэ туристу къытхуеблагъэу щытам я бжыгъэм хуэдипщIкIэ хэхъуащ иужьрей илъэс зэкIэлъыкIуэхэм. Нобэ ар мин 800-м фIеш.