Нобэ♦Чернобыль АЭС-м къыщыхъуа аварием и лъэужьхэр зыгъэкIуэдыжахэр щагъэлъапIэ махуэщ ♦Номинхэм я дунейпсо махуэщ ♦Академик Сахаров Андрей и фэеплъ махуэщ. Совет физик, жылагъуэ лэжьакIуэ цIэрыIуэ, Нобель саугъэтым и лауреат Сахаров Андрей 1989 гъэм дунейм ехыжащ. ♦1542 гъэм Шотландие пащтыхьыгъуэм и унафэщIу ягъэувауэ щытащ Стюарт Марие. Абы и гъащIэр гъэщIэгъуэныщэу къызэрекIуэкIар зыфIэтелъыджэу щытар и лъэхъэнэгъухэм я закъуэкъым. Ноби абы теухуа тхылъхэр къыдокI, фильмхэр трах. ♦1695 гъэм къэралым и пащтыхь Пётр Езанэм къыхилъхьэри, адыгэпщ Черкасский Михаил Алигъуокъуэ и къуэр Урысейм и генералиссимусу хахат. ♦1799 гъэм дунейм ехыжащ США-м и япэ президенту щыта Вашингтон Джон. ♦1825 гъэм Санкт-Петербург и Сенатскэ утыкум деж къыщызэрыIэтащ къэралым зэхъуэкIыныгъэшхуэхэр щегъэкIуэкIын хуейуэ къэзыгъэувхэр. Ахэр цIыху минищым щIигъурт. ЗэхъуэкIыныгъэхэм я нэхъыщхьэр къэрал унафэр пащтыхьым къыIэщIэхынымрэ пщылIыгъэр гъэкIуэдынымрэт. ♦1844 гъэм Порт-Петровск къалэм (иджырей Мэхъэчкъалэм) и лъабжьэр ягъэтIылъащ. ♦1893 гъэм Москва и Утыку Плъыжьым Сату щIыпIэхэр къыщызэIуахауэ щытащ. Иджыпсту ар ГУМ тыкуэнышхуэрщ. ♦1911 гъэм Норвегием щыщ къэхутакIуэ Амундсен Руаль япэу Ипщэ полюсым нэсащ. ♦1939 гъэм СССР-р Лъэпкъхэм я лигэм къыхагъэкIыжащ, Финляндием зэрезауэмкIэ ягъэкъуаншэри. 1943 гъэм ВКП (б)-м и ЦК-м и унафэкIэ къащтащ СССР-м и Къэрал гимныр. ♦1947 гъэм СССР-м и Министрхэм я Советымрэ ВКП (б)-м и ЦК-мрэ къыдагъэкIащ «Ахъшэ реформэ егъэкIуэкIынымрэ ерыскъы, промышленнэ хьэпшыпхэр къызэращэху карточкэхэр къэмыгъэсэбэпыжынымрэ я IуэхукIэ» унафэр. ♦1955 гъэм ООН-м хагъэхьащ Австрие, Албание, Болгарие, Венгрие, Иордание, Ирландие, Испание, Италие, Камбоджэ, Лаос, Ливие, Непал, Португалие, Румыние, Финляндие, Шри-Ланка къэралхэр. ♦1975 гъэм Камбоджэ къэралым зэреджэр Кампучие жиIэу зэрахъуэкIащ. ♦1992 гъэм Абхъазым хыхьэ Латэ къуажэм деж куржыдзэхэм къыщраудыхащ Гудаутэ кIуэ урысей кхъухьлъатэр. Абы бийм къиухъуреихьа къалэм дэсхэм ерыскъыпхъэхэр, нэгъуэщI зыхуеинухэр яхуишэрт. Кхъухьлъатэм иса цIыху 87-ри, абыхэм сабий 35-рэ яхэту, хэкIуэдащ. ♦1816 гъэм къалъхуащ Кавказым щыпсэу лъэпкъхэм я бзэхэр щIэныгъэм тету джыным япэу зезыпщытахэм ящыщ, адыгэбзэм, абхъазыбзэм, шэшэныбзэм я алфавит зэхэзылъхьа Услар Пётр. ♦1922 гъэм къалъхуащ совет физик, академик, лазерыр къэгъэсэбэпыным теухуа и къэхутэныгъэхэм папщIэ Нобель и саугъэтыр зрата, Социалист Лэжьыгъэм тIэунейрэ и ЛIыхъужь Басов Николай. ♦1924 гъэм къалъхуащ Индием щыщ актёр цIэрыIуэ, режиссёр, зи сценарийрэ зи мылъкукIэ фильм куэд траха Капур Радж. ♦1936 гъэм къалъхуащ дирижёр, КъБР-м гъуазджэхэмкIэ щIыхь зиIэ и лэжьакIуэ Бекъул Леонид. Дунейм и щытыкIэнур «pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градуси 9 - 11, жэщым градуси 2 - 3 щыхъунущ. Лъэпкъ Iущыгъэ: Адэ щIэиныншэрэ къупщхьэншэ лырэ.
Поделиться:
Читать также:
25.04.2024 - 09:00 →
НОБЭ
24.04.2024 - 13:21 →
ЩIым и махуэ
24.04.2024 - 11:43 →
НОБЭ
23.04.2024 - 09:45 →
НОБЭ
22.04.2024 - 15:50 →
НОБЭ
|