КъБКъУ-м къыщызэIуахащ IэщIагъэхэм зыщыхуагъасэ IэнатIэщIэ. Абы ирихьэлIащ КIуэкIуэ Юрий

 КъБР-м и Iэтащхьэ КIуэкIуэ Юрий дыгъуасэ Къэбэрдей-Балъкъэр къэрал университетым щыIащ икIи стомато­логием хуеджэхэм IэщIагъэм зыщыхуагъасэ пэшыщIэ къыщызэIуахым хэтащ. Къэгъэлъэгъуапхъэщ мы еджапIэм иужьрей зэманым хуабжьу псынщIэу зэрызиужьыр. Иужьрей илъэсрэ ны­къуэм абы студентхэр щеджэ унэщIэу тIу хьэзыр щащIащ. Мы центрыр сэ­бэп хъунущ дзэ дохутырхэр я IэщIагъэм хуэIэзэу гъэсэнымкIэ.

 Стоматологхэм зыщагъэсэну центрыр иджырей IэмэпсымэхэмкIэ къызэгъэпэщащ икIи абы Iэмал псори щыIэщ медицинэмкIэ факультетым и студентхэмрэ ­аспирантхэмрэ я щIэныгъэм, IэщIагъэм зэпымыууэ щыхэгъэхъуэн папщIэ.
 «Еджэнымрэ IэщIагъэм зыхуэгъэсэ­ным­рэ быдэу зэпыщIауэ зэрырагъэкIуэ­кIынум и фIыгъэкIэ дэ хуабжьу дызыхуэ­ныкъуэ IэщIагъэлI нэсхэр узыншагъэр ­хъумэнымкIэ IэнатIэм нэхъыбэ щыхъунущ. Абы къыхэкIыу дэ ди мурадщ университетым адэкIи дыдэIэпыкъуну, абы и мылъку, техникэ зэфIэкIым хэгъэхъуэным, иджырей технологиехэр егъэджэныгъэм къыщыгъэсэбэпыным и лъэныкъуэ­кIэ ди деж зыри къыщыдмыгъэнэну», - жиIащ республикэм и УнафэщIым.
 Студентхэмрэ егъэджакIуэхэмрэ къыщепсалъэм КIуэкIуэ Юрий гулъытэ хуи­щIащ щIалэгъуалэ политикэр пхыгъэ­кIыным, волонтёрхэм я зэщIэхъееныгъэм Къэбэрдей-Балъкъэрым зыщегъэубгъу­ным. Ар Гъатхэпэм и 8-мкIэ университетым цIыхубз щеджэхэмрэ егъэджа­кIуэ­хэмрэ ехъуэхъуащ. «Фи гъащIэр гуфIэ­гъуэрэ насыпкIэ гъэнщIауэ щытыну си ­гуапэщ», - жиIащ КIуэкIуэ Юрий.

КъБР-м и Iэтащхьэмрэ Прави­тельствэмрэ я пресс-IуэхущIапIэ.

Свежие номера газет Адыгэ псалъэ


13.11.2018
12.11.2018
08.11.2018
07.11.2018