ЩIэныгъэлI, егъэджакIуэ Iэзэ

Щапхъэ

«Адыгэ псалъэ» газетым и щIэджыкIакIуэхэм фэзгъэцIыхуну сыхуейт си адэ къуэш нэхъыжь, цIыху гъэщIэгъуэн, щIэныгъэлI щыпкъэ, егъэджакIуэ Iэзэ Жэмыхъуэ Руслан Щыхьырбий и къуэр. Аруан куейм хыхьэ Къэхъун къуажэм 1955 гъэм жэпуэгъуэм и 17-м къыщалъхуащ ар. Курыт еджапIэр ехъулIэныгъэкIэ къиуха нэужь, 1974 - 1979 гъэхэм Руслан щеджащ Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым математикэмкIэ и къудамэм.

Ар къиуха нэужь щригъэджащ Налшык дэт 24-нэ курыт школым. 1981 гъэм къыщыщIэдзауэ КъБКъУ-м щолажьэ. 1984 гъэм Мэзкуу дэт, СССР-м ЩIэныгъэхэмкIэ и Академием  Вводнэ проблемхэмкIэ и институтым и аспирантурэм щIэтIысхьащ. 1992 гъэм кандидат диссертацэр ехъулIэныгъэкIэ пхигъэкIащ. 1997 гъэм доцент цIэр къыфIащащ.

2014 - 2015 гъэхэм КъБКъУ-м математикэмкIэ и факультетым и декану лэжьащ Руслан, иужькIэ  КъБКъУ-м физикэмрэ математикэмкIэ и институтым и унафэщIу щытащ. 2016 гъэм и фокIадэ мазэм къыщыщIэдзауэ 2017 гъэм и мазае хъуху математикэ анализымрэ дифференциальнэ уравнениехэмкIэ кафедрэм и унафэщIу щытащ. Иджыпсту алгебрэмрэ дифференциальнэ уравнениехэмкIэ кафедрэм и доцентщ.

ЗэфIих и лэжьыгъэфIхэм къапэкIуэу Жэмыхъуэ Руслан щIыхь тхылърэ дамыгъэ лъапIэхэмрэ къратащ. «Урысейм и Профсоюзыр илъэси 100 зэрырикъум и щIыхькIэ» медалыр къыхуагъэфэщащ. Жэмыхъуэм и Iэдакъэ къыщIэкIащ щIэныгъэ лэжьыгъэу 50-м щIигъу. Ахэр УФ-ми хамэ къэралхэми къыщыдэкI журналхэм къытехуащ.

ЩIэныгъэлIым и ехъулIэныгъэ нэхъ инхэм ящыщщ Германием, Франджым, Израилым, Къэзэхъстаным, Испанием, Урысей Федерацэм зэгуэту ягъэхьэзыра «Коперникус» дунейпсо проектым зэрыхэлэжьыхьар. Апхуэдэуи ар Урысейм Фундаментальнэ къэхутэныгъэхэмкIэ и фондым и грантым и жэуапыхь гъэзэщIакIуэщ.

Жэмыхъуэ Руслан, щIэныгъэми егъэджэныгъэми хэлъхьэныгъэ ин хуэзыщI щIэныгъэлI щыпкъэм, егъэджакIуэ Iэзэм, щIэблэр дрогушхуэ икIи дропагэ.