Си лъэпкъ мащIэр ефIэкIуэныр си хъуэпсапIэщ

Ди псэлъэгъухэр

Иджыблагъэ упщIэ зыбжанэкIэ зыхуэдгъэзащ и унагъуэр и гъусэу Москва щыпсэу щIалэ, адыгэ Iуэхум зигу етахэм ящыщ Сэхъу Мурат.

- Мурат, укъыщалъхуа къуажэм, уи сабиигъуэм я гугъу уэзгъэщIынут.

- Сэ Налшык сыкъыщыхъуащ, ауэ  къуажэр нэхъ сфIэфIти, еджэным сыкъыщыдэхуэм абы сыкIуэжырт. Си сабиигъуэм и ныкъуэр абы щызгъэкIуауэ жыпIэ хъунущ. Ди къуажэм зэреджэу щытар Къугъуэлъкъуейщ, иджы Урыху жыхуа1эрщ. Абы дыщызэшыртэкъым,  Iэщым дыхэтми, губгъуэм дыдэкIми, псыхъуэм дыдэсми - тщIэн дгъуэтырт. Гъэмахуэ пщыхьэщхьэ хуабэхэм тетIысхьэпIэм дытест, дыуэршэрыру. ЩIакхъуэ ягъэжьамэ, зэрыпщтыру къатщтэурэ кхъуей щIыгъуу тшхырт, шатэрэ кхъуейрэ дыщыщIэххэртэкъым. Пхъэщхьэмыщхьэ къызыпыкIэ жыг къэдгъанэртэкъым - махуэ къэс абыхэм дыфIэст, кIарц нэгъунэ тшхыуэ щытащ. Губгъуэм щIэрыкIуэ къыщыт1тIырт, мэзым мышхумпIэ, кхъужь цIыкIу, къущхьэмышх къыщытщыпырт.

- А зэманым сытым нэхъ удихьэхрэт?

- СызэрыцIыкIурэ щIэныгъэм сыхущIэкъуу щытащ. ГъащIэм щыслъагъуу хъуам упщIэ хуэзгъэувырт, нэхъыбэ сщIэну сыхуейт. КхъухькIэ щIым и хъуреягъыр къэзыкIухьахэм я тхылъхэм, фантастикэм, адыгэ псысэхэм седжэрт.

- Сыт хуэдэ хъуэпсапIэхэр уиIа?

- Сыщысабийм зы хъыбар сигу къинат, Прометей теухуауэ. Ар, Нэсрэн-ЖьакIэ ещхьу, къуршым ираIулIат. Абы щыгъуэм ар зэрызыхэсщIар гуимыхужщ - цIыхухэм фIы яхуищIэн папщIэ мафIэ Гефест гъукIэм къыфIидыгъуауэ арат. Абы иужькIэ сэри сигу ислъхьат цIыхухэм фIы яхуэсщIэу сыпсэуну. ЗэрысщIыну щIыкIэр сщIэртэкъым, ауэ сыхъуапсэрт. Ар си щхьэм имыкIыу, си лъэпкъ мащIэр ефIэкIуэныр хъуэпсапIэ псом ящхьэжу къэслъытэу нобэм сыкъэсащ.

- Узыхуеджар, IэщIагъэу къыхэпхар къыджеIэт.

- IэщIагъэ къыщыхэсхми тегъэщIапIэ сщIар си сабиигъуэм къыщежьа гупсысэхэращ. Медицинэм сыхуеджэну сыкIуэри, Москва дэт РУДН-м и стоматологие къудамэр къэзухащ.

- Лъэпкъ Iуэхухэм я гугъу тщIымэ, сыт узыгъэгузавэр, нэхъ уигу къеуэр?

- Илъэс 20 ипэкIэ Iэджи сигу къеуэу щытащ. Си ныбжьыр нэхъ кIуэтэху къызгурыIуаращи, гъащIэм сыт къыщымыхъуами, гузэвэным зыдумыгъэхьэхыу хэкIыпIэ улъыхъуэн хуейщ. Лъэбакъуэ зырызыххэ фIэкIа пхуэмычми, уи пIэ уимытмэ, укIуатэмэ аращ нэхъапэр. Ди щы1эк1э-псэук1эри  абы лъандэрэ жыжьэ кIуэтащ, куэдкIэ нэхъыфIи хъуащ. Зэрыщытам хуэдэу, шынагъуэжкъым.

- Лъэпкъыу дыкъызэтенэн папщIэ,  сытхэр лэжьыпхъэу къэплъытэрэ?

- Дэ адыгэу дыщIыщытыр къыдгурыIуэжыху лъэпкъыу дыкъызэтенэнущ. АпщIондэху адыгэбзэми дыхуеинущи, абы нэхъ дегугъун хуейщ. Бзэр зыгъэбагъуэу щытар IуэрыIуатэрати, ар хьэщIэщхэм махуэ бжыгъэкIэ цIыхухэр щисыфым щыгъуэ тхуэлажьэрт. ИужькIэ тхылъхэр къежьати, абык1и ехъул1эныгъэр мащ1экъым. Иджы интернетым нэхъ зрат хъуащи, ар зыIэщIэдгъэкI хъунукъым. Интернетым адыгэбзэм япэ лъэбакъуэхэр щич къудейуэ жыпIэ хъунущ. Куэди щащIащ: щэ бжыгъэурэ видео илъщ, узэдаIуэ тхылъ къыдагъэкI, уэрэдхэр гъунэжщ, иджы щIэуэ къаублауэ уэршэр куэд къыщат, тхьэмахуэ къэс 2 - 3 къыдэкIыу. Ауэ нэхъыбэжи щIэн хуейщ. Адыгэбзэ зымыщIэ къытхэтмэ, ар зи лажьэр адыгэбзэ зыщIэхэращ. Дэтхэнэ зыми лъэкI къигъанэ хъунукъым абы теухуауэ. Ар си 1уэху еплъыкIэщ.

- Узэлэжьхэм, уи мурадхэм укъытхутепсэлъыхьамэ ди гуапэт.

- Си унагъуэр зэрыспI си IэщIагъэм нэмыщI, адыгэбзэм хуэгъэза лэжьыгъэ гуэрхэри изогъэкIуэкI. Зы псалъалъэ зэзгъэпэщащи, абы щамыгъуэт псалъэхэр хызогъэхьэж. Уэрэдхэм я псалъэхэр зэхузохьэс. Иджыпсту абхъазхэм анимацие гуэрхэр ящI нартхэм ятеухуауи, апхуэдэ ди бзэкIэ псалъэу къызэрызэзгъэпэщыным яужь ситщ.

-  Тхьэм ухущIигъэхьэ! Уи хъуэпсапIэхэр къохъулIэмэ ди гуапэщ.

Епсэлъар НАФIЭДЗ Мухьэмэдщ.
Поделиться: