Дыгулыбгъуей къуажэ КIуэкIуэ Валерэ и фэеплъ сыныр къыщызэIуахащ

Нобэ Дыгулыбгъуей къуажэ дэт ЩэнхабзэмкIэ уардэунэм и пащхьэ къыщызэIуахащ псэужамэ зи ныбжьыр илъэс 80 ирикъуну щыта, совет икIи урысей къэрал лэжьакIуэ, Къэбэрдей-Балъкъэрым и япэ Iэтащхьэу щыта КIуэкIуэ Валерэ и фэеплъ скъар (сын).

Къэбэрдей-Балъкъэрым и япэ Президентым и фэеплъыр щалъхуа щIыпIэм щыгъэувыныр зи жэрдэмыр Бахъсэн къалэмрэ Дыгулыбгъуей къуажэмрэ щыпсэу цIыхухэрщ. Фэеплъыр мывэм къыхэзыускъэрыкIар скъарыщI цIэрыIуэ Катони Станиславщ.

Фэеплъ скъарыр къыщызэIуах зэIущIэм хэтащ Къэбэрдей-Балъкъэрым и Iэтащхьэ КIуэкIуэ Казбек, Къэрэшей-Шэрджэсым и Iэтащхьэ Темрезов Рашид, УФ-м и Къэрал Думэм и депутатхэр, Къэбэрдей-Балъкъэрым и Правительствэмрэ Парламентымрэ хэтхэр, КъБР-м и щIыналъэхэм щIыпIэ унафэр щызехьэнымкIэ и IуэхущIапIэхэм я унафэщIхэр, Бахъсэн къалэмрэ щIыналъэмрэ щыIэ жылагъуэ зэгухьэныгъэхэмрэ щIалэгъуалэ зэщIэхъееныгъэхэмрэ я лIыкIуэхэр, КIуэкIуэ Валерэ и Iыхьлыхэр.

Фэеплъ скъарыр къызэIуихыну хуагъэфэщащ Къэбэрдей-Балъкъэрымрэ Къэрэшей-Шэрджэсымрэ я Iэтащхьэхэу КIуэкIуэ Казбекрэ Темрезов Рашидрэ. Абы иужькIэ пэкIум къекIуэлIахэм псоми удз гъэгъахэр скъарым тралъхьащ.

Къэбэрдей-Балъкъэр Республикэм и япэ Президенту щыта КIуэкIуэ Валерэ Мухьэмэд и къуэр Тырныауз къалэм 1941 гъэм жэпуэгъуэм и 18-м къыщалъхуащ. Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым и экономикэ къудамэр къиуха нэужь, ар щIэтIысхьащ Мэзкуу дэт, Мэкъумэш хуэIухуэщIэхэм я экономикэмкIэ Союзпсо щIэныгъэ-къэхутакIуэ институтым и аспирантурэм, абдеж кандидат лэжьыгъэр щыпхигъэкIри, экономикэ щIэныгъэхэм я кандидат цIэр иIэу и хэку къигъэзэжащ.

КIуэкIуэ Валерэ  лэжьэн щыщIидзар Бахъсэн щIыналъэм щыIэ «Бгырыс лэжьакIуэ» колхоз цIэрыIуэрщ. КIуэкIуэр сыт хуэдэ IэнатIэ пэрымытами, лэжьыгъэм псэемыблэжу зэрыбгъэдэтыр къалъытэри, КъБАССР-м Мэкъумэш хуэIухуэщIэхэмкIэ и министерствэм и къудамэм и унафэщI, иужькIэ «Лэскэн» совхозым и директор ящIащ. Куэд дэмыкIыуи, КIуэкIуэ Валерэ ягъэуващ партым и Аруан комитетым и унафэщIу. Абы щыгъуэщ КIуэкIуэм зэфIэкIышхуэ зэриIэр, акъылрэ зэгъэзахуэрэ хэлъу сыт хуэдэ Iуэхуми зэрыбгъэдыхьэр наIуэ щыхъуар. КIуэкIуэ Валерэ Совет Союзым и Коммунист партым Къэбэрдей-Балъкъэрым щиIэ и къудамэм и япэ секретару, КъБАССР-м и Совет Нэхъыщхьэм и Тхьэмадэу, Урысейм ФедерацэмкIэ и Советым и сенатору щытащ. 1996 гъэм щегъэжьауэ 2001 гъэ пщIондэ абы ФедерацэмкIэ Советым и УнафэщIым и къуэдзэ IэнатIэр иIыгъащ. 1992 - 2005 гъэхэм КIуэкIуэ Валерэ Къэбэрдей-Балъкъэрым и Япэ Президенту щытащ.

КIуэкIуэ Валерэ и зэфIэкIхэр къэралым гулъытэншэ ищIакъым. Абы къыхуагъэфэщащ дамыгъэ лъапIэ куэд: «Хэкум и пащхьэм щиIэ фIыщIэхэм папщIэ» орденым и II, III нагъыщэхэр, ГуащIэдэкIым и Бэракъ Плъыжь, «ЩIыхьым и Дамыгъэ», Ныбжьэгъугъэм, Жэпуэгъуэ Революцэм я орденхэр.