Илъэс пщыкIутху къытралъхьэ

Атлетикэ хьэлъэмкIэ дунейми Европэми я чемпион, 2004 гъэм Афинхэм щекIуэкIа Олимп джэгухэм дыжьын медалыр къыщызыхьа Аккаев Хьэжмурат спорт зэхьэзэхуэхэм хэтыну хуимыту къыхуагъэуващ 2035 гъэм щIышылэм (январым) и 22-м пщIондэ.
Апхуэдэ хъыбар зэбгригъэхащ Атлетикэ хьэлъэмкIэ дунейпсо федерацэм (IWF) и пресс-IуэхущIапIэм. Балъкъэр щIалэм а тезыр хьэлъэр къытралъхьащ зэхьэзэхуэхэм хэтыну хуимыту зыкъыщигъэлъэгъуэу Допингым пэщIэтынымкIэ регламентым и IыхьитI къызэрызэпиудамкIэ.
Фигу къэдгъэкIыжынщи, 20I2 гъэм Лондон щекIуэкIа Олимпиадэм къыщыIаха анализхэм, илъэситху дэкIа нэужькIэ щIэрыщIэу къапщытэжри, къыщIагъэщащ и къарум хэзыгъахъуэ хущхъуэ Аккаевым зэрихьэлIауэ. Абы ипкъ иткIэ Урысейм Атлетикэ хьэлъэмкIэ и федерацэм хъыбар къитащ ар илъэсийкIэ зэпеуэхэм хэтыну хуимыту IWF-м къызэригъэувар. НэхъапэжкIэ, Дунейпсо Олимп Комитетым Аккаев Хьэжмурат къытрихыжащ 2008 гъэм Пекин щекIуэкIа Олимпиадэм атлетикэ хьэлъэмкIэ килограмм 94-м нэс зи хьэлъагъхэм я зэпеуэм къыщихьа домбеякъ медалыр, допинг зэрихьэлIауэ къэпщытэныгъэхэм къызэрыщIагъэщыжам къыхэкIыу.
Иджыпсту илъэс 36-рэ зи ныбжь Аккаевыр, дауи, зыкъом щIауэ зэхьэзэхуэхэм хэтыжкъым икIи 2035 гъэ пщIондэ ахэр къызэрыпаубыдым мыхьэнэ щIагъуэ иIэжкъым. Гур хэзыгъэщIыр дуней псор къыщIэплъу и напэр зэрытрахырщ.
Апхуэдэу щыт пэтми, Аккаев Хьэжмурат дунейми Европэми я чемпиону иджыри къонэж, Алыджым 2004 гъэм къыщихьа дыжьын олимп медалри IэщIахыжакъым.
 

 

Хьэтау Ислъам.
Поделиться: