Зэманым пэджэжу

Бэнкси цIэ лейр зезыхьэ инджылыз художник цIэрыIуэм и лэжьыгъэр Лондон щекIуэкIа аукционым доллар мелуан 23-м щIигъукIэ щищащ.

«ЩытыкIэм и хабзэм зезыгъэхъуэж» зыфIища сурэтым и оригиналыр ящэхуащ фунт мелуан I6,8-рэ (доллар мелуан 23-м щIигъу). Абы щыщу фунт мелуан 14,4-р (доллар мелуан 19,9-р) Великобританием и Саутгемптон къалэм щылажьэ инджылыз дохутырхэм псапэ зэращIэ Iуэхухэм трагъэкIуадэ.
Художникым зы метр зэбгъузэнатIэ зи инагъ сурэтыр узыншагъэр хъумэным и лэжьакIуэхэм ятриухуащ икIи абы къыщигъэлъэгъуащ медсестра теплъэ зиIэ, нэкIуIупхъуэ зыIулъ гуащэм ириджэгу щIалэ цIыкIур. Лэжьыгъэм къищ гуащэм и щIыб щыболъагъу пхъэнкIий идзыпIэм хэлъ лIыхъужьхэр – Бэтменрэ ЦIыху-бэджымрэ я теплъэхэр. Сурэтым плъыфэ щхъуэкIэплъыкIэу хэплъагъуэр медсестрам и бгъэм къытещ жор плъыжьырщ. Нэгъабэ накъыгъэ мазэм, коронавирус узыфэм и пандемием и япэ лъэхъэнэм ирихьэлIэу ар Саутгемптон къалэм и сымаджэщым тыгъэ хуищIащ икIи ар IуэхущIапIэм и щIыхьэпIэм деж щагъэуващ, сурэтыщIым къыбгъэдэкI фIыщIэ тхыгъэр щIыгъуу. «ЦIыхухэм я узыншагъэр хъумэным епха IэнатIэ гугъум фызэрыпэрытым папщIэ Тхьэм фигъэпсэу! Си лэжьыгъэр мыплъыфэбэми, мы щIыпIэр нэхъ щхъуэкIэплъыкIэ ищIыну сыщогугъ, - щитхащ абы дохутырхэм зэрызахуигъэза и тхыгъэм.
Бэнкси и лэжьыгъэхэм ящыщу иджыри къэс нэхъ лъапIэу хуэщар «Регресс Парламента» зыфIищарт. Ар аукционым щащэхуат доллар мелуан 12-кIэ.

 

ТЕКIУЖЬ Заретэ.
Поделиться: